Misy Ampela Mitory Teny vao ty amo o Vavolombelo i Jehovah-o Ao?

Eka. An-tapetrisa’e ty ampela Vavolombelo i Jehovah mitory teny magneran-tane. Mitory ty talily soa i Fanjakàn’Andrianagnaharey iareo. Hoe ty Salamo 68:11: “Boake amy i Jehovah ze raha hovolagnegne, sady tafike lahibey ty ampela magnambara i talily soay.”

Faie tsy mitovy ty raha atao ty ampela Vavolombelo i Jehovah naho ty raha atao ty ampela amy ty fivavahagne hafa agne naho fa mitory teny. Fa nagnino?

Tsy mitovy ty ndaty itoria iareo. Ty mpivavake amy ty fiangona’e ao ty itoria ty ampela amy ty fivavahagne ila’e. Satria ireke ty mpitarike i fiangonagney, lohotsie fa amy ty Fivavahagne Manao ty Vata’e ho Kristiana. Faie ty ndaty tsy Vavolombelo i Jehovah trea iareo isan-tragno ndra amy ty toeragne hafa agne ro itoria ty ampela Vavolombelo i Jehovah.

Tsy mitovy ka ty raha atao iareo amo o fiangonagneo eo. Miandraikitse naho mampianatse ty fiangonagne ty ampela mpitarike fivavahagne amo o Fivavahagne Manao ty Vata’e ho Kristianao naho ty fivavahagne hafa. Faie ty ampela Vavolombelo i Jehovah tsy mampianatse i fiangonagney naho misy lahilahy vita badisa ty magnatreke eo. Ze lahilahy tinendre hampianatse avao ro manao izay.​—1 Timoty 3:2; Jakoba 3:1.

Mirehake ty Baiboly fa ty lahilahy avao ro miandraikitse fiangonagne. Magnaporofo izay ty reha i apostoly Paoly tamy i Titosy mpiandraikitse manahake aze avao ka. Hoe reke: “Ty nagnengako azo ta Kreta agne, le ty ... hanendrea’o androanavi-pagnahy isake tanàgne, le lahilahy tsy misy tsiko’e.” (Titosy 1:5, 6) Mitovy amy izay ka ty rineha i Paoly tamy i Timoty tihoe toy tie: “Naho misy ndaty mikezake mba ho mpiandraikitse, le magniry asa soa reke.”​—1 Timoty 3:1, 5.

Nagnino areke ro tsy nengagne hiandraikitse fiangonagne o ampelao? Hoe ty Paoly: “Ty ampela tsy engako hampianatse, ndra hanagne fahefagne amy ty lahilahy, fa toko’e hitsigne. Ty anto’e i Adama ro namboaregne voaloha’e vaho izay i Eva.” (1 Timoty 2:12, 13) Hita boake amy izay areke fa ty lahilahy ro tinendren’Andrianagnahare hampianatse naho hitagne andraikitse amo o fiangonagneo eo satria niforognegne taloha ty ampela reke.

Manahake i Jesosy Kristy, i Mpitarike iareoy ty mpanompo i Jehovah naho fa mitory teny. Hoe ty Lioka: “Nandeha nitsoeke tanàgne naho vohitse ty Jesosy, le nitory naho nagnambara ty talily soa i fanjakàn’Andrianagnaharey.” Nirahe i Jesosy hitory ka ze mpanonjohy ty lia’e naho fa tafara tatoy. “Le nandeha mbamy i faritaney mbeo iareo sady nitsoeke tanàgne, le nitory i talily soay.”​—Lioka 8:1; 9:2-6.

Mazoto mitory ka ty mpanompo i Jehovah amy izao ndra lahilahy ndra ampela. Magnorike ty reha i Jesosy toy iareo: “Le hotoriegne magneran-tane ty talily soa i fanjakagney toy, ho vavolombelogne amy ty firenena iaby, vaho izay ho avy ty fara’e.”​—Matio 24:14.