Nahavita Niaretse Raho Satria mbe Mitovy amy i Hateako i Jehovah Tamy i Voaloha’ey Avao ty Hateako Aze

TAM-PANDREAGNE tamy ty Lapotaly Bey i Valley Forge, a Phoenixville, Etazonia etoagne raho tamy Jona 1970 tagne ho agne. Nisy mpitsabo mpagnampe nagnente ty tasioko, isake tie antsasa-dera. Maramila raho, sady niazo ty aretegne mifindra tena mahery. Trea tie tena natahotse i mpitsabo mpagnampey, sady zokeko kede avao reke. Nihegne avao ty tasioko, le hoe raho: “Va’e mbe tsy nahatrea ndaty niala aigne rehe ein?” Natahotse reke sady namale tihoe: “Mbe tsy nahatrea raho.” Vaho 20 taogne raho tamy izay.

Tena naiegne ty hoaviko. Ino ty anto’e nahavy ahy nizilike lapotaly? Andao fa ho tantaraeko ty fiaignako.

TAGN’ALY AGNE

Mpikarakara efetse fandrasagne naho mpagnampe o mpandrasao raho, tamy i aly ta Vietnamo tagney. Tamy izay raho ro narare. Tea nikarakara marare naho ze ndaty naratse raho, sady te hanjare mpandrasa. Tamy Jolay 1969 raho ro niavy ta Vietnamo agne. Tsy le avy le niasa raho fa nampandignisegne heregnandro manahake o maramila hafa vaho avio, mba ho zatse ty fiova i leray naho i toets’andro tena mafanay.

Niasa tamy ty lapotaly fandrasagne, ta Mékonga Dong Tam agne raho. Vaho niasa raho, le fa niavy i helikopitera maro feno maramila maratse naho matey. Tena tea tanendrazagne raho sady tea miasa, le avy le nagnampe. Nikarakaraegne i naratse rey, sady nientegne malaky tagnate i kontonera misy fampanintsinintsinagney tao. Tao ty toeragne fandrasagne. Nisisike tao iaby i dokotera mpandrasa naho i mpampitoragne vaho i mpitsabo mpagnampe roe rey, le nanao ze vita’e mba hamonjeagne i naratse rey. Tsikariko fa nisy gony mainte bey maromaro tsy naboake tagnate i helikopiteray ao. Nisy nirehake tamako tie rantsambata o maramila nipoteke tagn’aly agneo ty tagnate’e tao. Izay ty raha niaignako.

NIPAY AN’ANDRIANAGNAHARE

Fa naharey ty hamarenagne torie o Vavolombelo i Jehovah-o raho tamy raho nitanora. Nianatse Baiboly tamy iareo ty reneko, le nagnatreke teo raho sady nitsanogne soa. Faie tsy niavy hatrake amy badisa raho. Nahatrea Anjomba i Fanjakagney raho naho i akaraekoy tamy izay, le nagnonteneako reke tie: “Ino ty atao ao?” Hoe reke: “Ko miharinerine i ndaty rey!” Nankatò aze raho satria teako sady natokisako reke. Tsy nifandrambe tamo o Vavolombelogneo sasa raho.

Tsapako fa nipay an’Andrianagnahare raho naho fa niheregne boake a Vietnamo agne. Nanjare mafe fo raho noho ty raha niaignako tagne. Hoe raha tsy mba nitaka o ndatio zay ty raha niseho tagne. Nisy ndaty nikorakorake tagn’arabey ey sady nitoka tihoe mpamono ajaja o tafike amerikanao. Ty anto’e, nirehafegne tie nisy ajaja tsy manan-tsiny naripake tamy i alỳ.

Te hifandrambe aman’Andrianagnahare raho le nitsoeke fivavahagne. Fa nitea an’Andrianagnahare avao raho faie tsy nahafa-po ahy ty raha nitreako tagne. Nandeha tamo o tragno fivoria ty Vavolombelo i Jehovah ta Delray Beach a Floride agne areke raho, tamy ze Lahady raike zay, tamy Fevrie 1971.

