Ita haleno Jeová nia hahalok justisa ka lae?
“Haʼu sei fó sai Jeová nia naran . . . , Maromak laran-metin, nia sempre hatudu justisa.”—DEUTERONÔMIO (ULANGAN) 32:3, 4.
1, 2. (a) Nabot ho ninia oan sira hasoru hahalok la justisa saida? (b) Ita sei koʼalia kona-ba hahalok rua saida iha lisaun neʼe?
EMA naʼin-rua duun mane ida katak nia halo krime boot. Liafuan husi ema naʼin-rua neʼe tuir loloos lia-bosok. Maibé mane neʼe hetan kastigu-mate. Hanoin toʼok ema seluk neʼebé iha hahalok justisa, sira sei sente oinsá bainhira sira haree ema tuda toʼo mate mane neʼe ho ninia oan sira neʼebé la sala! Ida-neʼe akontese ba Jeová nia atan laran-metin ida naran Nabot iha tempu Liurai Akabe ukun rai-Izraél.—1 Reis (Raja-Raja) 21:11-13; 2 Reis (Raja-Raja) 9:26.
2 Iha lisaun neʼe, ita sei koʼalia kona-ba saida mak akontese ba Nabot. Ita mós sei haree sala boot saida mak katuas laran-metin ida halo iha apóstolu sira-nia tempu. Ezemplu rua neʼe sei hatudu sai oinsá mak hahalok haraik-an no fó perdua ho laran importante tebes se ita hakarak iha Jeová nia hanoin kona-ba justisa.
AKONTESIMENTU LA JUSTISA
3, 4. Nabot mak ema hanesan saida, no tanbasá mak nia lakohi faʼan ninia toʼos-uvas ba Liurai Akabe?
3 Nabot laran-metin ba Jeová iha tempu neʼebé ema Izraél barak halo tuir ezemplu aat husi Liurai Akabe no husi ninia feen neʼebé laran-aat, liurai-feto Jezabel. Ema sira adora maromak falsu Baal no la hatudu respeitu ba Jeová ka ba ninia ukun-fuan sira. Maibé Nabot hafolin ninia relasaun ho Jeová liu fali ninia moris rasik.
4 Lee 1 Reis (Raja-Raja) 21:1-3.a Akabe husu ba Nabot atu hola Nabot nia toʼos-uvas, ka selae, fó toʼos-uvas neʼebé diʼak liu atu troka fali ho Nabot nian. Maibé Nabot lakohi. Tanbasá? Ho respeitu Nabot esplika: “Iha Jeová nia haree la diʼak duni atu fó haʼu-nia beiʼala sira-nia liman-rohan ba Ita-Boot.” Nabot hatene katak, atu faʼan família nia liman-rohan ba nafatin mak hahalok neʼebé kontra Jeová nia ukun-fuan. (Levítico [Imamat] 25:23; Números [Bilangan] 36:7) Husi neʼe ita haree katak Nabot halo tuir Jeová.
5. Jezabel halo saida hodi hetan Nabot nia toʼos-uvas?
5 Bainhira Nabot lakohi faʼan ninia toʼos-uvas, Liurai Akabe ho ninia feen halo buat aat tebes ba nia. Liurai-feto Jezabel buka ema naʼin-rua hodi duun matak Nabot kona-ba krime neʼebé nia nunka halo, hodi nuneʼe nia bele foti Nabot nia toʼos. Neʼe lori mate ba Nabot ho ninia oan sira. Jeová halo saida kona-ba hahalok la justisa neʼe?
MAROMAK TESI LIA HO JUSTISA
6, 7. Jeová halo saida hodi hatudu sai katak nia hafolin justisa, no tanbasá mak neʼe lori kmaan ba Nabot nia família no belun sira?
6 Jeová haruka kedas Elias bá hasoru Akabe. Elias dehan ba Akabe katak nia ohodór no naʼok-teen. Jeová hakotu katak Akabe, ninia feen, no ninia oan sira sei mate hanesan Nabot ho ninia oan sira.—1 Reis (Raja-Raja) 21:17-25.
7 Nabot nia família no belun sira sente triste tebes kona-ba buat aat neʼebé Akabe halo. Maibé Jeová haree daudauk hahalok la justisa neʼe no nia halo kedas buat ruma kona-ba akontesimentu neʼe. Ida-neʼe lori kmaan ba Nabot nia família no belun sira. Maibé akontesimentu tuirmai karik koko tebes sira-nia haraik-an no fiar ba Jeová.
