MATOAN-DAHATSORATSE | NAGNINO RO MBE MISY HATRAKE AMY IZAO O BAIBOLIO?
Mora Simba ty Fitaovagne Nanoratagne Aze
OLAGNE: Holim-biby maleme naho taratasy papyrus (karazan-jozoro) ro tena nampiasae o mpanoratse Baibolio naho o mpanao dika soratseo. (2 Timoty 4:13) Natahoragne tsy hisy sasa areke o Baibolio.
Mora riatse sady mihagavoke vaho mihamaleme i taratasy papyrus-y. Hoe ty Richard Parkinson naho i Stephen Quirke, mpikaroke miomba i Ejipta taloha: “Va’e hihasimba i taratasỳ, le manjare misaratsarake sady manjare lemboke. Mando i taratasy papyrus-y naho nitamiriegne, le manjare misy bobongolo ndra lo. Hane ty biby ndra ty biby kedekede manahake o vitike fotio ka reke naho alevegne.” Azo ty hazavagne ndra ando ty horogna ty taratasy papyrus ila’e tafara ty nahatreavagne aze, le tsielatsiela avao le nisimba.
Mafe ty holy o bibio naho oharegne amy i taratasy papyrus-y. Faie mora simba ka io naho fa tsy kolokoloegne ndra naho fa apetrake amy ty toeragne mafana bey, ndra manintsim-bey ndra mando, ndra mazava loatse.a Tea o biby kedekedeo ka io. Tsy mahagaga areke naho tsy misy sasa o soratse tagnagne fa hambo’e rehoe. Faie naho manao hoe izay ty hasimba o Baibolio, le ho nanjavogne ka ty hafatse rehafe’e.
NAGNINO RO MBE MISY AVAO I HOROGNAM-BAIBOLY REY?: Rehafe ty lalàna o jiosio fa toko’e hadika ty mpanjaka tsikiraidraike amy ty boke, i boke dime voaloha’e amy Baiboly ao rey. (Deoteronomia 17:18) Maro ka ty sinoratse tagnagne natao o mpanao sora-tagnagne za-drahao, le nahatreavagne ty Soratse Masigne ty Synagoga o Israelio iaby hatrake a Makedonia agne tamy ty taonjato voaloha’e. (Lioka 4:16, 17; Asan’ny Apostoly 17:11) Nagnino ro mbe misy hatrake amy izao ty ila’e amy i soratse tagnagne fa hambo’e rey?
Nitamiriegne tagnate ty taonjato maro ty Horognam-boke ty Riake Mate, naho fa nazilike tagnate siny tane, sady napetrake tagnate lava-bato tan-tane efetse agne
Hoe ty Philip Comfort, manam-pahaiagne miomba ty Testamenta Vaovao: “Fanao o Jiosio ty nitamiry horognam-boke tagnate siny.” Mbe nanao izay avao o Kristianao kanao nahatreavagne i soratse tagnagne fa hambo’ey ty tagnate siny tane, efetse kedekede maiegne, lava-bato naho tan-tane efetse agne.
INO TY VOKA IZAY? Tapatapa Baiboly sinoratse tagnagne agnarivo’e ty mbe misy hatrake amy izao. Mahatratse 2 000 taogne mahery ty ila’e amy i raha rey. Ty Baiboly avao ro mbe managne sinoratse tagnagne maro sady fa hambo’e manahake izay.
a Sinoratse tamy ty holim-biby ohatse ty firehafagne ty fahaleovan-tegna i Etazonia. Faie nanjavogne ty ankamaroa ty raha sinoratse ao, tsy ampe 250 taogne tafara tatoy, le fa tsy ho nihay vakiegne.