Toriteny Tam-bohitsey

Nimbamy ty vohitse raike ty Jesosy tafara ty nifiliana’e o apostoly 12 reo. Ndaty maro ty nandigne aze tamy izay. Nisy ty boake a Galilia agne, Joda, Tyro, Sidona, Syria naho ty tanàgne an-dafe i Jordana ey. Nindesegne tamy i Jesosy teo iaby ze ndaty narare naho nampijalé ty demonia mba hositragne’e. Tafara izay, le nitoboke tam-bohitse eo reke, le nampianatse o ndatio ty raha toko’e hatao mba ho naman’Andrianagnahare. Mila mahafantatse i Jehovah naho tea aze zao tika. Tsy tea Aze tika naho malaigne ndaty. Toko’e ho soa fagnahy amy ty ndaty iaby tika ndra amy ty ndaty malaigne antika.

Hoe ty Jesosy: ‘Tsy ampe tihoe tea namagne. Fa toko’e ho tea ty fahavalo’o naho hamela ty fahadisoa o ndaty ka rehe. Le avy le manoa ajafady naho nahaboseke ndaty ty raha natao’o. Anò mitovy amy ty fomba teà’o hindesagne azo ty fomba indesa’o ty hafa.’

Nagnomey torohevetse miomba ty fanagnagne ka ty Jesosy. Hoe reke: ‘Sarobily mihoatse ty drala maro ty firagnetagne amy i Jehovah. Va’e hangalare o ndaty ty drala’o, fa tsy ho vita’e ty hangalatse ty fifandrambesa’o amy i Jehovah. Ko minekoneko amy ze raha hohane’o, ndra hinome’o, ndra ty akanjo hagnisia’o. Dineho o vorogneo. I Jehovah ty magnomey hanegne hoahy iareo. Tsy hahavita hagnalava ty androm-piaigna’o rehe ndra tie minekoneko.’

Mbe tsy nahatrea ndaty nirehake manahake i Jesosy i ndaty maro rey. Tsy nampianatse iareo ty mpitarike fivavahagne tamy izay. Ino ty nahavy i Jesosy nahay nampianatse? Satria boake amy i Jehovah ze raha nampianare’e.