3 Vavake manao Akore ty Janjignen’Andrianagnahare?

MARO ty fivavahagne mamepetse ty pozy toko’e hatao ndra ty rehake toko’e ho rehafegne ndra ty fombafomba orihegne naho fa mivavake. Faie lahibey noho izay ze ampifantohe ty Baiboly antikagne.

Rehafe ty Baiboly fa nivavake tamy ty toeragne sambe hafa ty mpanompon’Andrianagnahare tsy nivalike, sady sambe hafa ty pozy iareo tamy izay. Nisy ty nivavake am-po ao avao sady nisy ty nirehake ty aze, arakarake ty raha nisy aze. Nisy ka ty niandrandra i lagnitsey, le nisy ka ty niondreke. Tsy nampiasa sare ndra sapilé ndra boke iareo, fa nivavake boake am-po’e ao tamy ty fireha’e. Faie nagnino ro nijanjignen’Andrianagnahare ty vavake natao iareo?

Arake ty nitreantikagne taloha teo, le i Jehovah raike avao ty nivavaha iareo. Faie misy raha lahibey hafa ka. Hoe ty 1 Jaona 5:14: “Izao ty atokisantikagne an’Andrianagnahare: Ndra inogn’inogne angatahentikagne naho fa mifanandrife amy ty zoton’arofo’e, le mijanjigne antikagne reke.” Toko’e hifagnarake amy ty zoton’arofon’Andrianagnahare areke ty vavake ataontikagne. Ino ty dika izay?

Mila mahafantatse ty zoton’arofon’Andrianagnahare tika mba hahavy antikagne hanao vavake mifagnarake amy ty zoton’arofo’e. Tena ilaegne areke ty mianatse Baiboly. Midika vao zay fa tsy hijanjigne antikagne ty Andrianagnahare, naho tsy manam-pahaiagne miomba ty Baiboly tika? Aha’a. Tean’Andrianagnahare hamantatse ty zoton’arofo’e avao tika, sady hanao raha mifagnarake amy izay. (Matio 7:21-23) Toko’e hanao vavake mifagnarake amy ty raha ianarantika areke tikagne.

Hanam-pinoagne tika naho mahafantatse ty miomba i Jehovah naho ty zoton’arofo’e. Hoe ty Jesosy: “Ho azo’areo ze raha angatahe’areo am-bavake, naho manam-pinoagne nareo.” (Matio 21:22) Faie tsy midika zay tie minomino fahatane avao ty atao tihoe mino. Midika io fa tena misy ty raha raike ndra tie tsy trea maso aza, satria misy porofo mazava soa magnamaregne izay. (Hebreo 11:1) Misy porofo maro ty amy Baiboly ao mampiseho fa ndra tie tsy trea maso aza ty Jehovah, le tena misy, azo atokisagne, sady vognogne hamale ty vavake atao ze mino aze. Afake mangatake lognandro amy i Jehovah mba hampitombo ty finoantika tikagne, sady fale reke hagnomey ze raha ilaentikagne.—Lioka 17:5; Jakoba 1:17.

Hoe ka ty Jesosy miomba ty vavake: “Tsy misy mahazo mandeha mbaman-dRaeko mbeo naho tsy amy ty alalako.” (Jaona 14:6) Amy ty alala i Jesosy ty ahafahantikagne mifandrambe amy i Jehovah Raentikagne. Nirehake tamy i mpanonjohy ty lia’e rey ty Jesosy fa toko’e hatao amy ty agnara’e ty vavake atao iareo. (Jaona 14:13; 15:16) Tsy tihoe zay tie toko’e hivavake amy i Jesosy tikagne. Midika io fa mivavake amy ty agnara i Jesosy tika, le mitadidy fa noho i Jesosy ty ahafahantikagne mifandrambe amy i Raentikagne masigne naho voririkey.

Faie nirehake ka i mpanonjohy ty lia i Jesosy rey tie: “O Tompo, mba ampianaro mivavake zahay.” (Lioka 11:1) Tsy i raha vaho nidinehentikagne teo rey ty tea iareo ho fantaregne fa tihoe: ‘Ino ty toko’e ho rehafegne naho fa mivavake?’