Fa ho vita i lahajaka hoahy ty ndaty maroy tamy iraho niavỳ, le nijanogne sady nitsanogne ty fianaragne Fitalakesan-davitse raho. Tsy tadidiko sasa i foto-kevetse nianaragney. Faie gaga raho fa nikaroke andinin-teny tamy Baiboly ao ze ajaja raike zay. Nitsanogne soa raho sady nandineke. Nisy rahalahy mahafinaritse niharine ahy naho fa holy raho. Jim Gardner ty agnara’e sady fa 80 taogne teo ho eo reke. Nimea’e i boke Ty Hamarenagne Mitarike amy ty Fiaignagne Nainai’e (angilé) raho sady hoe reke: “Intoy misy boke ho azo naho tea’o.” Nifanao fotoagne zahay tie hianatse Baiboly naho fa kamisy maraindraigne.

Niasa halegne raho tamo o lahady iohoe, tamy ty efetse fitsaboagne vonje aigne tamy ty lapotaly raike ta Boca Raton a Floride agne. Tamy 11:00 halegne hatrake amy 7:00 maraindray ty nianjarako. Nilamindamigne tamy izay, le afake namaky i boke Hamarenagney raho. Niharine ahy ty mpitsabo mpagnampe raike sady sininto’e i bokey. Nihentea’e ty fogno’e sady nikorakorake reke tie: ‘Nanjare Vavolombelo i Jehovah hao rehe?’ Sinintoko i bokey sady hoe raho: “Vaho ty an-tsasa’e zao ty nivakieko, faie va’e hanjare Vavolombelo i Jehovah!” Nandeha reke sady nivitako vaky tamy i halegne ignehoe i bokey.

Nagnonteneako ty rahalahy Gardner tamy izahay vaho hianatsey tie: “Ino ty hianarantikagne?” Hoe reke: “I boke nimeako azoy.” Le hoe raho: “I raha fa nivitako vakỳ.” Namale moramora reke tie: “Andao areke hianarantikagne ty toko’e voaloha’e.” Gaga raho fa mbe maro ty raha mbe tsy fantako. Nampagnentea’e andine’e maro tamy Baibolikoy tao raho. Ela ty ela le nifantako avao ty Jehovah, i tena Andrianagnaharey. Nahavita toko telo zahay tamy igne. Nianatse toko telo zahay isake Kamisy maraindraigne, sady tena teako i fianaragney. Nanagne tombo’e raho nampianare o rahalahy voahosotse iohoe. Nifankafantatse iareo amy i Charles T. Russell, sady i Jim ty fitokavako aze.

Nekegne ty ho mpitory i talily soay raho heregnandro tsiampeampe tafara tatoy. Maro ty raha nampinekoneko ahy le nagnampe ahy ty Jim. Nampatahotse ahy ohatse ty nitory isan-tragno. (Asa. 20:20) Faie nanjare tea nitory raho naho fa niarake tamy i Jim. Io ty tombotsoa lahibey tie tamako. Tena fale raho miara-miasa aman’Andrianagnahare.​—1 Kor. 3:9.

TY NITEAVAKO I JEHOVAH VOALOHA’E

Misy raha manokagne teako ho rehafegne toy. Tamy izay ty niteavako i Jehovah voaloha’e. (Apok. 2:4) O hatea io ty magnampe ahy hagnaligno ty raha niaignako tagn’aly agne naho hiatreke fitsapagne hafa.​—Isaia 65:17.

Tamy 1971 i raha nisehoy. Boake niroahe i rae aman-dreneko rey raho, satria tsy mipay Vavolombelo i Jehovah an-tanàgne ao i akaraekoy! Tsy nanam-bola fire raho tamy izay. Isake tapa-bolagne raho ty nandrambe karama, sady vaho boake nivilianako akanjo hoentegne mitory ty ankamaroa ty volako. Toe te hagnomey voninahitse i Jehovah raho. Nanagne tahirim-bola raho faie tamy banke ta Michigan, toeragne naha bey ahike agne ty nisy aze. Tagnate i tobilekoy tao areke raho ro nipetrake tagnate ty andro tsiampeampe. Tamo o fivarotagne esansio ey raho ty niharatse volom-bava naho nisasa.

