Mahasoa Vao ty Fihisagne Atao’o?
“Fantaro soa lognandro ze ankasitraha i Tompo.”—EFES. 5:10.
1, 2. a) Akore ty ampisehoa ty Baiboly fa tea i Jehovah hankamamy o fiaignagneo tikagne? b) “Fagnomezagne boake aman’Andrianagnahare” o fihisagneo, ino areke ty toko’e hataontikagne?
REHAFE ty Baiboly fa tea i Jehovah hankamamy o fiaignagneo tikagne fa tsy tihoe ho velogne avao. Rehafe ty Salamo 104:14, 15, ohatse fa i Jehovah ty mahavy o “taneo hamokatse hanegne naho divay hampifale ty fo o ndatio.” Ireke ka ty magnomey ‘menake mba hampalamalama ty tarehe o ndatio’ naho ‘hanegne hampifalefaleagne.’ I Jehovah ka ty mampitiry o raha mitirio mba hahazoantikagne voa naho menake vaho divay. Maregne fa tsy tena ilaegne mba hahavelogne o divaio, faie ‘mampifalefale ty fo.’ (Mpito. 9:7; 10:19) Tea i Jehovah ho ‘fale’ areke ty fontikagne.—Asa. 14:16, 17.
2 Tsy toko’e hagnamelo-tegna tikagne naho fa manokagne fotoagne handinehagne o “vorogne mitiligneo” naho o “folera an-teteke” ey io, ndra manao raha hafa mahafinaritse naho mamelombelogne antikagne. (Mat. 6:26, 28; Sal. 8:3, 4) “Fagnomezagne boake aman’Andrianagnahare” o hafaleagne tsapantikagne amy ty fiaignagneo. (Mpito. 3:12, 13) Agnisa ze fagnomezagne zay o fihisagneo, le toko’e hampifale an’Andrianagnahare tikagne naho fa mihisa.
Mahaia Mifily Fihisagne
3. Nagnino ro afake manao ze fihisagne tea’e ty tsikiraidraike?
3 Naho mahay manahatsahatse tikagne, le fantantikagne fa afake mifily ze fihisagne tea’e hatao ty tsikiraidraike, sady ekentikagne ka fa tsy voatere ho mete iaby naho fa fihisagne. Nagnino vata’e ro tsy mitovy ty fihisagne filie o ndatio? Eretsereto moa o hanegneo. Ty hanegne tea o ndaty amy ty tane raike, le va’e tsy ho tea o ndaty amy ty tane hafa agne. Hoe izay ka fa ty fihisagne tea ty Kristiana amy ty tane raike, le va’e tsy ho tea ty Kristiana amy ty tane hafa agne. Ndra o Kristiana miara-mipetrake amy ty faritse raikeo aza, le va’e tsy hitovy ty raha tea’e. Misy ohatse ty mahatsapa fa mahafinaritse ty mamaky boke, faie ty hafa mieretseretse tie mahakamo ty mamaky boke. Misy ka ty mahatsapa fa mahafinaritse ty mandehandeha amy ty bisikileta, faie va’e hohevere ty hafa ho mandrerake zay. Maro ty karazagne fihisagne, sady sambe managne ty teantikagne tika, le sambe afake mifily ze tea’e hatao.—Rom. 14:2-4.
4. Nagnino tikagne ro mila mahay mifily fihisagne? Hazavao amy ty ohatse.
4 Maregne fa afake mifily ze fihisagne teantikagne tika. Faie tsy midika zay tie afake manao ze teantikagne iaby tika. Eretsereto i ohatse miomba ty hanegney. Va’e ho tea mihinagne hanegne sambe karaza’e tikagne, faie tsy hihinagne hanegne simba. Ndaty tsy le misaigne soa ty manao izay, sady va’e hamparare i hanegney. Hoe izay ka fa va’e ho tea mihisa fihisagne sambe karaza’e tikagne, faie tsy toko’e hifily fihisagne magnoho-doza, misy aly, ndra manimba findesam-batagne. Mifanohetse amy ty toro lala ty Baiboly zay, sady magnoho-doza ty fahasalamantikagne naho ty fifandrambesantikagne amy i Jehovah. Mila mahay mifily fihisagne areke tikagne. Toko’e ho fantarentikagne mialoha naho tena soa i fihisagne mahafinaritse antikagney. (Efes. 5:10) Akore ty hanoagne izay?
