“Teako ty Manao i Asa Fitoriagney amy Hinane Zao!”

TSY NAHAFALE AHY SASA TY NITORY

Faie nanomboke tsy nifandrambe soa tamy i Jehovah raho naho fa ni-13 taogne. Ty anto’e, hoe afake nanao ze tea iareo hatao zay o mpiara-mianatse amakò, le nagniry hanahake iareo raho. Nieretseretse raho tie hoe sarotse loatse zay ty magnorike ty fitsipike napetra o rae aman-drenekò naho ty fitsipy i Jehovah vaho ty manompo aze. Mbe liako naho nisalasala zao tie misy vata’e vao ty Jehovah. Faie tamy izay raho, le nanomboke nahatsapa ho tsy narine aze.

Faie mba tsy hahavy ahy tsy ho mpitory sasa, le nitory kedekede arake ze vitako avao raho. Tsy mba nagnomagne raho naho fa nitory, hafarako natahotse naho fa nirehake amo o ndatio, ndra tsy nihaiko ty hanohizagne i rehakey. Ty voka’e, tsy nanagne fitilihagne naho fampianaragne Baiboly raho, le nanjare tsy nifalefale sasa. Nindra areke ty falaiko o fitoriagneo. Hoe raho: ‘Nagnino o mpitorio ro mahavita mitory avao, ie amy izao hoe sarotse zay ty manao aze?’

Te hahaleo tegna raho naho fa ni-17 taogne. Nahoroko areke ty entako, le nifindra Aostralia agne raho. Tena nalahelo ty babako naho i reneko naho fa nahatrea izay. Ninekoneko iareo, faie nitamà ka tie hanompo i Jehovah avao raho naho fa agne.

Vao maike nihasimba ty ara-pagnahiko naho fa ta Aostralia agne. Nanomboke nanapatapake fivoriagne raho. Nisy tanora nitovy tamako ty tagne, le niragnetse tamy iareo raho. Mivory ohatse iareo tie androany hariva. Ie maray igne iareo mamonje boate, le minon-toake naho mandihy. Naho fa mandineke ty fiaignako tamy irey raho, le tsapako tie tamy ty tontolo toy agne ty tomboko raike, le ty tomboko raike amy i hamarenagney ao. Faie sambe tsy nisy nahafa-po ahy zay.

LESOGNE LAHIBEY RAIKE TSY NAMPOIZEKO HO NAGNOVA AHY

Niarake nitoboke tamy ze rahavave efatse sambe tsy manambaly rey zay raho tie ta Aostralia agne. Ie roe taogne teo ho eo tafara izay, le nahatrea i Tamara raho. Valy ze mpiandraikitse faritse nitilike anay zay reke. Nagnampe ahy handineke ty fiaignako reke, ndra tie tsy nieretseretse hanao izay aza. Tama’ay tao iareo ty nivantagne tamy i heregnandro nitiliha iareo anaỳ. Naho fa misy asa atao i vali’e amo o fiangonagneo eo, le miarake ama’ay reke. Misole miarake ama’ay reke, le tena niteàko. Ndaty mahihitse ka reke sady mora ifandrambesagne. Tsy nampoizeko tie kay misole avao o ndaty matotse ara-pagnahio.

Mafana fo amy ty fanompoagne ty Tamara. Nisy voka’e tamy ty hafa ty hatea’e ty hamarenagne naho ty fagnompoagne. Falefale reke, satria magnomey ty fara’e soa hoahy i Jehovah. Fa i raho tsy hoe izay, satria kidikidy avao ty meako i Jehovah. Tena nisy voka’e lahibey tamako ty toe-tsaigne soa nanagna’e naho ty nahatrea aze falefale avao. Nahavy ahy handineke ty hevetse lahibey toy ty modeli’e: Tea i Jehovah hanompo aze “am-pifaleagne” naho “ampirebehagne” tika iaby.​—Sal. 100:2.

NANOMBOKE NITEAKO INDRAIKE TY NANAO I ASA FITORIAGNEY

Niteàko ty ho falefale manahake i Tamara. Faie nila nanao fagnovàgne lahibey raho naho te ho falefale. Nitake fotoagne zay, faie nanomboke niova tsikedetsikede raho. Nanomboke nagnomagne raho naho fa handeha hanompo, le nanao mpisava lalagne mpagnampe ka kindraike. Ty voka’e, nanjare tsy le nisoregne raho sady natoky tegna. Vao maike nitombo aza ty hafaleako, arakarake ty nampiasako Baiboly naho fa nitory. Nanao mpisava lalagne mpagnampe isam-bolagne raho naho fa tafara tatoy.

Nanomboke niragnetse tamo o ndaty matotse ara-pagnahy naho tea manompo i Jehovah-o raho. Nagnampe ahy handineke ty raha tena lahibey tamy ty fiaignako naho ho tapa-kevetse hamaky Baiboly isan’andro ty modely iareo. Nanjare nitombo areke ty hateako i asa fitoriagney, hafarako nanao mpisava lalagne maharetse. Nanomboke nifalefale indraike areke raho, sady niazoko ty fiaiko naho fa niarake tamo o fiangonagneo.

NAHATREA VALY MPISAVA LALAGNE RAHO

Nahatrea i Alex raho tao’e raike tafara izay. Soa fagnahy reke, tea i Jehovah sady tea fanompoagne ka. Mpagnampe amy ty fanompoagne reke tamy izay, sady fa ni-mpisava lalagne tagnate ty enen-taogne. Nisy fotoagne ka reke nagnampe ty mpitory ta Malawi agne, satria nipay mpitory maro ty tagne. Nisy voka’e tama’e ty fiharoa’e tamo o misionerao, tamy i reke ta Malawi agney. Nandrisike aze hanao voalohan-draha ty fanompoagne avao iareo.

