VALEM-PAGNONTENEAGNE ARA-BAIBOLY

Afake mahazo famelan-keloke vao tikagne?

Rehafe ty Baiboly fa mpanota iaby o ndatio. Nandova ota boake amy i Adama, i lahilahy voaloha’ey tikagne, le mora manota. Manjare manao raty tikagne kindraike, le manegnegne naho fa avy eo. Faie mate ho antikagne ty Jesosy Kristy, i Anak’Andrianagnaharey, mba hagnoneragne ty fahotantikagne. Afake mahazo famelan-keloke areke tikagne noho o solovoigne iohoe. Fagnomezagne boake aman’Andrianagnahare zay.​—Vakio ty Romanina 3:23, 24.

Nanao fahotagne lahibey ty ndaty ila’e, le manjare misalasala naho hamela aze vao ty Andrianagnahare. Soa avao fa mirehake ty Saontsin’Andrianagnahare tie: “Ty lio i Jesosy Ana’e ro magnalio antikagne ho afake amy ze kila ota.” (1 Jaona 1:7) Avela i Jehovah avao ndra o fahotagne lahibeio aza naho tena mibebake i nanao ratỳ.​—Vakio ty Isaia 1:18.

Ino ty toko’e hataontikagne naho teantikagne ho voavela ty helontikagne?

Naho teantikagne havela i Jehovah Andrianagnahare ty helontikagne, le toko’e hianatse ty miomba aze tikagne. Mila mahafantatse ty fomba fanoa’e raha tikagne, ty toroheve’e, vaho ty raha take’e amantikagne. (Jaona 17:3) Vognogne hamela ty helo ze tena mibebake naho mikezake miova ty Jehovah.​—Vakio ty Asan’ny Apostoly 3:19.

Tsy tihoe sarotse loatse ty mikezake hahazo sitrake aman’Andrianagnahare. Fanta i Jehovah soa ty fahalementikagne. Soa fagnahy naho mamindra fo ka reke. Tsy tea’o vao areke ty mianatse tie, akore ty fomba hampifaleagne aze?​—Vakio ty Salamo 103:13, 14.