PERGUNTA HUSI JOVEN SIRA
Saida mak haʼu bele halo atu haʼu-nia inan-aman tau fiar mai haʼu?
Buat neʼebé Ita presiza hatene
Liuhusi Ita-nia hahalok, hatudu katak ema bele duni tau fiar ba Ita. Halo tuir inan-aman sira-nia regra mak hanesan ho selu Ita-nia debe iha banku. Ita presiza halo tuir Ita-nia inan-aman, no se Ita halo tuir sira beibeik, sira sei tau fiar ba Ita no tuirmai sira sei fó liberdade liután ba Ita. Maibé, se liuhusi Ita-nia hahalok Ita hatudu katak sira labele tau fiar ba Ita, entaun keta hakfodak se sira hamenus Ita-nia liberdade.
Ita-nia inan-aman presiza tempu atu bele tau fiar ba Ita. Hatudu beibeik ba Ita-nia inan-aman katak Ita mak ema neʼebé hatene atu kaer responsabilidade. Hodi halo nuneʼe, Ita-nia inan-aman bele fó liberdade liután ba Ita.
ESPERIÉNSIA: “Kuandu haʼu joven, haʼu hatene buat neʼebé haʼu-nia inan-aman hakarak haʼu atu halo. Maibé haʼu finje deʼit halo tuir sira. Loloos, iha sira-nia kotuk, haʼu halo tuir deʼit haʼu-nia hakarak. Ida-neʼe halo haʼu-nia inan-aman susar atu tau fiar ba haʼu. Ikusmai haʼu komprende katak iha dalan ida deʼit atu bele hetan liberdade liután husi ita-nia inan-aman. Ita presiza hatudu laran-moos no labele bosok sira. Liuhusi ita-nia hahalok ita presiza hatudu katak ema bele tau fiar ba ita.”—Craig.
Buat neʼebé Ita bele halo
Keta bosok, maski neʼe lori susar ba ita. Ema hotu halo sala, maibé se Ita koko atu subar Ita-nia sala hodi bosok ka la fó sai informasaun hotu, ida-neʼe sei halo Ita-nia inan-aman la tau fiar ba Ita. Maibé, se Ita hatudu beibeik katak Ita la bosok kona-ba Ita-nia sala, Ita-nia inan-aman bele haree katak Ita mak ema neʼebé maduru. Ema hanesan mak ema bele tau fiar.
“Dala ruma ema la tau fiar ba ita, laʼós tanba ita halo sala, maibé tanba ita koko atu subar ita-nia sala.”—Anna.
Bíblia hatete: “Ami hakarak atu hatudu laran-moos iha buat hotu.”—Ebreu 13:18.
Hanoin toʼok: Bainhira Ita-nia inan-aman husu Ita atu bá neʼebé no atu halo saida, Ita fó sai informasaun hotu ho loloos ba sira ka lae? Ka bainhira Ita fila ba uma no Ita-nia inan-aman husu Ita husi neʼebé no ohin halo saida, Ita ho neon lakohi fó-hatene sira ka lae?
Sai ema neʼebé hatene kaer responsabilidade. Halo tuir Ita-nia inan-aman nia regra sira. Halo kedas Ita-nia serbisu uma-laran nian. Tuir oras bainhira ita atu bá fatin ruma. Halo ho didiʼak Ita-nia TPC. Sempre fila ba uma tuir oras neʼebé Ita-nia inan-aman deside ona.
“Se ita-nia inan-aman fó lisensa ba ita atu sai ho belun sira no husu ita atu fila ba uma antes tuku 9 kalan, ita labele fila ba uma iha tuku 10 ho balu no espera katak loron seluk sira sei husik ita sai hamutuk ho ita-nia belun.”—Ryan.
Bíblia hatete: “Ema ida-idak sei lori ninia todan rasik.”—Galásia 6:5, nota-rodapé.
Hanoin toʼok: Baibain Ita hatudu hahalok hanesan saida? Ita sempre tuir oras, halo hotu Ita-nia serbisu uma-laran nian no halo tuir Ita-nia inan-aman nia rega maski la gosta ka lae?
Hatudu pasiénsia. Se Ita halo ona sala ruma no Ita-nia inan-aman la tau fiar ona ba Ita, presiza tempu atu sira bele tau fiar fali ba Ita. Sai prontu atu hein.
“Haʼu sente estrese bainhira haʼu-nia inan-aman la fó tan liberdade ba haʼu kuandu haʼu-nia tinan aumenta. Haʼu seidauk komprende katak idade aumenta la dehan katak haʼu mak ema maduru. Haʼu husu ba haʼu-nia inan-aman atu fó oportunidade ba haʼu atu prova katak sira bele tau fiar mai haʼu. Presiza tempu, maibé ikusmai haʼu hetan rezultadu diʼak. Haʼu komprende katak inan-aman hatudu fiar ba ita tanba ita hatudu hahalok maduru, laʼós tanba ita-nia idade aumenta.”—Rachel.
Bíblia hatete: “Fó prova katak imi halo tuir iha buat hotu ka lae.”—2 Korinto 2:9.
Hanoin toʼok: Atu Ita-nia inan-aman bele tau fiar ba Ita, saida mak Ita bele halo atu ‘prova katak Ita halo tuir’?
SUJESTAUN: Halo planu ida, kona-ba sempre tuir oras, halo hotu Ita-nia serbisu uma-laran nian, fila ba uma tuir oras neʼebé Ita-nia inan-aman deside ona ka buat seluk tan. Fó-hatene Ita-nia planu ba Ita-nia inan-aman no husu sira kona-ba buat neʼebé Ita presiza halo atu sira bele tau fiar ba Ita. Tuirmai hakaʼas an atu halo tuir Bíblia nia konsellu: “Hasai tiha hahalok tuan, katak imi-nia moris uluk nian.” (Éfeso 4:22) Neineik-neineik Ita-nia inan-aman sei haree oinsá Ita laʼo ba oin.