Mikezaha ho Tena Mpinamagne Aloha ty Hiavia i Fara’ey

1-2. Ino ty hagnampe antikagne hiatreke raha sarotse, arake ty 1 Petera 4:7, 8?

FA mihamarine ty fara i “andro fara’ey”, le va’e hiatreke olagne tena mafe tikagne. (2 Tim. 3:1) Nisy korontagne naho aly ohatse ty tamy ty firenena raike Afrika ao, naho fa vita i propagandỳ. Tsy afake nivezeveze areke o rahalahy naho o rahavaveo tagnate ty enem-bolagne mahery. Ino ty nagnampe iareo hiatreke izay? Nifindra tamy ty faritse tsy le natahoragne iareo, le nipetrake tamo o mpiara-manompò. Hoe ze rahalahy raike zay: “Tena ilaegne ty mana-namagne marine azo naho fa hoe irey. Afake nifampahery soa zahay.”

² Ho fale tikagne naho mana-namagne tea antikagne, naho fa avy i “haoreagne lahibeỳ.” (Apok. 7:14) Manomboke amy izao areke tika le fa mila mikezake ty ho tena mpinamagne. (Vakio ty 1 Petera 4:7, 8.) Maro ty raha azo ianaragne boake amy i Jeremia. Nisy raha sarotse niseho taloha ty nandravagne i Jerosalema, sady nagnampe aze hiatreke izay i nama’ey.b Akore ty hanahafantikagne aze?

INO TY AZO IANARAGNE BOAKE AMY I JEREMIA?

3. a) Nagnino ty Jeremia ro va’e te hivibìke? b) Ino ty nirehafe i Jeremia tamy i Baroka, sady ino ty voka izay?

³ Boake Anatota ao ty Jeremia. Mpigoreve ty ndaty magnodidigne aze, sady longo’e ty ila’e ama’e. (Jer. 11:21; 12:6) Ndaty hoe izay ty niara-niaigne tama’e tagnate ty 40 taogne, fara fahakede’e. Faie tsy nivibìke reke. Nanagne mpitan-tsoratse reke. Baroka ty agnara’e sady tsy nivalike ama’e io. Nirehafe i Jeremia tama’e ty fihetseham-po’e, sady fantantikagne zay satria sinoratse amy Baiboly ao. (Jer. 8:21; 9:1; 20:14-18; 45:1) Azo antoke fa nifandrambe am-po naho nifagnaja iareo, naho fa nanoratse ty tantara i Jeremia ty Baroka.​—Jer. 20:1, 2; 26:7-11.

4. Ino ty raha nampanoe i Jehovah i Jeremia? Nagnino zay ro nagnampe iareo amy i Baroka hanjare tena mpinamagne?

⁴ Nampitao o Israelitao miomba ty raha hanjò i Jerosalema ty Jeremia, tagnate ty taogne maro, sady tena tsy natahotahotse reke. (Jer. 25:3) Mbe te hagnampe o Israelitao hibebake ty Jehovah, le nampanorate’e i Jeremia tamy i horognam-bokey ao i fampitaoa’ey. (Jer. 36:1-4) Nanao o asa nampanoe i Jehovah io ty Jeremia naho i Baroka, sady va’e naharetse am-bola’e zay. Niara-niasa iareo, le azo antoke fa nagnatanjake ty finoa iareo ty raha nifampirehafa iareo.

5. Ino ty mampiseho fa tena namagne ty Baroka?

⁵ Naho fa nila nampahafantaregne i vahoakey amy izay ty raha nirehafe i horognam-bokey, le tsy maintsy niantehetse tamy i Baroka ty Jeremia. (Jer. 36:5, 6) Nimbamy i tokotane i tempolỳ mbeo areke ty Baroka, le namaky aze. Bey herim-po reke, le nivita’e i asay ndra tie nagnoho-doza aza. Azo antoke fa tena fale tamo o nama’e iohoe ty Jeremia! (Jer. 36:8-10) Nirey ty roandriagne ta Joda tao ty raha natao i Baroka, le nampamakie iareo aze indraike i horognam-bokey. (Jer. 36:14, 15) Nanapa-kevetse iareo naho fa niavy eo tie hampitaegne amy i Joiakima Mpanjaka i reha i Jeremiay. Faie nirehake tamy i Baroka iareo tie: “Akia mietaha nareo amy i Jeremia, sady ko atao misy mahafantatse ty misy anareo.” (Jer. 36:16-19) Soa avao iareo fa nirehake izay!