8. Bainhira Akabe rona mensajen husi Jeová, nia halo saida, no neʼe lori rezultadu saida?
8 Bainhira Akabe rona kona-ba saida mak Jeová deside ona atu halo ba nia, “nia lees ninia unuk no hatais hena karón no nia halo jejún no kontinua toba ho hena karón no laʼo ho laran-tun”. Akabe sai haraik-an. Neʼe lori rezultadu saida? Jeová fó-hatene Elias: “Tanba nia haraik an iha haʼu-nia oin, haʼu sei la lori susar neʼe durante tempu neʼebé nia sei moris. Haʼu sei lori susar neʼe ba ninia umakain iha ninia oan-mane nia tempu.” (1 Reis [Raja-Raja] 21:27-29; 2 Reis [Raja-Raja] 10:10, 11, 17) Jeová, ida neʼebé “buka-hatene didiʼak ema nia laran” bele haree loloos ita mak ema hanesan saida. Tan neʼe nia hatudu laran-sadiʼa ba Akabe.—Provérbios (Amsal) 17:3.
HARAIK-AN MAK PROTESAUN IDA
9. Tanbasá mak haraik-an sai protesaun ida ba Nabot nia família no belun sira?
9 Bainhira Nabot nia família no belun sira rona katak Akabe mate ona mak Akabe nia família sei hetan kastigu, karik neʼe koko tebes sira-nia fiar ba Maromak. Maibé hahalok haraik-an mak bele proteje sira atu iha fiar nafatin. Tanbasá? Tanba se sira mak hatudu haraik-an, neʼe sei ajuda sira atu kontinua adora Jeová hodi fiar katak Jeová nunka hatudu hahalok neʼebé la justisa. (Lee Deuteronômio [Ulangan] 32:3, 4.b) Iha mundu foun, Nabot nia família sei simu bensaun hodi haree fali Nabot ho ninia oan sira hetan moris-hiʼas. Neʼe sei sai justisa neʼebé loos ba Nabot ho ninia oan sira. (Jó [Ayub] 14:14, 15; João 5:28, 29) Ema neʼebé haraik-an fiar katak “Maromak loos sei tesi lia ba ema nia hahalok hotu, inklui mós hahalok sira neʼebé halo subasubar, atu deside se hahalok neʼe mak diʼak ka aat”. (Eclesiastes [Pengkhotbah] 12:14) Jeová haree ba buat hotu neʼebé ita la haree atu tesi lia ba ema. Tan neʼe, hahalok haraik-an bele proteje ita atu la lakon fiar ba Jeová.
10, 11. (a) Situasaun saida deʼit mak bele koko ita-nia fiar? (b) Iha dalan saida deʼit mak haraik-an bele proteje ita?
10 Ita sei halo saida se Ita la komprende irmaun katuas sira-nia desizaun ruma ka Ita la konkorda ho desizaun neʼe? Porezemplu, Ita sei halo saida se Ita ka ema ruma neʼebé Ita hadomi lakon knaar espesiál hodi serbí Jeová? Oinsá se Ita-nia kaben, ka oan, ka belun diʼak ruma hasai husi kongregasaun no Ita la konkorda ho desizaun neʼebé katuas sira halo? Ita sei halo saida se Ita fiar katak katuas sira halo desizaun la loos hodi hatudu laran-sadiʼa ba ema neʼebé monu ba sala? Situasaun sira-neʼe bele koko ita-nia fiar ba Jeová no dalan neʼebé nia organiza kongregasaun ohin loron. Oinsá mak hahalok haraik-an bele proteje ita se ita hasoru situasaun sira-neʼe? Mai ita koʼalia kona-ba dalan rua.
Ita sei halo saida se Ita rona katuas sira fó sai desizaun neʼebé Ita la konkorda? (Haree parágrafu 10, 11)
11 Primeiru, ita sei rekoñese katak ita la hatene buat hotu kona-ba situasaun ruma. Maski ita sente katak ita hatene, maibé só Jeová deʼit mak bele hatene kona-ba ema nia laran. (1 Samuel 16:7) Se ita komprende didiʼak kona-ba neʼe, ita sei rekoñese katak ita iha duni limitadu no ita presiza atu hadiʼa ita-nia hanoin. Segundu, se ita haree ka hasoru situasaun neʼebé la justisa, haraik-an bele ajuda ita atu halo tuir nafatin Jeová no hein ho pasiénsia ba nia atu hadiʼa situasaun neʼe. Bíblia dehan: “Ema sira neʼebé hamtaʼuk Maromak loos, ikusmai sei hetan buat diʼak”, maibé ba ema aat, sira ‘sei la hetan buat diʼak, no sira mós la bele hanaruk sira-nia moris’. (Eclesiastes [Pengkhotbah] 8:12, 13) Se ita mak hatudu nafatin haraik-an, neʼe sei ajuda ita no mós ema seluk neʼebé envolve iha situasaun neʼe.—Lee 1 Pedro 5:5.
