Ianaro ty Saontsin’Andrianagnahare
Ino ty Hiseho amy i Andro Fitsaràgney?
Hodinehegne amy ty lahatsoratse toy ato ty fagnonteneagne va’e ho napetra’o. Hotrea’o ato tie aia amy Baiboly ao ty vale izay. Ho fale ty Vavolombelo i Jehovah hiarake midineke ama’o ty miomba izay.
1. Ino o Andro Fitsaràgne Zao?
Aseho o sare ankavana eo io ty heve ty ndaty maro miomba izay. Ndaty agnarivo tapetrisa’e zao ro agnatreha ty sezan-droandrian’Andrianagnahare eo sady hotsarae’e arake ze natao’e taloha ty nimateza’e iareo. Misy ty hiaigne an-dagnitse, le ty ila’e hijale agn’afobey ao. Faie mirehake ty Baiboly fa natao hagnafoagnagne tanterake ty tsy rare’e o Andro Fitsaràgne iohoe. (Salamo 96:13) I Jesosy ro nitendren’Andrianagnahare ho Mpitsara amy izay.—Vakio ty Isaia 11:1-5; Asan’ny Apostoly 17:31.
2. Akore ty hagnafoagnagne ty tsy rare’e amy i Andro Fitsaràgney?
Nisatry raha nigoreve taman’Andrianagnahare ty Adama i lahilahy voaloha’ey, le nanjare mpanota naho nijale vaho nimate ty tarira’e. (Romanina 5:12) Hagnaregne ze tsy rare’e zay ty Jesosy, le hamelogne i ndaty agnarivo’e tapetrisa fa nimate rey. Rehafe ty Baiboly fa hiseho zay naho fa hanjaka agnate ty arivo taogne reke.—Vakio ty Apokalypsy 20:4, 11, 12.
Hotsaraegne o nivelomegne tamy ty mate reo, le ty “horognam-boke” rehafe ty Apokalypsy toko faha-20 ro hampiasaegne amy izay. Tsy ty raha natao’e taloha ty nimateza’e ro hitsaràgne aze fa ze atao’e naho fa ho velomegne reke. (Romanina 6:7) Nirehake ty apostoly Paoly fa ty “maregne naho ty tsy maregne” ro ho velomegne sady ho afake hianatse ty miomba an’Andrianagnahare iareo.—Vakio ty Asan’ny Apostoly 24:15.
3. Ino ty raha hiseho amy i Andro Fitsaràgney?
Mbe hampianaregne ty miomba i Jehovah Andrianagnahare o ndaty tsy nahafantatse aze taloha ty nimateza’eo. Ho afake hiova naho hanao ty soa iareo amy izay. “Hatsangagne amy ty fiaignagne” iareo naho manao izay. Faie tsy ho mete hianatse ty ila’e, le ho melohegne. “Hatsangagne ho amy ty fagnamelohagne” areke iareo satria ho mate indraike.—Vakio ty Jaona 5:28, 29; Isaia 26:10; 65:20.
Haharetse arivo taogne i Andro Fitsaràgney. Hogadraegne agnate ty lavake tsikeokeoke ao ty Satana Devoly agnate ze fotoagne zay. Mampitamà ty Jehovah fa hanjare ho voririke hanahake ty tamy ty voaloha’e ty ndaty mankatò naho fa tapetse o fotoagne iohoe. (1 Korintianina 15:24-28) Faie hovotsoragne ty Satana, le hitsapa fara’e o ndatio amy izay. Hatao’e ze hahavy o ndatio hivalike amy i Jehovah. Hiaigne nainai’e ze tsy magneke ho voatao’e.—Vakio ty Isaia 25:8; Apokalypsy 20:7-9.
4. Inogne i Andro Fitsaràgne hafa hinday raha soa hoahy o ndatioy?
Mampiasa ty rehake tihoe “Andro Fitsaràgne” ka ty Baiboly mba hirehafagne ty fotoagne handringanagne ty tontolo toy. Ho avy tampoke o Andro Fitsaràgne iohoe manahake i Safodrano tamy ty andro i Noa nandringagne ty raty fagnahy iabỳ. Tsy ho ela le haringagne ze tsy “matahotse an’Andrianagnahare”, le ze soa fagnahy avao ty ho sisa tavela. “Hitoboha ty hamarenagne” ty ambone tane etoa amy izay.—Vakio ty 2 Petera 3:6, 7, 13.