6. Akore ty natao i Jeremia naho i Baroka naho fa nisy nanohetse?

⁶ Tena niboseke ty Joiakima Mpanjaka naho vaho naharey i rehake tamy i horognam-bokey ao. Noroa’e areke i rahay sady nampitsepahe’e ty Jeremia naho i Baroka. Faie tsy mba nampitofa i Jeremia zay. Nangalake horognam-boke hafa indraike reke, le nimea’e i Baroka. Nahere’e nitognonegne tama’e i hafa i Jehovah-y, le nisorate i Baroka tao “ze rehake ... tamy i boke noroa i Joiakima mpanjaka i Joday.”​—Jer. 36:26-28, 32.

7. Ino ty raha azo inoagne fa niseho naho fa niarake niasa ty Jeremia naho i Baroka?

⁷ Manjare mifandrambe am-po ty ndaty miarake miatreke olagne. Azo antoke areke fa nanjare tena mpinamagne ty Jeremia naho i Baroka naho fa niarake nanolo i horognam-boke noroa i Joiakimay. Nanjare nahatrea ty toetse soa i Baroka ty Jeremia, le i Baroka ka nahatrea ty toetse soa i Jeremia. Ino ty azo atao mba ho tena mpinamagne hoe izay?

REHAFO ZE AM-PO’O AGNE NAHO ZE AN-TSAI’O AO

8. Ino ty va’e hahavy antikagne tsy tena hinamagne amy ty hafa? Faie nagnino tikagne ro toko’e hikezake avao?

⁸ Va’e ho sarotse amantikagne ty hamborake ze am-pontikagne ao, naho nisy ndaty nandratse ty fontikagne. (Ohab. 18:19, 24) Ndra tika mieretseretse tie tsy afake ho tena mpinamagne amo o ndatio, satria tsy managne fotoagne ndra hery amy izay. Faie toko’e hikezake avao tikagne. Manomboke amy izao tikagne, le fa mila mianatse mirehake ze raha an-tsaintikagne agne naho ze raha am-pontikagne agne amo o mpiara-manompò. Tena ilaegne zay naho te ho mpinamagne soa tikagne. Naho fa agnate ty sarotse tikagne amy izay, le ho eo avao iareo hanohagne antikagne.​—1 Pet. 1:22.

9. a) Akore ty nampisehoa i Jesosy fa natoky o nama’eo reke? b) Nagnino tikagne ro hinamagne amy ty ndaty raike, naho mirehake ama’e ze raha an-tsaintikagne agne naho ze raha am-pontikagne agne? Mirehafa ohatse.

⁹ Natoky o nama’eo ty Jesosy. Akore ty nampisehoa’e izay? Tsy nisalasala nirehake tamy iareo reke. (Jaona 15:15) Manahake i Jesosy tikagne naho mirehake soa amy ty hafa ze raha am-pontikagne agne, ohatse ty raha mahafale naho mampinekoneko vaho mandiso tamà antikagne. Tsanogno soa ka ze ndaty mirehake ama’o. Hotrea’o amy izay fa misy raha maro itoviza’areo. Agnisa izay ohatse ty raha eretseretegne ndra ty fihetseham-po tsapa ndra ty tanjogne tratraregne. Nahatsapa izay ty Cindy, rahavave 20 taogne teo ho eo, naho fa ninamagne tamy i Marie-Louise sady fa 60 taogne mahery. Miara-manompo iareo miroanake isake kamisy maraindraigne. Tsy mifampihafahafa iareo naho fa mirehake, le maro ty raha rehafe iareo. Hoe ty Cindy: “Teako naho fa tena misy dika’e ty reha’ay amy i namakoy, satria manjare fantako fa azoko soa ze raha tsapa’e.” Vao mainke mifankatea o mpinamagneo naho fa mifampirehake soa. Azo inoagne fa hanjare mpinamagne amy ty ndaty hafa rehe, naho irehe ro mikezake manao izay, manahake ty atao i Cindy.​—Ohab. 27:9.

MIARAHA MANOMPO AMY IAREO

10. Arake ty Ohabolana 27:17, ino ty voka’e naho fa miarake manompo amy ty hafa tikagne?

¹⁰ Manahake tamy i Jeremia naho i Baroka ty raha miseho naho fa miarake manompo amo o rahalahy naho o rahavaveo tikagne. Manjare mahatrea ty toetse soa iareo, sady miana-draha boake ama’e vaho hanjare ho tena tea aze tikagne. (Vakio ty Ohabolana 27:17.) Ino ohatse ty tsapa’o naho miara-manompo amy ty rahalahy raike ndra rahavave raike rehe, le mahatrea fa tena tsy matahotse magnazava ty raha inoa’e reke? Akore naho trea’o tie tena rese lahatse reke naho fa mirehake ty miomba i Jehovah naho ty raha safirie’e? Tsy vao mainke ho tea aze vao rehe?