LARAN-MAKEREK IHA KONGREGASAUN
12. Ita sei koʼalia kona-ba akontesimentu saida, no tanbasá?
12 Iha apóstolu sira-nia tempu, situasaun ida mosu ba ema kristaun iha Antiokia, rai-Síria, no neʼe koko tebes sira-nia haraik-an no dalan neʼebé sira fó perdua. Mai ita haree toʼok saida mak akontese no oinsá mak akontesimentu neʼe bele ajuda ita hanoin didiʼak kona-ba dalan neʼebé ita fó perdua. Akontesimentu neʼe mós bele ajuda ita atu komprende kona-ba Jeová nia justisa liuhusi dalan neʼebé nia uza ema la perfeitu sira.
13, 14. Apóstolu Pedro halaʼo knaar saida deʼit, no oinsá mak nia hatudu katak nia aten-brani?
13 Iha apóstolu Pedro nia tempu, ema kristaun barak koñese nia. Nia mak Jesus nia belun diʼak no halaʼo knaar importante balu. (Mateus 16:19) Porezemplu, iha tinan 36, nia simu knaar ida hodi haklaken ba Cornélio ho ninia umakain. Tanbasá mak knaar neʼe espesiál tebes? Tanba Cornélio laʼós ema judeu, maibé ema jentiu neʼebé seidauk hetan sirkunsizaun. Bainhira espíritu santu tun ba Cornélio ho ninia umakain, Pedro hatene katak sira bele hetan batizmu hodi sai ema kristaun. Pedro dehan: “Ema sira-neʼe simu ona espíritu santu hanesan ita, tan neʼe sé mak bele bandu sira atu labele hetan batizmu ho bee?”—Apóstolu 10:47.
14 Iha tinan 49, apóstolu ho katuas sira iha Jeruzalein halibur hamutuk hodi koʼalia kona-ba ema jentiu sira neʼebé sai ona kristaun presiza duni ka lae atu hetan sirkunsizaun. Iha enkontru neʼe, ho aten-brani Pedro fó-hanoin ba irmaun sira katak nia haree ho matan rasik oinsá espíritu santu mós tun ba ema jentiu sira neʼebé seidauk hetan sirkunsizaun. Tanba Pedro nia esperiénsia neʼe mak ajuda grupu administradór foti sira-nia desizaun. (Apóstolu 15:6-11, 13, 14, 28, 29) Karik ema kristaun judeu no jentiu sira agradese tebes ba Pedro nia aten-brani hodi koʼalia sai ninia esperiénsia neʼe. Ita bele fiar katak fasil ba ema kristaun sira iha tempu neʼebá atu tau fiar ba nia nuʼudar ema neʼebé laran-metin no maduru!—Ebreu 13:7.
15. Bainhira Pedro vizita Antiokia, nia halo sala saida? (Haree dezeñu iha pájina 23.)
15 Enkontru iha Jeruzalein liutiha, Pedro bá vizita Antiokia iha Síria. Bainhira nia iha neʼebá, nia ransu ho irmaun jentiu sira. Ita bele fiar katak irmaun sira kontente tebes hodi bele aprende husi Pedro nia matenek no esperiénsia. Maibé karik sira hakfodak no sente laran-kanek tebes tanba derrepente Pedro la han hamutuk tan ho sira. No Pedro mós book ema kristaun judeu seluk, inklui Barnabé atu halo tuir nia. Tanbasá mak Pedro, katuas kongregasaun neʼebé maduru, halo sala boot neʼebé bele fahe kongregasaun? Importante liu mak, saida mak ita bele aprende husi situasaun neʼe hodi ajuda ita se katuas ida koʼalia ka halo buat ruma neʼebé hakanek ita?
16. Pedro hetan konsellu saida, no neʼe hamosu pergunta saida deʼit?
16 Lee Galásia 2:11-14. Pedro taʼuk ba ema. (Provérbios [Amsal] 29:25) Nia hatene Jeová nia haree kona-ba ema jentiu sira. Maski nuneʼe, nia taʼuk ema kristaun judeu sira husi Jeruzalein neʼebé hetan ona sirkunsizaun sei hanoin oinsá kona-ba nia se sira hatene katak nia ransu ho ema kristaun jentiu. Iha Antiokia, apóstolu Paulo hatete ba Pedro katak nia laran-makerek. Tanbasá? Tanba Paulo rasik rona oinsá Pedro defende ema jentiu iha enkontru neʼebé halaʼo iha Jeruzalein iha tinan 49. (Apóstolu 15:12; Galásia 2:13) Ema kristaun jentiu sira neʼebé sente laran-kanek halo saida? Sira husik situasaun neʼe halo sira sidi ka lae? Pedro sei lakon ninia knaar sira ka lae?
