Soa Naho Fantaregne ty Tantara o Baibolio

Tsy misy boke ara-pivavahagne mitovy amo o Baibolio. Ty anto’e, io avao ro tena nisy voka’e tamy ty raha inoa o ndatio hatrake amy izay. Ty Baiboly avao ro boke maro mpandineke faie maro mpagninje ka.

Misy manam-pahaiagne ohatse misalasala naho tena mitovy amy i Baiboly tam-boaloha’e tagney io. Hoe ty raike amy iareo: “Tsy azontikagne antoke naho tena mitovy amy i Baiboly sinoratse tagnagne tam-boaloha’e tagney o Baiboly amy izaò. Maro ty raha diso amo o Baiboly amy izaò. Fa an-jato’e taogne tafara tatoy ty ankamaroa iareo vaho izay nadika, le tena tsy mitovy amy i Baiboly tam-boaloha’e tagney naho amy ty lafi’e maro hafa.”

Tsy Kristiana ty ndaty ila’e, le misalasala naho maregne o Baibolio. Nampianatse i Faizal, ohatse ty keleia’e tie boke masigne o Baibolio faie novagne ty agnate’e ao. Hoe ty Faizal: “Nanjare tsy natokitoky raho naho fa nisy ndaty te hirehake amako miomba ty Baiboly. Ireke aza tsy managne i Baiboly tam-boaloha’e tagney fa novagne i azey.”

Tena ilae’o vao ty mahafantatse tie novagne ndra tsy novagne o Baibolio? Saintsaigno zao: Hatoky ty fampitamà’e miomba ty hoavy vao rehe, naho tsy fanta’o tie, tena trea tamy i Baiboly tam-boaloha’e tagney vao zay? (Romanina 15:4) Hagnorike ty toro lala ty Baiboly vao rehe naho fa handrambe fanapahan-kevetse lahibey miomba ty asa, ndra ty keleiagne, ndra ty fivavahagne, naho maro diso io?

Fa tsy misy sasa i boke sinoratse tam-boaloha’e tagne nahaforogne o Baibolioy. Faie soratse tagnagne fa hambo’e agn’arivo’e ro mbe azontikagne dinehegne. Nagnino rey ro mbe misy hatrake amy izao, ndra tie mora simba aza ty fitaovagne nanoratagne aze, ndra tie nisy te hamoagne aza, sady ndra tie nisy te hagnova aza ty tagnate’e tao? Nagnino zay ro mahavy azo hatoky fa maregne o Baiboly misy amy izaò? Mamale izay ty lahatsoratse magnarake.