5. Akore ty ahafantarantikagne fa mampifale i Jehovah ty fihisagne ataontikagne ndra tsy mampifale aze?
5 Toko’e hifagnarake amy ty fitsipike amy ty Saontsin’Andrianagnahare ao ty fihisagne ataontikagne, naho teantikagne hahasoa antikagne sady hampifale i Jehovah. (Sal. 86:11) Magnampe antikagne hahay hanapa-kevetse ty fanoagne lisita tsotra misy ty fagnonteneagne retoa: Inogne, ombia, vaho ia. Hodinehentikagne tsikiraidraike reo.
Inogne ty Tafilitse amy i Fihisagney?
6. Ino ty fihisagne tena tsy ataontikagne, le ino ty anto’e?
6 Aloha ty hanoagne fihisagne raike, le toko’e hieretseretse tikagne tie: ‘Inogne iaby ty atao ama’e?’ Soa ho tadidiegne fa mizara roe o fihisagneo. Voaloha’e, ty fihisagne tsy azontikagne atao. Faharoe, ty fihisagne va’e ho azontikagne atao. Hohenteantikagne i voaloha’ey. Mifanohetse amy ty toro lala ty Baiboly ndra mandika ty lalàn’Andrianagnahare ty ankamaroa ty fihisagne amy ty tontolo toy eto. (1 Jaona 5:19) Tena tsy toko’e hanao i fihisagne rey ty tena Kristiana. Agnisa izay ty fihisagne misy hampiarotegne, ndra findesam-batagne maloto, ndra filagne atao ty lahilahy sambe lahilahy, ndra sambe ampela, ndra sare vetaveta, ndra misy fifandrambesagne amy ty demonia. (1 Kor. 6:9, 10; vakio ty Apokalypsy 21:8.) Tena tsy manao i fihisagne rey tikagne, ndra tie miarake amy ty hafa zay ndra naho fa irery. Toe teantikagne hatoro i Jehovah tie ‘malaigne ty raty’ tikagne.—Rom. 12:9; 1 Jaona 1:5, 6.
7, 8. Ino ty hagnampe antikagne hahay hifily fihisagne? Magnomeza ohatse.
7 Akore ka ty amy i faharoey? Misy fihisagne tsy rarà ty Saontsin’Andrianagnahare mivantagne. Mila dinehentikagne soa areke kera mandika ty toro lala ty Baiboly i fihisagney, le tsy mifagnarake amy ty fomba fiheve i Jehovah. (Ohab. 4:10, 11) Mila mandrambe fanapahan-kevetse soa tikagne naho fa avy eo, mba halio avao ty feo ty fieretseretantikagne. (Gal. 6:5; 1 Tim. 1:19) Akore ty hanoantikagne izay? Dineho indraike ty miomba i hanegney. Naho fa mihinagne an-kotely agne tikagne, le te hagnandragne hanegne vaovao, faie fantarentikagne heike tie inogne iaby ty natao agnate’e ao. Hoe izay ka fa mila fantarentikagne ka tie inogne iaby ty tafilitse amy ty fihisagne raike, vaho izay tikagne manapa-kevetse.—Efes. 5:17.
8 Andao hatao tihoe tea manao sporo rehe. Mahafinaritse sady mahafalefale ty fo o sporò. Faie mila mandineke rehe tie noho ireke misy fifaninanagne naho aly, ndra magnoho-doza, ndra maro ndaty maratse, ndra magnambonembone tanendrazagne, ndra misy fete tsy voafehe vao ty mahavy azo ho tea aze? Naho fa boake nandineke soa rehe, le hotrea’o fa tsy mifagnarake amy ty fomba fiheve i Jehovah i sporoy. Trea’o fa mifanohetse amy i hafatse torientikagney reke, satria mandrisike o ndatio hilongo naho hifankatea tikagne. (Isaia 61:1; Gal. 5:19-21) Faie naho fa mifagnarake amy ty fomba fiheve i Jehovah ze raha atao amy i fihisagne filie’oy, le tena hahasoa naho hamelombelogne azo zay.—Gal. 5:22, 23; vakio ty Filipianina 4:8.
Ombia Raho ro Hihisa?
