“Mikezake Hahazo Andraikitse vao Rehe?”

NATAHOTAHOTSE ty Fernando.a Nisy androanavi-pagnahy roe nangatake ty hirehake ama’e. Vaho tsiela zay i mpiandraikitse faritsey ty nitilike i fiangona iareoy. Isake tie boake nitilike reke tato ho ato, le nirehafe o androanavi-pagnahio tamy i Fernando ty toko’e hatao’e naho te hahafeno fepetse hahazo andraikitse fagnampe’e reke. Nanjare nieretseretse ty Fernando naho fa nandeha ty fotoagne tie: ‘Mba ho voatendre ho androanavi-pagnahy avao koahe raho?’ Ino ty horehafe i androanavi-pagnahy rey ama’e hinane zao?

Nitsanogne soa ty Fernando naho fa nirehake ty 1 Timoty 3:1 ty raike tamy iareo. Nirehake reke fa nahavoarae taratasy nanendre i Fernando ho androanavi-pagnahy iareo. Tena nitaitse ty Fernando, le nirehake tihoe: “Akore?” Nahere i rahalahỳ i reha’ey, le nisomimoke ty Fernando. Fale i fiangonagney naho fa nampandrenesegne i vaovaoy.

Diso vao rehe naho magniry hahazo andraikitse? Aha’a, tsy izay. Hoe ty 1 Timoty 3:1: “Azo atokisagne ze o rehake zao: Naho misy ndaty mikezake mba ho mpiandraikitse, le magniry asa soa reke.” Maro ty rahalahy mikezake mandroso ara-pagnahy mba hahazo andraikitse, arake o andine’e iohoe. Manjare anketse’e ty androanavi-pagnahy naho ty mpagnampe amy ty fiangonagne mahay, amo o vahoa i Jehovah-o eo. Faie rahalahy maro ty mila mikezake hahazo andraikitse, satria mihamaro ty ndaty amy i fiangonagney eo. Ino ty toko’e hatao naho te hahazo andraikitse? Mete vao ty minekoneko bey miomba izay, manahake ty natao i Fernando?

INO TY DIKA TIHOE “MIKEZAKE”?

Boake amy ty matoanteny grike midika tihoe magniry mafe ndra manakatse, tihoe “mikezake” amy 1 Timoty 3:1 ao. Ndaty mikezake manakatse voankatae masake ambone hatae ey ro va’e ho avy an-tsai’o ao amy izay. Faie tihoe mikezake le tsy midika tihoe magniry mafe hahazo ty toera ty “mpiandraikitse.” Naho tena magniry ty ho androanavi-pagnahy ty ndaty raike, le ty hanao “asa soa” ro toko’e ho tanjo’e fa tsy ty hahazo toeragne.

Trea amy 1 Timoty 3:2-7 naho amy Titosy 1:5-9 ao ty maro amy i fepetse takegne amy ze te hanao o asa soa iohoe. Hoe ty Raymond, androanavi-pagnahy fa ela miomba o fitsipike rehoe: “Amako ty raha tena lahibey le tihoe, ndaty manao akore tikagne. Tsy ampe ty mahay manao lahajaka naho mahay mampianatse, ndra tie ilaegne aza zay. Toko’e tsy hisy tsiko’e tikagne, hahay manahatsahatse amy ty raha atao, hisaigne soa, ho tea filaminagne, ho tea mandrambe am-bahiny vaho handefetse.”

Mikezake mba tsy hisy tsiko’e ty rahalahy tena te hahazo andraikitse, le magnalavitse ze raha va’e tsy ho hamarenagne naho halotoagne. Mahay manahatsahatse amy ty raha atao’e reke, misaigne soa, tea filaminagne, vaho mandefetse. Manjare matoky areke o mpiara-manompò tie hahay hitarike reke sady afake magnampe naho fa misy olagne. Tea mandrambe ambahiny ka reke, le mampahery o tanorao naho o ndaty vaovaò. Tea ty soa reke, le mampionogne naho magnampe ze marare naho ze antetse. Mikezake ty hanagne o toetse rehoe reke mba hahasoa o mpiara-manompò, fa tsy tihoe mba ho voatendre.b