Niavy aloha bey tamy i Anjomba i Fanjakagney agne raho tie indraike zay. Boake niasa halegne raho sady hagnatreke fivoriagne aloha ty fanompoagne. Nandigne tambaly i anjombay tao raho sady tsy nisy nahatrea. Niheregne tan-tsaiko ao indraike ty fiaignako ta Vietnamo agne. Hoe raha nitreako i lio miparitake naho nivongagney, sady hoe reiko i fofo o ndaty mae rey. Reiko sady nitreako ka i ajalahy nagnerenkeregne tihoey: “Ho avotse avao vao raho?” Fantako fa ho mate iareo faie tsy natoroko tamy ty endreko zay fa nanao ze vitako raho mba hampaherezagne iareo. Tena nifeno ty foko nieretseretse ze raha rezay iaby.

Nivavake raho sady tena nipopoke ty ranomasoko. (Sal. 56:8) Nanomboke nisaintsaigne miomba ty famelomagne ty mate raho. Nitsapako fa hamelogne ty mate ty Jehovah sady ho tantara sisa i famonoagne ndaty naho i rare fo natera izay tamako naho tamy ty ndaty hafa rey. Hovelome’e indraike i ajalahy rey, le ho afake hianatse ty maregne miomba aze. (Asa. 24:15) Nanjare tena tea i Jehovah raho tamo o andro iohoe, sady nilenteke tam-poko tao zay. Mbe tsiaroko avao o fotoagne voaloha’e niteavako i Jehovah io. Nikezake mafe raho nanomboke teo mba ho tea aze avao, lohotsie naho fa misy tsapa hevetse naho olagne.

NISOA FAGNAHY TAMAKO TY JEHOVAH

Mahavita raha mampangorigne o ndatio naho fa misy aly le mba nanao izay ka raho. Faie magnampe ahy ty misaintsaigne ty roe amy ty andinin-teny tena teako retoagne. Ty Apokalypsy 12:10, 11 ty voaloha’e. Rehafegne ao fa rese ty Devoly noho ty hafatse torientikagne naho ty lio i anak’agnondrỳ. Ty Galatianina 2:20 ty faharoe. Fantako boake amo o andine’e iohoe fa mate “ho ahy” ty Kristy Jesosy. Mamela ty heloko ty Jehovah noho ty lio napò i Jesosy. Nanjare nalio ty eretsereko naho fa nahafantatse izay raho. Nanjare nazoto nanao ze vitako mba hagnampeagne ty hafa hahafantatse ty maregne miomba i Jehovah raho, i Andrianagnahare mamindra foy.​—Heb. 9:14.

Naho fa mieretseretse ty taloha raho, le tena mankasitrake i Jehovah, noho ireke mikarakara ahy avao. Nampifandrambese i Jim tamy ty rahavave raike managne tragno ahofa ohatse raho, naho vaho nifanta’e tie nipetrake tagnate tobile ao. Tena mino raho fa nampiasa i Jim naho o rahavave iohoe ty Jehovah mba hagnomey ahy tragno mete soa. Tena soa fagnahy ty Jehovah sady mikarakara ty mpanompo’e tsy mivalike.

NAFANA FO FA TSY NAHAY NANAHATSAHATSE

Tsy maintsy nandeha ta Michigan tagne raho tamy Mey 1971. Finenoko boke i tobilekoy taloha ty hialàko tamy ty Fiangonagne Delray Beach ta Floride agne, sady nagnavaratse mbeo raho. Mbe tsy nisasake i lalagney le fa nilany i bokey. Nazoto nitory ty talily soa i Fanjakagney raho tamy ze nandalovako, agnisa izay o pirizò. Nimeako taratasy milimpy hatrake amy ze ndaty tamy kabonem-bahoake tan-dalagne tey rey. Ke mba nisy nitiry avao i voa nitongiseko rey!​—1 Kor. 3:6, 7.

