FIAIGNANTIKA KRISTIANA

Mahafale Azo vao ty Mitory i Talily Soay?

Sarotse ama’o vao ty mitory? Maro amantika ty va’e hanao eka. Ino ty anto’e? Va’e ho tendreke ty ndaty tsy miraharaha ndra manohetse tika ndra mampatahotse antika ty mirehake amy ty ndaty tsy fantantika. Faie Andrianagnahare falefale ty tompoentikagne, le toko’e hanompo aze am-pifaleagne tika. (Sl 100:2; 1Ti 1:11) Intoa misy anto’e telo mahavy antikagne toko’e ho fale amy ty asa fitoriagne:

Voaloha’e, magnambara hafatse mampanan-draha tamaegne tikagne. Tsy manan-draha tamaegne ty ankamaroa ty ndaty amy hinane zao, le azontikagne atao ty mameno ty fo’e ‘i talily soay.’ (Is 52:7) Mahavy antikagne ho falefale ka ty talily soa i Fanjakan’Andrianagnaharey. Aloha ty handehanagne mitory, le toko’e hisaintsaigne ty fitahiagne hindese i Fanjakagney an-tane etoy tikagne.

Faharoe, mandrambe soa ara-batagne naho ara-pagnahy ze ndaty mampihatse i talily soa torientikagney. Nikezake niala amy ty raha raty fanoe’e iareo mba hahazo i havelogne nainai’ey. (Is 48:17, 18; Ro 1:16) Azo oharegne amy ty fandrombahagne ndaty azon-doza ty asa anoentikagne. Ndra tie misy ndaty tsy te ho avotse, le tsy mitofa tikagne fa mipay lognandro ze te ho avotse.—Mt 10:11-14.

Fahatelo, lahibey ty fitoriagne satria magnomey voninahitse i Jehovah. Sarobily ama’e ty asa fitoriagne. (Is 43:10; He 6:10) Magnomey ty fagnahi’e masigne reke mba hahavitagne o asa iohoe. Angataho areke ty fagnahy masy i Jehovah mba hagnomey fifaleagne azo satria agnisa ty vokatse ty fagnahy io. (Ga 5:22) Haharese ty tahotse sady ho sahy hitory tikagne satria magnampe antikagne reke. (As 4:31) Ndra inogn’ino raha misy amy ty faritanentikagne, le hahatrea fifaleagne avao tikagne naho fa mitory.—Ezk 3:3.

Toe-tsaigne sambe hafa amy i fitoriagney ey: Tsy fale naho fale — Ino ty toe-tsaigne teà’o hanagnagne naho fa manompo? Akore ty ampisehoa’o tie falefale rehe?

HENTEO TY VIDEO HO FALE REHE NAHO MIANATSE SADY MISAINTSAIGNE, LE VALEO TY FAGNONTENEAGNE RETOA:

Nagnino ro toko’e hataontikagne voaloha’e ty fahazaragne mianatse Baiboly ndra tie mandany lera maro amy ty asa fitoriagne tikagne isam-bolagne?
Akore ty anahafantikagne i Maria?
Isake ombia rehe misaintsaigne ty Saontsin’Andrianagnahare?
Ino ty mahafinaritse azo naho fa mitory i talily soay?