Maregne fa magnampe naho manoro hevetse o androanavi-pagnahio. Faie i rahalahỳ ro mila mikezake hahafeno ty fepetse také ty Soratse Masigne. Hoe ty Henry, androanavi-pagnahy za-draha: “Mikezaha mafe hahafeno fepetse naho te hanjare mpiandraikitse rehe.’ Nagnazava ty Mpitoriteny 9:10 reke. Hoe reke: “‘Ze raha azo i tagna’oy anoegne le anò amy ty heri’o iaby.’ Ndra ino ndra ino ampanoe o androanavi-pagnahio azo, le anò arake ze fara’e soa vita’o zay. Teavo iaby ze asa ampanoegne azo amo o fiangonagneo eo, agnisa izay ty mamafa tragno. Amy ty fara’e le hisy hahavoamareke ty asa mafe naho ty kezake atao’o.” Mazotoa manao ze fanompoagne masigne ampanoegne azo sady mikezaha ho azo atokisagne, naho te ho androanavi-pagnahy rehe. Toko’e hibaribary tie miambane rehe fa tsy mipay voninahitse.​—Mat. 23:8-12.

MITAOA AMY TY TOE-TSAIGNE NAHO TY FIHETSEKE

Va’e te hirehake ankolake amo o androanavi-pagnahio ty rahalahy ila’e tie te hahazo andraikitse reke, ndra atao’e ze hihevera o androanavi-pagnahio aze fa fagneva izay reke. Misy ka tsy fale naho fa mea o androanavi-pagnahio torohevetse. Toko’e hieretseretse i rahalahy rey tie: ‘Mipay ze hahasoa ty tegnako vao raho, sa miambane sady tena te hikarakara o agnondry i Jehovah-o?’

Tadidio fa toko’e ho “modely hoahy o agnondrio” o androanavi-pagnahio. (1 Pet. 5:1-3) Tsy manao raha aman-kafetseagne ndra mieretseretse ty hamitake ty ndaty modely amo o fiangonagneo eo. Mila mahay miaretse naho manam-paharetagne reke ndra fa voatendre ndra mbe tsy voatendre. Faie tsy misy fahagagagne, le tsy hanao diso sasa ty ndaty raike naho fa manjare androanavi-pagnahio. (Nom. 12:3; Sal. 106:32, 33) Va’e ‘tsy hahatrea ty tsiko’e’ ty rahalahy raike, fa ty hafa va’e hahatrea raha tsy mete ama’e. (1 Kor. 4:4) Ko boseke areke naho magnomey torohevetse azo boake amy Baiboly ao o androanavi-pagnahio. Mipay ze hahasoa azo iareo. Tsanogno soa i toroheve’ey sady ampiharo.

AKORE NAHO FA NANDIGNE ELA REHE?

Maro ty mihevetse tie fa ela loatse reke ty nandigne faie mbe tsy voatendre avao. Naho fa an-tao’e maro rehe ro ‘nikezake ho mpiandraikitse’, tsy ligne’o vao reke kindraike? Rehafe ty Ohabolana 13:12 tie: “Marare ty fo naho ela bey vaho tanterake ty raha tamaegne, fa hataen-kavelogne o fagniriagneo naho fa tanterake.”

Ie aloha va’e harare vata’e o fò naho fa misy tanjogne iriegne hotratraregne faie mbe tsy tratse avao. Izay ty tsapa i Abrahama. Nampitamà hagnomey aze ana-dahy ty Jehovah, faie tsy niterake iareo amy i Saraha tagnate ty taogne maro. (Gen. 12:1-3, 7) Nihalale hoe izao ty Abrahama naho fa antetse: “O Jehovah Tompo Fara Tampo’e, ino ty homea’o ahy? Mbe tsy managn’anake avao raho ... Tsy nimea’o taranake raho.” Nagnomey toky aze ty Jehovah fa ho tanterake i fampitamà’ey. Fa ho 14 taogne tafara tatoy fara fahakede’e vaho tanterake zay.​—Gen. 15:2-4; 16:16; 21:5.

Tsy nahafale i Abrahama sasa vao ty nanompo i Jehovah satria nila nandigne reke? Aha’a. Tsy mba nisalasala reke tie tsy ho avy eo ty saontsy i Jehovah. Nitamà avao reke. Hoe ty apostoly Paoly: “Nahazo ze fampitamaegne zay areke ty Abrahama, naho fa boake nampiseho faharetagne.” (Heb. 6:15) Nitahie i Andrianagnahare Tena Maherỳ o lahilahy tsy mivalike iohoe tamy ty fara’e, sady nimea’e mihoatse ty nieretserete’e. Ino ty lesogne rambese’o boake amy izay?

