Ita prontu atu “simu rai nuʼudar liman-rohan” ka lae?

PRONTU ATU HALO MUNDU SAI PARAÍZU

Bainhira Jeová haruka ema atu “halo nakonu no domina rai neʼe”, nia hatudu katak ikusmai mundu tomak sei sai paraízu. (Gén 1:28) Ema neʼebé moris ba nafatin iha mundu presiza halo tuir mandamentu neʼe. Foufoun kuandu sira hahú sira-nia serbisu, mundu seidauk haree hanesan paraízu tanba jardín Eden la iha ona. Depois Armagedon, ita presiza halo serbisu barak atu hamoos área sira neʼebé ema estraga. Sei iha serbisu barak atu halo.

Neʼe halo ita hanoin kona-ba serbisu neʼebé ema Izraél tenke halo kuandu fila fali husi Babilónia. Durante tinan 70, ema la hela iha rai-Izraél. Maibé Isaias fó sai nanis katak ho Jeová nia ajuda, povu sei konsege halo rai neʼe haree furak fali. Isaias hatete: “Nia sei halo Siaun nia rai-fuik sai hanesan Eden no ninia rai-tetuk maran sira sai hanesan Jeová nia jardín.” (Isa 51:3) Ema Izraél hetan duni susesu. Nuneʼe mós iha futuru, ho Jeová nia ajuda, ema neʼebé simu rai sei hetan susesu atu halo rai sai fatin furak. No agora iha dalan oioin atu hatudu katak Ita hakarak halo serbisu neʼe iha futuru.

Dalan ida atu halo nuneʼe mak hodi hakaʼas an atu halo Ita-nia uma no jardín moos nafatin no la runguranga. Ita bele halo nuneʼe maski Ita-nia viziñu sira la moos. Ita mós bele ajuda atu hamoos no halo manutensaun ba Ita-nia Reuniaun-Fatin no Salaun ba Asembleia. Se Ita-nia situasaun permite, Ita bele prenxe formuláriu atu ajuda kuandu dezastre mosu. Neʼe hatudu katak Ita hakarak ajuda irmaun-irmán sira. Husu ba Ita-nia an: “Iha skill ruma neʼebé haʼu bele aprende agora no bele uza iha mundu foun ka lae?”

PRONTU ATU TAU MATAN BA EMA NEʼEBÉ MORIS HIʼAS

Depois Jesus halo Jairo nia oan-feto moris-hiʼas, Jesus hatete kedas katak ema tenke fó hahán ba joven neʼe. (Mc 5:42, 43) Karik fasil deʼit atu tau matan ba joven neʼebé tinan 12. Maibé klaru katak ita presiza halo serbisu barak bainhira Jesus kumpre ninia promesa: “Ema hotu neʼebé iha rate laran sei rona ninia lian no sai husi rate.” (João 5:28, 29) Maski Bíblia la fó sai informasaun espesífiku, maibé ita bele imajina katak ema neʼebé moris-hiʼas sei presiza ajuda atu hetan ai-han, hela-fatin no roupa. Oinsá mak Ita bele hatudu agora katak Ita hakarak sai prontu atu ajuda ema iha futuru? Hanoin toʼok pergunta balu tuirmai.

Bainhira iha avizu katak katuas área atu vizita Ita-nia kongregasaun, Ita konvida nia atu han hamutuk ka lae? Bainhira ema Betel simu knaar foun atu serbí fali iha Ita-nia kongregasaun ka katuas área para ona ninia knaar, Ita ajuda sira atu buka hela-fatin ka lae? Se organizasaun halaʼo reuniaun boot ka reuniaun boot espesiál iha Ita-nia área, Ita prontu atu ajuda irmaun-irmán sira seluk antes ka depois reuniaun boot ka lae?

PRONTU ATU HANORIN EMA NEʼEBÉ MORIS HIʼAS

Tuir Apóstolu 24:15, ita fiar katak ema millaun ba millaun sei hetan moris-hiʼas. Ema barak neʼebé hetan moris-hiʼas seidauk iha oportunidade atu koñese Jeová. Maibé depois sira moris hiʼas, sira sei hetan oportunidade neʼe.a Maromak nia atan sira neʼebé laran-metin no iha esperiénsia sei hanorin sira. (Isa 11:9) Irmán Charlotte neʼebé haklaken ona iha Europa, Amérika Súl no Áfrika hein namanas atu halo nuneʼe. Nia hatete: “Haʼu hein namanas atu hanorin ema neʼebé hetan moris-hiʼas. Bainhira haʼu lee kona-ba ema ruma neʼebé moris iha tempu uluk, dala barak haʼu hanoin: ‘Se uluk ema neʼe koñese Jeová, ninia moris sei la hanesan duni.’ Haʼu hakarak tebes atu hanorin sira kona-ba Jeová no oinsá sira-nia moris sei sai diʼak liu se sira serbí Jeová.”

Jeová nia atan sira neʼebé moris antes Jesus mai rai mós presiza aprende buat barak. Imajina Ita esplika ba Daniel kona-ba oinsá ninia profesia sai loos maski uluk nia la komprende. (Dan 12:8) Ka hanoin toʼok kona-ba Ita ajuda Rute no Noemi atu aprende katak Mesias mai husi sira-nia liña jerasaun. Ita sei sente kontente tebes tanba bele hanorin ema iha mundu tomak no ita sei la hasoru tan susar no problema sira neʼebé ita hasoru ohin loron.

Oinsá Ita bele hatudu agora katak Ita prontu atu hanorin ema neʼebé moris hiʼas? Dalan ida mak hodi hakaʼas an atu aumenta Ita-nia matenek atu hanorin no haklaken beibeik. (Mt 24:14) Maski Ita labele haklaken barak tanba Ita-nia idade ka limitasaun seluk, maibé Ita-nia hakaʼas an bele hatudu katak Ita prontu atu hanorin ema neʼebé simu moris-hiʼas.

Diʼak atu hanoin kona-ba pergunta importante tuirmai: Ita hein namanas atu simu rai nuʼudar liman-rohan ka lae? Ita hein namanas atu halo mundu sai paraízu no mós fó hela-fatin no hanorin ema neʼebé moris hiʼas ka lae? Ita bele hatudu katak Ita prontu atu moris ba nafatin iha rai hodi halo serbisu ohin loron neʼebé atu hanesan ho serbisu neʼebé Ita sei halo iha mundu foun.