FÓ PERDUA
17. Oinsá mak Jeová nia perdua ajuda Pedro?
17 Pedro simu Paulo nia konsellu ho haraik-an. Eskritura la hatete katak Pedro lakon ninia knaar ruma. Maibé, ikusmai espíritu santu leno nia hakerek karta rua neʼebé sai parte ida ba Bíblia. Iha ninia karta segundu, nia bolu Paulo nuʼudar “ita-nia maluk doben”. (2 Pedro 3:15) Karik sala neʼebé Pedro halo hakanek tebes ema kristaun jentiu sira. Maibé kongregasaun nia ulun Jesus, kontinua uza Pedro. (Éfeso 1:22) Tuir loloos neʼe fó oportunidade ba irmaun-irmán sira iha kongregasaun atu banati-tuir Jesus no ninia Aman hodi fó perdua ba Pedro, ema neʼebé la perfeitu. Diʼak se la iha ema ida mak sidi kona-ba Pedro nia sala.
18. Iha situasaun saida deʼit mak ita presiza haleno Jeová nia hahalok justisa?
18 La iha katuas kongregasaun ida iha apóstolu sira-nia tempu mak ema perfeitu, no ohin loron mós lae. Bíblia dehan: “Ita hotu halo sala dala barak.” (Tiago 3:2) Fasil atu rekoñese katak ema la perfeitu, maibé se ita rasik mak hasoru situasaun neʼebé ema hakanek ita, ita sei halo saida? Ita sei haleno Jeová nia justisa ka lae? Porezemplu, Ita sei halo saida se Ita rona irmaun katuas ida koʼalia liafuan neʼebé hatudu katak nia fihir ema? Ita sei sidi ka lae, se irmaun katuas ida koʼalia la hanoin uluk hodi hakanek Ita-nia sentimentu? Ita sei hein ho pasiénsia ba kongregasaun nia ulun Jesus, duké hanoin kedas katak irmaun neʼe la serve atu sai katuas ka lae? Ita sei hanoin liu irmaun neʼe serbí Jeová ho laran-metin ba tinan barak ona duké haree deʼit ba ninia sala ka lae? Se irmaun ida mak halo sala hasoru Ita maibé kontinua serbí nuʼudar katuas ka nia simu tan knaar seluk, Ita sei sente kontente ba nia ka lae? Se Ita mak fó perdua ho laran, Ita hatudu duni katak Ita haleno Jeová nia hahalok justisa.—Lee Mateus 6:14, 15.
19. Ita hakarak atu halo saida?
19 Ita hotu hadomi hahalok justisa, tan neʼe mak ita hotu hein namanas ba tempu neʼebé Jeová sei halakon hahalok la justisa hotu neʼebé mai husi Satanás no ninia mundu aat neʼe. (Isaías [Yesaya] 65:17) Maibé antes tempu neʼe toʼo mai, se ita mak hasoru situasaun neʼebé la justisa, ita hakarak hatudu haraik-an hodi hanoin nafatin katak ita la hatene buat hotu kona-ba situasaun ruma, no fó perdua ho laran ba ema neʼebé halo sala hasoru ita. Se ita mak halo nuneʼe, ita hatudu katak ita haleno duni Jeová nia hahalok justisa.
a 1 Reis 21:1-3 1 Depois neʼe, buat ida akontese kona-ba Nabot, ema Jezreel nia toʼos-uvas; neʼebé iha Jezreel, besik iha Liurai Akabe nia palásiu iha Samaria. 2 Akabe hatete ba Nabot: “Fó ó-nia toʼos-uvas atu haʼu halo fali toʼos modo nian, tanba toʼos neʼe besik iha haʼu-nia uma. Depois haʼu sei troka fali toʼos-uvas neʼebé diʼak liu fali ó-nian. Ka se ó hakarak, haʼu sei fó fali osan tuir toʼos neʼe nia folin.” 3 Maibé Nabot hatete ba Akabe: “Iha Jeová nia haree la diʼak duni atu fó haʼu-nia beiʼala sira-nia liman-rohan ba Ita-Boot.”
b Deuteronômio 32:3, 4 3 Tanba haʼu sei fó sai Jeová nia naran. Mai ita fó-hatene kona-ba ita-nia Maromak nia forsa boot! 4 Nia neʼebé hanesan Fatuk, ninia serbisu mak perfeitu, tanba ninia dalan sira hotu mak loos. Maromak laran-metin, nia sempre hatudu justisa, nia iha hahalok loos no laran-loos.