11-12. Mirehafa ohatse mampiseho fa manjare mpinamagne amy ty hafa tikagne naho fa miara-manompo.

¹¹ Dineho ty tantara i Adeline, rahavave 23 taogne. Nangatake i Candice reke mba hiarake hitory ama’e amy ty faritane tsy le iasagne mateteke. Hoe ty Adeline: “Te hampitombo ty fahazotoa’ay naho ty fankamamie’ay o fanompoagneo zahay. ... Hoe raha nila natoseke kede zay zahay, amy izay mahavita magnomey ze fara’e soa hoahy i Jehovah avao.” Ino ty voka’e naho fa niarake nanompo iareo? Izao ty nirehafe i Adeline: “Nifampitantara ze raha nitsapa’ay zahay isake hariva, ohatse ino amy ty rehake nifanoa’ay tamy i ndatỳ ro nanohigne ty fo’ay, naho tihoe akore ty nahatreava’ay fa tena nitari-dalagne anay ty Jehovah. Tena nahafinaritse anay zay sady nagnampe anay hifankafantatse soa.”

¹² Hoe izay ka ty Laïla naho i Marianne, rahavave tsy manambaly boake a Fransa agne. Nandeha nitory tagnate ty vola’e raike mahery ta Bangui, rova i Afrika Agnivo iareo. Izao ty nitantarae i Laïla: “Nisy olagne ty tama’ay amy i Marianne, faie soa avao zahay fa nifampirehake soa sady tena nifankatea, le nanjare tena mpinamagne. Vao mainke nahafinaritse ahy reke naho fa treako tie mora mizatse fiaignagne vaovao sady tena tea ndaty vaho mazoto manompo.” Tsy voatere hifindra an-tane hafa agne rehe vaho izay ho afake hinamagne bey amy ty mpiara-manompo hoe izay. Isake tie miarake manompo amy ty rahalahy ndra rahavave amy ty fiangona’areo ao rehe, le afake mikezake hahafantatse aze soa sady hinamagne ama’e.

MIFANTOHA AMY TY RAHA SOA SADY MAMELÀ HELOKE

13. Ino ty raha va’e hiseho naho fa miarake mateteke amy ty namantikagne tika?

¹³ Tsy ty toetse soa ty hafa avao kindraike ty treantikagne naho fa miarake mateteke amy iareo tikagne, fa ty toetse rati’e ka. Faie ino ty hagnampe antikagne ho tena mpinamagne avao? Eretsereto indraike ty Jeremia. Ino ty nagnampe aze hifantoke amy ty toetse soa i nama’ey sady hagnaligno ze hadisoagne natao’e?

14. Ino ty nianara i Jeremia miomba i Jehovah, sady nagnampe aze hanao ino zay?

¹⁴ Nanoratse i boke minday ty agnara’ey ty Jeremia, sady va’e ireke ka ty nanoratse ty 1 Mpanjaka naho ty 2 Mpanjaka. Naho fa nanoratse ireo reke le azo antoke fa nanjare fanta’e tie mamindra fo amy ty ndaty tsy voririke ty Jehovah. Nanao raha raty ohatse ty Ahaba Mpanjaka faie nibebake, le tsy nivonovonoe i Jehovah i keleia’ey tamy ireke mbe velogney. (1 Mpanj. 21:27-29) Fanta i Jeremia ka fa nahavignetse i Jehovah ty Manase naho oharegne amy i Ahaba. Faie nibebake ty Manase, le nagnenga ty hadisoa’e ty Jehovah. (2 Mpanj. 21:16, 17; 2 Tan. 33:10-13) Tsy maintsy ho nagnampe i Jeremia o tantara rehoe, le nanjare nanam-paharetagne naho namindra fo manahake i Jehovah reke naho fa nifandrambe tamy ty nama’e.​—Sal. 103:8, 9.

15. Ino ty mampiseho fa nanahake i Jehovah ty Jeremia, le nanam-paharetagne tamy i Baroka?

¹⁵ Nisy fotoagne ty Baroka tsy nifantoke tamy ty fanompoa’e. Faie nagnampe aze ty Jeremia, fa tsy le avy le nieretseretse tie tsy misy azo tamaegne sasa ty ama’e. Soa fagnahy ty Jehovah le nagnomey torohevetse hentetse i Baroka, le nirehafe i Jeremia tama’e ze torohevetse zay. (Jer. 45:1-5) Ino ty ianarantikagne boake amy izay?

