“Se Kingsley hakaʼas an hanesan neʼe, tansá haʼu la bele?”

KINGSLEY hamriik hela iha plataforma atu halaʼo ninia knaar primeiru iha reuniaun Eskola Serbisu Kristaun nian hodi lee Bíblia. Ema ida book ninia kabaas, no nia komesa lee ona. Kingsley temi liafuan ida-idak ho momoos, maibé nia la haree ba ninia Bíblia. Tanbasá?

Kingsley mak ema matan-delek ida. Nia tilun mós komesa diuk ona no nia la bele laʼo, tan neʼe nia uza kadeira-roda deʼit. Oinsá mak Kingsley, neʼebé hela iha Seilaun (Sri Lanka) aprende kona-ba Jeová toʼo tama Eskola Serbisu Kristaun? Haʼu sei esplika ba imi.

Bainhira haʼu hasoru Kingsley ba dala primeiru, haʼu hakfodak hodi haree nia hamrook duni ba lia-loos husi Bíblia. Uluk nia estuda ona ho Testemuña balu hodi uza livru Knowledge That Leads to Everlasting Life neʼebé uza ema matan-delek nia letra naran braile.a Haʼu husu se nia hakarak estuda fali ho haʼu no nia hatán. Maibé atu estuda, ami hasoru susar rua.

Primeiru, Kingsley hela iha fatin neʼebé ema tau matan ba katuas-ferik no aleijadu sira nian. Ema barak hela iha neʼe, tan neʼe fatin neʼe sempre barullu tebes. Tanba Kingsley diuk uitoan, haʼu presiza hasaʼe haʼu-nia lian no koʼalia makaʼas uitoan para nia bele rona haʼu. Ema hotu iha uma neʼe mós rona haʼu bainhira ami estuda!

Segundu, bainhira ami estuda semana-semana, Kingsley bele lee no komprende uitoan deʼit. Tan neʼe, Kingsley sempre prepara didiʼak nanis. Nia lee fila-fila informasaun antes ami atu estuda, no nia mós loke eskritura sira iha ninia Bíblia braile nian. Ba pergunta ida-idak, nia hanoin kona-ba resposta. Tanba nia prepara nanis hanesan neʼe ami bele halaʼo estuda neʼebé ajuda tebes nia. Bainhira ami estuda, nia tuur iha tapete, no ho lian boot nia esplika kona-ba buat neʼebé nia aprende tanba nia kontente tebes. Lakleur, ami komesa estuda semana ida dala rua, no ami baibain estuda ba oras rua!

HOLA PARTE IHA REUNIAUN SIRA

Kingsley hakarak tebes tuir reuniaun sira maibé atu halo ida-neʼe la fasil. Nia presiza ema ajuda nia tun husi kadeira-roda, karreta, no lori nia tama ba Reuniaun-Fatin. Maibé ninia irmaun sira sente kontente hodi troka malu ajuda nia. Bainhira nia tuir reuniaun sira, nia tau koluna kiʼik besik ninia tilun hodi nia bele rona didiʼak, no nia mós bele fó komentáriu!

Ikusmai, Kingsley tama Eskola Serbisu Kristaun nian. Semana rua antes nia atu halo ninia parte, haʼu husu se nia treinu ona ka seidauk. Ho fiar an nia dehan, “Sin irmaun, haʼu treinu dala 30 ona.” Haʼu gaba nia no husu nia atu lee ba haʼu. Nia loke ninia Bíblia, tau nia liman-fuan ba letra braile sira, no komesa lee. Maibé haʼu haree katak ninia liman ladún lamas letra braile sira hanesan baibain nia halo. Afinál nia dekór hotu eskritura sira neʼebé nia atu lee!

Haʼu-nia matan-been suli nuʼudar haʼu haree nia. Haʼu husu oinsá nia bele dekór hotu se nia lee deʼit dala 30. Nia hatán dehan, “Lae, irmaun, loron ida mak dala 30.” Nia esplika mai haʼu katak, ba fulan ida ona, nia tuur iha ninia tapete hodi lee fila-fila toʼo nia bele dekór hotu.

Loron toʼo ona atu Kingsley hatoʼo ninia parte iha Reuniaun-Fatin. Bainhira nia lee hotu ona, irmaun-irmán sira hotu basa liman makaʼas ba nia, no barak mós tanis tanba haree estudante foun neʼe hakaʼas an tebes. Irmán ida, nia uluk para ona atu fó diskursu sira iha eskola tanba sempre nakdedar. Maibé nia husu atu tama fali. Nia dehan, “Se Kingsley hakaʼas an hanesan neʼe, tansá haʼu la bele?”

Kingsley estuda Bíblia ba tinan tolu no nia hetan batizmu iha loron 6 fulan-Setembru 2008. Kingsley laran-metin toʼo nia mate iha loron 13 Maiu 2014. Ho laran tomak nia fiar katak iha mundu foun nia bele kontinua serbí Jeová ho nia forsa tomak no ho saúde neʼebé diʼak. (Isaías [Yesaya] 35:5, 6)—Hatoʼo husi Paul McManus.