LESOGNE 10
Akore ty Amantara’o ty Fivavahagne Maregne?
1. Fire ty fivavahagne maregne?
“Mitaoa amy ty mpaminany sandoke.”—MATIO 7:15.
Raike avao ty fivavahagne nampianare i Jesosy, le izay ty fivavahagne maregne. Nampitovize’e tamy ty lalagne mandeha mbamy i havelogne nainai’ey mbeo ty fivavahagne maregne, sady “tsiampe avao ty mahatrea aze.” (Matio 7:14) Ty fivavahagne magnorike ty hamarenagne agnate ty Saontsin’Andrianagnahare ao avao ro eken’Andrianagnahare. Mitovy ty raha inoa ty Kristiana iaby magnorike ty fivavahagne maregne, ndra aia ndra aia ty tane misy aze.—Vakio Jaona 4:23, 24; 14:6; Efesianina 4:4, 5.
Henteo ty video Eken’Andrianagnahare Iaby vao ze Kila Fivavahagne?
2. Inogne ty fampitaoa i Jesosy?
“Mirehake agnatreha o ndaty maro ho mahafantatse an’Andrianagnahare iareo, faie mandietse aze amy ty atao’e.” —TITOSY 1:16.
Nampitao ty Jesosy tie hisy mpaminany sandoke, sare miseho ho Kristiana. Akore ty amantaragne tie ia ro maregne, sady ia ro diso? Ty Kristiana maregne avao ro maneho toetse soa naho manao ty soa, sady tsy mietake zay.—Vakio Matio 7:13-23.
3. Akore ty amantaragne ty Kristiana maregne?
Intoagne ty raha dime amantaragne ty Kristiana maregne:
Eke iareo fa Saontsin’Andrianagnahare ty Baiboly. Magnorike ty toro lala ty Baiboly iareo, fa tsy manahake ty fivavahagne mampianatse ty heve o ndatio avao. (Matio 15:7-9) Mampihatse ze raha torie iareo ka iareo, fa tsy tihoe hafa ty raha ampianare’e, le hafa ty raha atao’e.—Vakio Jaona 17:17; 2 Timoty 3:16, 17.
Magnaja ty tahinan’Andrianagnahare tihoe Jehovah iareo. Nampahafantare i Jesosy o tahinagne iohoe. Nitory ty miomba i Jehovah reke, sady nampianatse o ndatio hivavake mba hagnamasinagne ty tahinan’Andrianagnahare. (Matio 6:9) Ia amy ty fivavahagne amy ty tanàgne misy azo ty mampianatse tie i Jehovah ty tahinan’Andrianagnahare?—Vakio Jaona 17:26; Romanina 10:13, 14.
Mitory ty miomba ty Fanjakàn’Andrianagnahare iareo. Nirahen’Andrianagnahare hitory ty talily soa miomba i Fanjakagney ty Jesosy. O Fanjakagne iohoe avao ro tamaegne hagnafake ze raha manahiragne an-tane etoy. Nitory miomba o fanjakagne iohoe avao ty Jesosy ampara-pahafate’e. (Lioka 4:43; 8:1; 23:42, 43) Nirahe’e hitory ty miomba izay ka i mpiana’e rey. Naho misy ndaty manomboke mirehake ama’o ty miomba ty Fanjakàn’Andrianagnahare, va’e ho boake amy ty fivavahagne inogne koahe ty misy aze?—Vakio Matio 24:14.
Tsy agnisa ty tontolo raty toy iareo. Tsy militse amy ty polotike ndra mifandietse amy ty mpiharo tanàgne ama’e ty mpanonjohy ty lia i Jesosy. (Jaona 17:16; 18:36) Tsy mitsikombe ty fomba raty, ndra ty toetse raty ty ndaty amy ty tontolo toy ka iareo.—Vakio Jakoba 4:4.
Mifankatea vata’e iareo. Tsy malaigne karaza o ndaty iareo, satria nianara’e amy Baiboly ao fa mitovy ty ndaty iaby. Fitrea mateteke tihoe manohagne o alio ty fivavahan-diso. Faie tsy militse amy ty aly ndra manohagne aly ty Kristiana maregne. (Mika 4:1-3) Mahafoe tegna iareo, le mampiasa ty fanagna’e naho ty fotoa’e mba hagnampeagne naho hampaherezagne ty hafa.—Vakio Jaona 13:34, 35; 1 Jaona 4:20.
4. Hai’o vao ty mamantatse ty fivavahagne maregne?
Akore ty heve’o? Ia ty fivavahagne mampianatse ty raha rehafe ty Baiboly, sady magnaja ty tahinan’Andrianagnahare? Ia ka ty mitory fa ty Fanjakàn’Andrianagnahare raike avao ro afake magnafoagne ty raha manahiragne an-tane etoy? Ia ka ty fitambara o ndaty mifankatea sady tsy militse amy ty aly?—Vakio 1 Jaona 3:10-12.