Halo buat hotu tan evanjellu
1. Ita nuʼudar haklaken-naʼin hakaʼas an atu halo saida? Tanbasá?
1 Apóstolu Paulo sente katak nia tenkesér halaʼo ninia responsabilidade atu haklaken lia-foun diʼak ba ema seluk. (1 Kor 9:16, 19, 23) Hanesan Paulo, Ita mós hakaʼas an atu fahe lia-foun diʼak ba ema, tanba ita hakarak ajuda sira atu hetan moris haksolok ba nafatin.
2. Ita hakarak halo mudansa saida deʼit atu haklaken? Tanbasá?
2 Haklaken iha tempu no fatin neʼebé bele hetan ema: Peskadór neʼebé matenek la buka tempu no fatin neʼebé diʼak liu ba nia, maibé buka tempu no fatin neʼebé diʼak atu hetan ikan barak. Nuʼudar “peskadór ema nian”, karik ita mós presiza atu halo mudansa ruma atubele hetan ema barak liu iha haklaken-fatin. Hodi halo nuneʼe, ita bele haksolok ho ita-nia knaar espesiál atu halibur “ikan sira, kiʼik no boot”. (Mt 4:19; 13:47) Ita bele haklaken iha oras hanesan besik kalan atu hasoru ema neʼebé foin fila husi serbisu ka lae? Ita bele haklaken iha dalan iha dadeer-saan ka lae? Paulo hakarak “fó sasin ho didiʼak kona-ba lia-foun diʼak”, no nia laran-manas atu buka tempu atu halo nuneʼe.—Apos 17:17; 20:20, 24, MF.
3, 4. Kuandu haklaken, oinsá mak ita bele troka dalan neʼebé ita koʼalia? Hodi halo nuneʼe ita bele hetan rezultadu saida?
3 Koʼalia tuir ema nia interese: Peskadór presiza mós troka ninia kail no iska hodi hetan ikan neʼebé nia hakarak. Oinsá mak ita mós bele hatoʼo lia-foun diʼak Reinu nian iha dalan neʼebé kona ema oioin? Diʼak atu koʼalia kona-ba buat neʼebé bele dada ema nia atensaun no koʼalia iha dalan neʼebé hatudu respeitu. Diʼak atu husu pergunta atu hatene sira-nia hanoin, no rona didiʼak ba buat neʼebé sira hatete. (Prov 20:5; Tgo 1:19) Hodi halo nuneʼe, ita bele koʼalia iha dalan neʼebé book sira-nia laran. Nuneʼe ita tuir apóstolu Paulo nia ezemplu hodi sai “buat hotu ba ema hotu”. (1 Kor 9:22) Kuandu ita troka dalan neʼebé ita koʼalia hodi tuir ema ida-idak nia interese, ita bele hatoʼo lia-foun neʼebé kona sira-nia laran.
4 Ita sente haksolok atu hatoʼo “lia-foun diʼak kona-ba buat neʼebé diʼak liu” ba ema seluk! (Isa 52:7) Mai ita ‘halo buat hotu tan evanjellu’ atu bele haklaken Maromak nia liafuan ba ema barak.—1 Kor 9:23.