Hametin fali ita-nia relasaun diʼak ho Jeová

TINAN-TINAN, kongregasaun simu fali Jeová nia bibi-malae barak neʼebé nia hafolin tebes. Imajina toʼok kona-ba “ksolok boot iha lalehan” bainhira sira ida-idak fila fali ba nia. (Lc 15:7, 10) Se kongregasaun simu fali ona Ita, Ita bele fiar metin katak Jesus, anju sira no Jeová haksolok tebes. Maski nuneʼe, karik Ita sei hasoru susar oioin nuʼudar Ita hametin fali Ita-nia relasaun diʼak ho Jeová. Susar saida deʼit mak Ita sei hasoru? Saida mak bele ajuda Ita tahan?

SUSAR SAIDA DEʼIT MAK ITA SEI HASORU?

Irmaun-irmán barak kontinua luta hasoru hanoin negativu kuandu sira fila fali ba kongregasaun. Liurai David mós sente hanesan neʼe. Depois Jeová perdua David, David hatete: “Haʼu-nia sala sira barak tebes toʼo taka haʼu.” (Sal 40:12; 65:3) Bainhira fila fali ba Jeová, irmaun-irmán barak kontinua sente moe ka sente sala durante tinan barak. Irmán Isabellea neʼebé uluk kongregasaun hasai durante tinan 20, hatete: “Susar atu fiar katak Jeová perdua ona haʼu.” Se Ita sai laran-kraik, Ita-nia relasaun diʼak ho Jeová bele sai fraku fali. (Prov 24:10) Keta husik ida-neʼe akontese.

Irmaun-irmán balu hanoin barak kona-ba buat neʼebé sira presiza halo atu bele iha fali relasaun diʼak ho Jeová. Depois kongregasaun simu fali irmaun Antoine, nia hatete: “Haʼu haluha buat barak neʼebé uluk haʼu aprende ka halo antes kongregasaun hasai haʼu.” Sentimentu hanesan neʼe hanetik ema barak atu halo atividade espirituál oioin.

Porezemplu, kuandu uma ida sai aat tanba anin boot, karik uma-naʼin bele sai laran-taridu bainhira hanoin kona-ba tempu no serbisu barak neʼebé nia presiza halo atu harii fali ninia uma. Nuneʼe mós, se Ita-nia relasaun diʼak ho Jeová sai aat tanba sala sériu, karik Ita sente katak presiza halo buat barak tebes atu hadiʼa fali ida-neʼe. Maibé Ita la presiza halo ida-neʼe mesak.

Jeová konvida ita: “Agora mai, mai ita hadiʼa problema entre ita.” (Isa 1:18) Ita hakaʼas an ona atu “hadiʼa problema”, tan neʼe Jeová hadomi ita. Hanoin toʼok ida-neʼe: Tanba Ita fila fali ona ba Jeová, nia bele uza Ita-nia ezemplu atu hatudu katak Diabu mak bosok-teen.—Prov 27:11.

Ita hakbesik ona ba Jeová bainhira Ita fila fali ba nia, no nia promete atu hakbesik ba Ita. (Tgo 4:8) Maibé la toʼo atu fila fali deʼit ba kongregasaun, Ita mós presiza kontinua hametin Ita-nia domin ba Jeová, Ita-nia Aman no Belun. Oinsá?

HALO PLANU NEʼEBÉ ITA BELE KUMPRE

Koko atu halo planu neʼebé Ita bele kumpre. Karik Ita sei hanoin-hetan hanorin báziku neʼebé uluk Ita aprende kona-ba Jeová no mós Paraízu. Maibé Ita presiza haburas fali toman diʼak nuʼudar ema Kristaun, hanesan haklaken beibeik, tuir reuniaun sira no ransu ho irmaun-irmán sira. Hanoin toʼok kona-ba planu balu tuirmai.

Koʼalia beibeik ba Jeová. Ita-nia Aman Jeová komprende katak se Ita kontinua fó-sala ba Ita-nia an, neʼe bele halo susar ba Ita atu halo orasaun ba nia. (Rom 8:26) Maski nuneʼe, “keta kole atu halo orasaun”, no fó-hatene Jeová katak Ita hakarak tebes atu habelun ho nia. (Rom 12:12) Irmaun Andrej hatete: “Dala barak haʼu fó-sala ba haʼu-nia an no sente moe. Maibé depois haʼu halo orasaun, haʼu sente diʼak fali. Haʼu sente dame iha laran.” Se Ita la hatene atu halo orasaun kona-ba saida, haree toʼok orasaun neʼebé Liurai David halo depois nia arrepende an. Neʼe hakerek iha Salmo 51 no 65.

Estuda Bíblia beibeik. Neʼe sei ajuda Ita atu iha fiar neʼebé metin no haburas Ita-nia domin ba Jeová. (Sal 19:7-11) Irmaun Felipe hatete: “Uluk haʼu sai fraku no monu ba sala tanba haʼu la iha programa atu lee no estuda Bíblia beibeik. Haʼu lakohi tan repete sala neʼebé hanesan, tan neʼe haʼu hakaʼas an atu estuda Bíblia beibeik.” Ita mós bele halo buat neʼebé hanesan. Se Ita presiza ajuda atu hili tópiku atu estuda mesak, Ita bele husu belun neʼebé maduru.

Hametin fali Ita-nia relasaun belun ho irmaun-irmán sira. Ema balu neʼebé fila fali ba kongregasaun karik hanoin barak tanba sente katak ema seluk sei hirus sira. Irmán Larissa hatete: “Haʼu moe tebes. Haʼu sente hanesan haʼu hakanek ona irmaun-irmán sira-nia laran. Haʼu kontinua sente hanesan neʼe ba tempu kleur.” Hanoin-hetan katak katuas sira no irmaun-irmán sira neʼebé maduru hakarak tebes ajuda Ita atu hametin fali Ita-nia relasaun ho Jeová. (Haree kaixa “Oinsá katuas sira bele ajuda?”) Sira kontente tanba Ita fila fali ba Jeová, no sira hakarak Ita atu sente kontente.—Prov 17:17.

Saida mak bele ajuda Ita atu hakbesik liután ba kongregasaun? Tuir reuniaun sira no haklaken beibeik hamutuk ho irmaun-irmán sira. Neʼe lori benefísiu saida? Irmaun Felix hatete: “Irmaun-irmán sira hakarak tebes haʼu atu fila fali ba Jeová. Haʼu bele sente sira-nia domin. Sira ajuda haʼu sente katak haʼu mak parte ba kongregasaun, Jeová perdua ona haʼu no haʼu bele kontinua serbí Jeová.”—Haree kaixa “Saida mak Ita bele halo?”

KETA RENDE AN

Nuʼudar Ita hakaʼas an atu hametin Ita-nia relasaun diʼak ho Jeová, Satanás sei kontinua hamosu problema atu halo Ita-nia fiar sai fraku. (Lc 4:13) Sai prontu bá hodi hametin Ita-nia relasaun diʼak ho Jeová.

Jeová promete ba ninia bibi sira: “Haʼu sei buka bibi neʼebé lakon, haʼu sei lori fila bibi neʼebé laʼo sala dalan, haʼu sei falun bibi neʼebé kanek, no haʼu sei fó kmaan ba bibi neʼebé fraku.” (Eze 34:16) Jeová ajuda ona ema barak atu iha fali relasaun diʼak ho nia. Fiar metin bá katak Jeová mós hakarak atu ajuda Ita.