9. Inogne ty trea boake amy i fagnonteneagne tihoey ombia rehe ho hihisa?
9 Mampiseho ze tena am-po’o ao ty vale i fagnonteneagne tihoey: ‘Inogne ty tafilitse amy i fihisagney?’ Trea boake amy io tie ino ty hevere’o ho mete naho tsy mete. Faie toko’e hoeretserete’o ka tie, ombia rehe ro hihisa? Manao akore ty fotoagne ho lani’o ama’e? Ty vale o fagnonteneagne io ro ahatreava’o ze raha voalohan-draha ama’o, ty dika izay ze hevere’o ho raha lahibey. Akore areke ty hamantara’o naho mete ty fotoagne hihisa’o?
10, 11. Nagnino ty Matio 6:33 ro magnampe antikagne hamaritse ty fotoagne ihisantikagne?
10 Hoe ty Jesosy Kristy: “Teao amy ty fo’o naho amy ty tegna’o naho amy ty sai’o vaho amy ty heri’o ty Jehovah Andrianagnahare’o.” (Marka 12:30) Asehontikagne tie i Jehovah ro tena teantikagne, naho magnorike i reha i Jesosy tihoey tikagne tie: ‘Asao aloha hey i Fanjakagney naho ty hamarenan’Andrianagnahare, le homeigne anareo iaby ze raha zay.” (Mat. 6:33) Magnampe antika hahatrea o andine’e iohoe tie ombia tikagne ro hihisa sady manao akore ty fotoagne toko’e hatokagne ama’e.
11 Nirehake ty Jesosy tie ‘Asao aloha hey i Fanjakagney’, fa tsy tihoe ‘i Fanjakagney avao ro hasaegne.’ Ino ty anto’e? Satria fanta’e fa mipay raha hafa tikagne. Mipay tragno naho hanegne vaho akanjo tikagne, sady mila mianatse, miasa, mihisa, naho ty maro hafa. Faie misy raha raike toko’e hasaentikagne aloha, le i Fanjakagney. (1 Kor. 7:29-31) Toko’e hataontikagne afara io iaby ty raha hafa, agnisa izay o fihisagneo. Naho manao izay tikagne sady tsy ataontikagne maro loatse ty fihisagne ataontikagne, le tena handrambe soa.
12. Akore ty azontikagne ampiharagne ty Lioka 14:28 amo o fihisagneo?
12 Toko’e hipetrake handineke ze ho lany heike areke tikagne aloha ty hihisagne. (Lioka 14:28) Fantaro ty fotoagne ho lany amy i fihisagne tea’o hataoy. Mila manapa-kevetse rehe naho fa avy eo tie tena mete vao naho ampiasae’o amy i fihisagney ty fotoa’o. Naho ohatse mahavy antikagne tsy hahavita i raha tena lahibey rey ty fihisagne raike, le tsy mete zay reke. Tsy mete naho tsy ho vitantikagne o fianaragne raikeo, ty Fotoam-pivavaha ty Keleiagne, ty fagnatrehagne fivoriagne, naho ty fitoriagne. (Mar. 8:36) Faie naho mamelombelogne antikagne i fihisagney, sady ahafahantikagne miasa avao i Fanjakagney, le mete soa ty fotoagne atokantikagne anoagne aze.
Ia ty Teako Hihisa Hiarake Amako?
13. Nagnino ro mila filientikagne soa ty ndaty miarake mihisa amantikagne?
13 Ty fagnonteneagne fahatelo mila saintsaignegne le tihoe: ‘Ia ty teako hiarake hihisa amako?’ Tena lahibey ty andinehagne izay, satria miankigne amy ty ndaty hiarahantikagne ro hahavy i fihisagne ataontikagney hahafinaritse ndra tsy hahafinaritse. Mahafinaritse vata’e ty miarake mihinagne amy ty namagne. Hoe izay ka fa tena mahafinaritse o fihisagneo naho fa iarahagne amy ty namagne. Tsy mahagaga areke naho tea mihisa miarake amy ty hafa ty ankamaroantikagne, lohotsie fa o tanorao. Faie naho teantikagne hahasoa antikagne i fihisagney, le mila fantarentikagne mialoha tie ndaty manao akore ty toko’e hiarahagne sady manao akore ty tsy toko’e hiarahagne.—2 Tan. 19:2; vakio ty Ohabolana 13:20; Jak. 4:4.