Nifanambaly zahay amy i Alex tamy 2003, le nanohy nanao fanompoagne marain-tsy hariva. Maro ty raha fanjaka nianara’ay naho ty fitahiagne nimey i Jehovah anay.

VAO MAINKE NITAHIE I JEHOVAH ZAHAY

Tinendre ho misionera ta Timaoro Atignanagne, tanàgne kedekede a Indonezia agne zay zahay, tamy 2009. Tena tsy nampoize’ay o fanendreagne anay iohoe. Nifale zahay, faie natahotse ka. Ie dime volagne tafara izay, le niavy ta Dili, rovabey i Timaoro Atignanagne agne zahay.

Nila nagnova ty fomba fiaigna’ay zahay naho fa tagne. Nila nianatse ty kolontsay ty ndaty tagne, ty fireha iareo naho ty fomba fiaignagne tagne zahay sady nikezake ho zatse ty hanegne tagne ka. Mateteke zahay ro nahatrea ndaty rarake, tsy nandia lakilasy vaho nihara ty tsy rare’e naho fa nanompo. Mateteke nahatrea ndaty maro maratse naho mikorontan-tsaigne ka zahay, satria lava nisy aly naho rotake avao ty tagne.a

Tena niteàko ty nanompo tagne! Nahatrea ajaja ampela 13 taogne zay raho tie indraike. I Mariab ty agnara’e. Nampalahelo reke, satria nimate ty rene’e taogne tsiampeampe taloha io, le i baba’e ka tsy le mifankatrea ama’e mateteke. Tsy mba nanagne tanjogne reke, manahake ty ankamaroa o ajaja mitovy taogne ama’eo avao. Nisy fotoagne reke tomagny tamy i reke nitantara tamako ty raha nitsapa’e zay. Faie tsy nisy azoko ndra raike ty reha’e, satria mbe tsy nahay soa i fireha’ey raho. Le nivavake tamy i Jehovah raho mba hahavita hampahery aze. Namaky andinin-teny mampahery tama’e raho naho fa niavy eo. Ie taogne tsiampeampe tafara tatoy, le niova ty toe-tsay i Maria, ty pozi’e naho ty fiaigna’e. Natao badisa reke, sady fa mitarike fampianaragne Baiboly tie amy izao. Managne keleiagne ara-pagnahy maro ty Maria amy hinane zao sady mahatsapa ho teagne reke naho fa miarake amy iareo.

Nitahie i Jehovah ty asa fitoriagne ta Timaoro Atignanagne agne. Natao badisa ty ankamaroa ty mpitory tagne tagnate ze 10 taogne zay. Faie maro amy iareo ty fa mpisava lalagne, mpagnampe amy ty fanompoagne ndra androanavi-pagnahy. Misy ka miasa amy ty birò fandikan-drehake mitokagne agne mba handika o boke naho gazetentikagneo amy ty firehake ampiasaegne agne. Fale raho naho fa maharey iareo mihira am-pivoriagne agne. Mahafale ahy ka ty mahatrea iareo falefale naho mandroso ara-pagnahy.

TSY NIERETSERETEKO TIE TENA HO FALE HOE IZAO RAHO

Tena tsy nitovy tamy ty fiaigna’ay ta Aostralia agne ty fiaigna’ay ta Timaoro Atignanagne agne. Faie tsy nampoizeko tie tena ho fale hoe izao raho. Kindraike zahay mandeha tobile, ie amy izao feno ndaty ty ao sady feno fiagne maike naho legima isan-karaza’e ka. Misy mpiana’ay Baiboly ila’e, kidikidy ty tragno iareo, le mafana ty agnate’e ao. Tsy le malio ka i tragnoy, sady lomailay era i tragnoy ty akoho iareo. Ndra tie teo i olagne rey, le mateteke raho ro nirehake tie: ‘Tena soa ty fiaignagne atoy!’

Tena misaotse i ry babako raho naho fa mandineke i raha niaignako taloha rey. Nikezake mafe nampianatse ahy ty fomba fiheve i Jehovah iareo, sady nagnampe ahy iareo ndra tamy i raho naleme ara-pagnahy rey aza. Treako tamako fa tena maregne ty raha rehafe ty Ohabolana 22:6. Tena rehareha ry babako zahay amy i Alex amy hinane zao, sady mahafale iareo ty mahatrea anay manompo i Jehovah. Tinendre hanao asa ty faritse tamy ty sampa i Aostralia agne zahay nanomboke tamy 2016.

Hoe tsy mampino zay tie i raho ro tsy nahatrea hafaleagne naho fa nanompo. Faie teako ty manao i asa fitoriagney amy hinane zao. Nitsapako tie ndra inogn’ino raha miseho amy ty fiaignagne, le hanagne i tena hafaleagney tika naho manompo i Jehovah amy ty fo. Tena maregne zay! Tena nahatsiaro ho fale raho tagnate ze 18 taogne nanompoako i Jehovah miarake amy i Alex zay. Tsapako ka amy izao fa tena maregne ty reha i Davida mpanao salamo tamy i Jehovah toy: “Ho fale ze ndaty mitsoloke ama’o. Hirebeke nainai’e iareo. ..., ho fale ama’o ze ndaty koko ty tahina’o.”​—Sal. 5:11.