Nifily Apostoly 12 ty Jesosy

Nisy fanapahan-kevetse lahibey natao i Jesosy, tao’e raike tsy tapa’e tafara ty nitoria’e tan-tane etoy. Ia ty finili’e hiharo asa ama’e mateteke? Ia ty nampiofagne’e hitarike ty fiangonagne kristiana? Nipay ty fitariha i Jehovah ty Jesosy taloha ty ho nanoa’e o fanapahan-kevetse reo. Nandeha tam-bohitse agne irery reke naho fa nihariva, le nivavake tagne avao tamy i halegney. Naho fa nimaraindraigne, le navori’e ty mpiana’e ila’e, le nifily apostoly roe amby folo tamy iareo reke. Ia ty agnara iareo naho tsiaro’o? Itoagne iaby ty agnara iareo: I Petera, i Andrea, i Jakoba, i Jaona, i Filipo, i Bartolomeo, i Tomasy, i Matio, i Jakoba ana i Alfeo, i Tadeo, i Simona naho i Jodasy Iskariota.

Niarake tamy i Jesosy avao o apostoly roe amby folo reo. Naho fa nivita ty fampiofagna i Jesosy iareo, le nirahe’e hitory amy izay iareo. Nimea i Jehovah hery ka iareo, le afake nagnasitragne ty marare naho namoake demonia.

Natao i Jesosy namagne o apostoly roe amby folo reo sady natokisa’e. Faie nambanembane o Fariseò iareo, fa nao zao ndaty tsotra sady tsy nahita fianaragne. Faie nampiofàgne i Jesosy hahay soa ty asa nampanoegne aze iareo. Niarake tamy i Jesosy avao iareo ndra tamy ty fotoagne sarotse tamy ty fiaigna’e, ndra tafara ty namelomagne aze. Maro tamo o apostoli’e reo ka ty boake a Galilia agne manahake i Jesosy. Nanambaly ka ty ila’e.

Tsy voririke o apostoly reo, le nanao fahadisoagne avao ka. Nisy fotoagne iareo tsy nandineke soa, le nanao fanapahan-kevetse tsy mete, tsy nanam-paharetagne sady nifamale tie ia ty bey. Faie ndaty soa naho tea i Jehovah iareo. Iareo ka ty hitarike o fiangonagne kristianao naho fa tsy ho eo ty Jesosy.