14, 15. a) Ino ty ohatse nenga i Jesosy amy ty fifilianagne namagne? b) Ino ty fagnonteneagne toko’e hosaintsaignentikagne naho fa mifily namagne?
14 Hahay hifily namagne tikagne naho manahake i Jesosy. Vaho finorogne o ndatio le fa nitea’e. (Ohab. 8:31) Tea nikarakara naho tea ze kila ndaty ka reke tamy tie reke tan-tane etoy. (Mat. 15:29-37) Faie ndra tie nisoa fagnahy tamy ze kila ndaty aza reke, le tsy ze ndaty iaby ro natao’e namagne maifitse aze. Hoe reke tamy i apostoli’e 11 tsy nivalike rey: ‘Ho namako nareo naho mankatò ty lily meako anareo.’ (Jaona 15:14; henteo ka ty Jaona 13:27, 30.) Ze ndaty nanonjohy ty lia’e naho nanompo i Jehovah avao areke ro finily i Jesosy ho nama’e.
15 Tadidio avao o reha i Jesosy iohoe, naho fa hifily namagne rehe. Saintsaigno ty fagnonteneagne retoa: ‘Trea amy ty reha’e naho ty raha atao’e vao fa mankatò ty lily i Jehovah naho i Jesosy reke? Magnorike ty fitsipy ty Baiboly miomba ty findesam-batagne vao reke? Handrisike ahy tsy hivalike amy i Jehovah naho hanao voalohan-draha i Fanjakagney vao ty fiarahako ama’e?’ Naho eka iaby ty vale ireo, le nahatrea namagne soa iarahagne mihisa rehe.—Vakio ty Salamo 119:63; 2 Kor. 6:14; 2 Tim. 2:22.
Mete vao i Fihisagne Filiekoy?
16. Ino ty toko’e hosaintsaignentikagne naho fa hifily fihisagne?
16 Nandineke fagnonteneagne telo tikagne tie teo, le tihoe: Inogne, ombia, sady ia. Toko’e hifagnarake soa amy ty fitsipy ty Baiboly ty vale ireo, naho teantikagne hahasoa antikagne i fihisagne filientikagney. Naho fa misy fihisagne eretserete’o hatao areke, le saintsaigno tie inogne: ‘Inogne ty tafilitse ama’e? Mahasoa vao reke sa manimba?’ (Ohab. 4:20-27) Eretsereto ka tie ombia: ‘Manao akore ty fotoagne ho lanieko ama’e? Antogno’e sa tsy antogno’e ty fotoagne ho lany ama’e?’ (1 Tim. 4:8) Fara’e, dineho i tihoey ia: ‘Ia ty hiarake hihisa amako? Namagne soa sa raty?’—Mpito. 9:18; 1 Kor. 15:33.
17, 18. a) Akore ty ahafantara’o fa mete ty fihisagne filie’o? b) Ino ty fanapahan-kevetse rambese’o miomba ty fihisagne?
17 Tsy mete ty fihisagne filientikagne naho misy tsy mifagnarake amy ty fitsipy ty Baiboly ty vale o fagnonteneagne telo rehoe. Naho mifagnarake amy ty Baiboly iaby ty vale ireo, le hahasoa antikagne i fihisagne ataontikagney, sady hagnomey voninahitse i Jehovah.—Sal. 119:33-35.
18 Toko’e hifily fihisagne soa areke tikagne, hanao aze amy ty fotoagne mete soa, sady hifily namagne soa. Lonike abey tikagne iaby hankatò ty toroheve ty Baiboly toy: “Ndra tie homagne ndra minogne nareo, ndra inogn’inogne atao’areo, le anò hagnomezam-boninahitse an’Andrianagnahare ze kila raha.”—1 Kor. 10:31.
Hai’o Hazavaegne Vao?
Akore ty hampihara’o ty andinin-teny retoagne naho fa hifily fihisagne:
• Matio 6:33?
• Ohabolana 13:20?
[Saresare]
[Henteo ty gazete]
✔Inogne?
[Saresare]
[Henteo ty gazete]
✔Ombia?
[Saresare]
[Henteo ty gazete]
✔Ia?
[Sare]
Akore ty hanahafantikagne i Jesosy naho fa hifily namagne naho fihisagne?