16. Arake ty Ohabolana 17:9, ino ty toko’e hatao naho te ho mpinamagne avao?

¹⁶ Tsy afake mitamà tikagne tie ho voririke o mpiara-manompo amantikagneo. Naho fa manjare namantikagne areke ty rahalahy ndra ty rahavave raike, le mila mikezake mafe tikagne mba hinamagne ama’e avao. Naho manao hadisoagne reke, le va’e mila magnomey torohevetse aze boake amy ty Saontsin’Andrianagnahare ao tikagne. Va’e ho hentetse i rahay, faie toko’e ho soa fagnahy avao tikagne. (Sal. 141:5) Mila mamela heloke ka tikagne naho nampalahelo ndra nahaboseke antikagne ty raha natao’e. Toko’e hitao avao tikagne mba tsy hagneregne hirehadrehake i rahay indraike, ndra ama’e zay ndra ama o ndaty hafa. (Vakio ty Ohabolana 17:9.) Mila mifantoke amy ty toetse soa o mpiara-manompò areke tikagne fa tsy amy ty hadisoa’e, sady tena ilaegne zay amo o fotoan-tsarotse zao. Vao mainke tena hifankatea tikagne amy izay le tena ho mpinamagne, sady namagne hoe izay ty ilaegne amy i haoreagne lahibeỳ.

TEÀO LOGNANDRO IAREO

17. Ino ty mampiseho fa tena namagne ty Jeremia?

¹⁷ Tena namagne ty Jeremia mpaminany, satria nagnampe tamy ty fotoan-tsarotse. Natahotse ty hampijalé o roandriagneo ohatse i tandapa atao tihoe Ebeda-melekay. Nagnavotse i Jeremia mba tsy ho mate tagnate ty lavake feno fotake reke. Faie tsy nitsigne avao ty Jeremia naho fa nahafantatse izay. Tsy nieretseretse reke tie hahavita hialy raike i nama’ey. Ndra tie nigadra aza reke, le nanao ze niazo’e natao mba hampaherezagne aze. Nambara’e tamy i Ebeda-meleka i hafatse mampahery boake amy i Jehovah-y.​—Jer. 38:7-13; 39:15-18.

18. Arake ty Ohabolana 17:17, ino ty toko’e hataontikagne naho fa managne olagne ty namantikagne?

¹⁸ Miatreke olagne sambe karaza’e ka ty mpiara-manompo amy izao. Maro ohatse ty mijale satria nisy tsikolony ndra horohoron-tane ndra aly ty amy ty faritse nisy aze ao. Naho fa miseho ty raha hoe izay, le va’e ho afake handrambe ambahiny i namantikagne rey ty ila’e amantikagne. Misy ka ty va’e ho afake hagnomey vola. Faie azontikagne iaby atao ty mangatake amy i Jehovah mba hagnampe iareo. Akore ka naho maharey tikagne tie kivy ty rahalahy ndra ty rahavave raike? Va’e tsy ho haintikagne ze raha horehafegne ama’e ndra ze toko’e hatao. Faie misy raha azontikagne atao avao. Afake manokagne fotoagne hiarahagne ama’e tikagne. Afake mitsanogne aze naho mitretré aze tikagne. A magnino naho mba rehafegne ama’e ze andinin-teny mampahery antikagne? (Isaia 50:4) Ty raha tena lahibey le tihoe agnila’e eo tikagne naho fa mipay antikagne reke.​—Vakio ty Ohabolana 17:17.

19. Nagnino tikagne ro mila mikezake ty ho tena mpinamagne manomboke amy izao?

¹⁹ Toko’e ho tapa-kevetse ty ho tena mpinamagne amo o mpiara-manompò tikagne manomboke amy izao, sady hikezake hinamagne amy iareo avao. Ino ty anto’e? Satria hagnandragne ty hampisaratsarake antikagne i fahavalontikagney, sady hampiasa vande iareo mba hanoagne izay. Hatao iareo ty hahavy antikagne tsy hifampatoky naho tsy hifanohagne sasa. Faie ho montso antoke ty kezake atao iareo! Hifankatea naho ho mpinamagne avao tikagne, sady tsy hisy ndra ino ndra ino ho azo iareo atao mba handravagne izay. Tsy tihoe hatrake amy ty fara ty tontolo toy avao tikagne ty ho mpinamagne, fa ho nainai’e!