Matokia i Jehovah avao naho ohatse fa an-tao’e maro rehe ro nagniry ty ho androanavi-pagnahy, faie mbe tsy voatendre avao. Mikezaha avao mba ho fale manompo aze. Ino ty anto’e? Hoe ty Warren, nagnampe rahalahy maro handroso ara-pagnahy: ‘Elaela vaho trea tie mahafeno fepetse ndra tsy mahafeno ty rahalahy raike. Trea tsikedetsikede amy ty fihetse’e naho ty fomba agnatanteraha’e ty asa ampanoegne aze ty fahaia’e naho ty toetse’e. Misy ty mihevetse tie tsy tomombagne ty raha atao’e naho tsy mahazo ty andraikitse irie’e reke. Faie diso zay sady va’e hahavy aze tsy hieretseretse naho tsy i andraikitsey avao. Fa mete ty raha atao’o naho fa tsy mivalike amy i Jehovah rehe, ndra aia ndra aia ty misy azo sady ndra ino ndra ino ty raha atao’o amo o fiangonagneo eo ndra amy i tetekey ey.’

Nandigne folo taogne mahery ty rahalahy raike vaho voatendre ho androanavi-pagnahy. Nirehafe’e ty miomba i sareten-tsovala i Jehovah-y amy Ezekiela toko voaloha’e aoy, naho ty lesogne nirambese’e. Hoe reke: “I Jehovah ty mifily ty falaky ty fandeha tea’e hindesagne i sareten-tsovala’ey, ty dika izay ty fandamina’e. Ty fotoa i Jehovah areke ro raha lahibey, fa tsy ty fotoantikagne. Hoe izay tamy iraho nagniry ty ho androanavi-pagnahỳ. Tsy ze raha nirieko naho nipaliaveko ty raha lahibey tamako. Va’e tsy hitovy amy ty raha irieko ty raha ony i Jehovah fa paliaveko.”

Te hanao ty asa soa atao o mpiandraikitseo vao rehe indraike andro agne? Ampeo hahatrea fifaleagne areke o rahalahy naho o rahavave amo o fiangonagneo eò. Ko le minekoneko loatse sady managna faharetagne, naho tsapa’o tie mandigne ela bey rehe. Hoe ty Raymond, i nirehafegne taloha teoy: “Tena tsy ho afa-po ty ndaty raike naho tafahoatse ty fagniria’e hahazo raha raike. Tsy ho fale amy ty fanompoagne ze mieretseretse avao tie ombia ro ho voatendre.” Mikezaha hanagne ty voka i fagnahỳ, lohotsie fa ty fiaretagne naho ty faharetagne. Mianara Baiboly mba hihasoa ty fifandrambesa’o amy i Jehovah, sady mikezaha hitory naho hampianatse avao. Tariho hanao ty raha mifandrambe amy ty fanompoagne o keleia’ò, sady manoa Fotoam-pivavaha ty Keleiagne. Ankamamio avao ty fiharoagne amo o rahalahy naho o rahavaveo. Ho fale hanompo i Jehovah rehe amy izay, amparake ty hahatrara’o i tanjo’oy.

Tena tombotsoa tihoe enga i Jehovah hikezake hahazo andraikitse amo o fiangonagneo eo. Faie tsy tea i Jehovah naho ty fandamina’e naho kivy sady tsy fale amy ty fanompoagne o rahalahy mikezake hahazo andraikitseo. Tohagna i Jehovah naho tahie’e ze manompo aze amy ty fo’e, sady “tsy ampea’e haoreagne” ty fitahia’e.​—Ohab. 10:22.

Mbe afake mandroso soa amy ty ara-pagnahy rehe, ndra tie fa elaela aza ro nikezake hahazo andraikitse. Mikezaha hanagne o toetse ilaegneo naho hiasa mafe amo o fiangonagneo eo sady hikarakara soa avao o keleia’ò. Tsy haligno i Jehovah ze kila raha atao’o mba hanompoagne aze. Lonike abey mba hahafale azo avao ty manompo aze, ndra ino ndra ino ty andraikitse meagne azo.