5 Ombia Tikagne ro Toko’e Hivavake?

MAGNIZINGIZIGNE ty fivavahagne ila’e fa ilaegne ty managne tragno fara’e fanjaka mba hivavahagne. Farita iareo ka ty fotoagne toko’e hivavahagne. Misy fotoagne naho toeragne manokagne rehafe ty Baiboly vao tie toko’e hivavahagne?

Maregne aloha fa mirehake ty Baiboly tie, ilaegne ty mivavake amy ty fotoagne ila’e. Nisaotse an’Andrianagnahare ohatse ty Jesosy, taloha ty nihinana iareo amy i mpiana’e rey. (Lioka 22:17) Niarake nivavake ka i mpiana’e rey naho fa niarake nanao fotoam-pivavahagne. Raha fanoegne amy i Synagogay ao zay, le nitohiza iareo avao. Fa fanoegne ka zay tamy i tempoly ta Jerosalema taoy, i “tragno fivavahagne” nataon’Andrianagnahare “hoahy ze fivavahagne iabỳ.”—Marka 11:17.

Afake mahazo valem-bavake ka vao ty mpanompon’Andrianagnahare amy izao, naho fa mivory sady miarake mivavake? Fale ty Andrianagnahare naho miharo saigne iareo, sady manao vavake mifagnarake amy ty toro lala ty Soratse Masigne. Va’e handrisike an’Andrianagnahare hanao ty raha tsy nieretserete iareo ty vavake atao iareo. (Hebreo 13:18, 19) Mivavake tsy tapake ty Vavolombelo i Jehovah naho fa mivory, le manasa azo aman-katea mba ho avy agne mba hitsanogne ty vavake atao iareo.

Faie tsy mirehake ty Baiboly tie, misy fotoagne ndra toeragne manokagne toko’e hivavahagne. Treantikagne tamy Baiboly ao fa nivavake taman’Andrianagnahare ty mpanompo’e, tamy ze fotoagne iaby, naho tamy ty toeragne iaby. Nirehake ohatse ty Jesosy tie: ‘Naho fa mivavake rehe, le miziliha an-tragno’o ao, naho fa narindri’o i lalagney, le mivavaha amy i Rae’o amy i toeragne mietakey aoy rehe. Le hamale soa azo ty Rae’o, i mivazoho azo amy i toeragne mietakey aoy.’—Matio 6:6.

Tsy mahafinaritse vao zay? Afake mirehake mitokagne amy i Mpanjaka ze kila rahay rehe, ndra ombia ndra ombia sady azo antoke fa hijanjigne azo reke. Tsy mahagaga naho nivavake mitokagne mateteke ty Jesosy. Nivavake tagnate ty halegne raike reke tie indraike, mba hahazoa’e tari-dalagne miomba ty fanapahan-kevetse lahibey raike natao’e.—Lioka 6:12, 13.

Mirehake ka ty Baiboly fa nisy lahilahy naho ampela nivavake naho fa nitendreke olagne ndra fanapahan-kevetse lahibey. Kindraike iareo nivavake am-po ao avao, le kindraike ka nirehake naho fa nivavake. Nivavake niarake tama o ndaty maromaro iareo ndra nivavake irery. Faie ty tena lahibey le tihoe, nivavake iareo. Mandrisike antikagne ty Andrianagnahare tie: “Mivavaha lognandro.” (1 Tesalonianina 5:17) Bey hatea reke le vognogne hijanjigne lognandro ze manao ty zoton’arofo’e.

Faie maro ty ndaty matoky tie, hahasoa aze ty mivavake. Le tena hagnampe aze vata’e vao ty vavake?