Faie tsoreko fa tena tsy nahay nanahatsahatse raho tamy iraho vaho nahafantatse ty hamarenagney, lohotsie naho fa nirehake tamo o longokò. Nirebareba ty hateako i Jehovah le nazoto nitory tamy iareo raho, faie nafana fo loatse. Tena teako ty John naho i Ron rahalahiko, le niforesevako hitsanogne ahy. Tsy maintsy niala tsiny tamy iareo raho tafara tatoy. Faie mbe mivavake avao raho mba hagnekea iareo ty hamarenagne. Mampianatse ahy avao ty Jehovah le manjare mahay manahatsahatse raho naho fa mitory naho mampianatse Baiboly.​—Kol. 4:6.

I NDATY TEAKO REY

Tena tea i Jehovah raho faie misy ndaty hafa teako ka. I Susan valiko mamiko ro tena teako amy iareo. Treako tie nila namagne raho mba hagnampe ahy hahavita i asa i Fanjakagney. Matanjake ara-pagnahy ty Susan. Tsiaroko iraho nitilike aze, tamy izahay mbe nimpifamofoy. Nipetrapetrake taloha i tragno i rae aman-drene’e rey reke tamy izay, sady namaky Fitalakesan-davitse. Gaga raho satria tsy lahatsoratse fianaragne i rahay faie nivakie’e iaby ze andinin-teny tao. Nieke raho tie: ‘Tena tea i Jehovah vata’e reke!’ Nifanambaly zahay tamy Desambra 1971, sady tena fale raho hatrake amy izao satria manohagne ahy avao reke. Fa ty tena iteavako aze le izao: I Jehovah ty tena tea’e noho iraho.

I Jesse naho i Paul ty agnara i ana’ay rey. Nagnampe iareo roe lahy ty Jehovah naho fa nihabey iareo. (1 Sam. 3:19) Rehareha’ay iareo mirahalahy satria manompo i Jehovah. Tena tsy mivalike ama’e iareo satria mbe tea aze manahake i tamy i voaloha’ey. Fa ho 20 taogne mahery zao iareo mirahalahy ro manompo marain-tsy hariva. Mirehareha ka raho managne vinanto roe soasoa, le i Stephanie naho i Racquel. Rambeseko manahake ty anako iareo roe. Sambe matotse ara-pagnahy naho tea i Jehovah amy ty fo’e i vinantoko rey.​—Efes. 6:6.

Nanompo 16 taogne ta Rhode Island agne raho tafara i badisakoy, sady nahazo namagne mahafinaritse. Tena teako ty niarake nanompo tamy ty androanavi-pagnahy agne. Teo ka i mpiandraikitse faritse rey, ndra tie tsy ho voatognoko eto iaby aza ty agnara iareo. Modely hoahy iareo. Mbe tea i Jehovah manahake ty tamy voaloha’e avao i rahalahy rey, le tena tombotsoa ho ahy ty niara-niasa tama’e. Nipay mpitory maro ty ta Karoline Avaratse agne, le nifindra tagne zahay tamy 1987. Nahazo namagne mahafinaritse ka zahay tagne.a

Nagneke hanompo amy ty Betela i Patterson a Etazonia etoagne zahay mirovaly tamy Aogositra 2002. Tamy ty Sampan-draharaha ty Fanompoagne raho ty niasa, fa i Susan tamy ty fanasam-damba. Tena tea’e ty niasa tao! Nahazo tombotsoa ho agnisa ty Filan-keve-pitantanagne raho tamy Aogositra 2005. Nahatsapa raho tie tsy fagneva izay. I Susan ka nivali-doha naho fa nieretseretse fa andraikitse naho asa bey i rahay, sady tsy maintsy manao lia lavitse avao zahay. I Susan aza tsy mba mahazo aigne naho fa mandeha rapolany, ie amy izao zahay mandeha mateteke. Nirehafe’e fa nirehake raha mampahery aze ty valy i rahalahy agnisa ty Filan-keve-pitantanagne rey, le tapa-kevetse ty hanohagne ahy avao reke naho mbe azo’e atao. Manohagne ahy vata’e reke, sady tena teako.

Misy sare maro sarobily ty am-biroko ato. Maniahy ahy i raha rey fa tena mahafinaritse ty fiaignako. Fa nahazo valesoa maro raho satria nikezake mafe ho tea i Jehovah manahake i tamy i voaloha’ey avao.