Hulda kumpre ninia planu

TINAN balu liubá, iha irmán naʼin-tolu neʼebé halo serbisu hamutuk iha tasi-ibun iha illa Sangir Besar, iha Indonézia. Ema barak iha illa neʼe koñese sira tanba sira-nia serbisu haklaken no ajuda ema aprende Bíblia. Maibé sira mós halo serbisu seluk.

Primeiru, sira laʼo iha tasi no buka fatuk sira neʼebé todan no lori ba tasi-ibun. Fatuk balu mak boot hanesan bola. Tuirmai, sira tuur iha kadeira ai neʼebé kiʼik, no uza martelu hodi fera fatuk sira. Depois neʼe, sira tau fatuk sira-neʼe ba balde no lori ba sira-nia hela-fatin. Tuirmai, sira tau fatuk sira-neʼe iha saku boot sira hodi trek bele tula no uza nuʼudar materiál atu hadiʼa dalan.

Husi irmán naʼin-tolu, ida mak irmán Hulda. Tanba situasaun, irmán Hulda bele uza tempu barak atu halo serbisu neʼe. Baibain osan neʼebé nia hetan husi serbisu, nia uza atu tau matan ba ninia família nia presiza. Maski nuneʼe, nia mós hakarak rai osan balu ba buat seluk. Nia hakarak tebes atu iha tablet ida hodi bele asesu aplikasaun JW Library^®. Irmán Hulda hatene katak vídeo sira no informasaun seluk iha aplikasaun neʼe sei ajuda nia atu haklaken ho diʼak liután ba ema seluk, no ajuda nia atu komprende liután kona-ba Bíblia.

Atu bele rai osan, irmán Hulda halo serbisu estra. Durante fulan ida ho balu nia halo serbisu ba oras rua dadeer-dadeer, no nia fera fatuk barak toʼo bele halo nakonu trek kiʼik ida. Ikusmai, nia bele hetan osan natoon atu bele hola tablet.

Irmán Hulda hatete: “Maski haʼu sente kole no moras tebes tanba fera fatuk sira. Maibé bainhira haʼu uza tablet atu haklaken no prepara ba reuniaun iha dalan neʼebé fasil liu, neʼe halo haʼu haluha tiha moras neʼebé haʼu sente.” Nia mós hatete katak tablet neʼe ajuda ona nia atu kontinua tuir reuniaun no haklaken durante tempu pandemia. Ita kontente tanba irmán Hulda kumpre ninia planu.