Hamale ty Vavake Atao’o vao ty Jehovah?

1-2. Nagnino tika ro va’e hahatsapa tie tsy mamale ty vavake ataontika ty Jehovah?

“TOKO’E ho fale vata’e amy i Jehovah rehe, le homea’e azo ze raha irie ty fo’o.” (Sal. 37:4) Fampitamagne fanjaka nizao! Faie toko’e hitamà vao tika fa homea i Jehovah antika iaby ze raha angatahentikagne ama’e? Nagnino ro tena lahibey ze fagnonteneagne zay? Dineho moa ty raha niseho retoa. Nisy rahavave raike nivavake mba hasaegne hagnatreke ty Sekoly ty Mpitory i Fanjakagney. Faie mbe tsy nasaegne avao reke taogne maro tafara tatoy. Nisy rahalahy raike nivavake mba hihasoa ty fahasalama’e, amy izay reke ho afake hanao raha maro amo o fiangonagneo eo. Faie tsy nihasoa ty fahasalama’e. Misy rae aman-drene ka mivavake mba hagnorike ty hamarenagne avao ty ana’e. Faie ndra nanapa-kevetse ty hiala tamy i Jehovah i ana’ey.

² Va’e fa nisy raha nangatahe’o tamy i Jehovah, faie tsy namale izay reke. Va’e hieretseretse areke rehe fa ty vavake atao ty ndaty hafa avao ro valea i Jehovah fa tsy ty azo. Ndra va’e hieretseretse ka rehe tie misy raha tsy mete natao’o. Nahatsapa hoe izay ty rahavave raike atao tihoe Janiceb toy. Nivavake miomba ty fagniria iareo hanompo amy i Betela ao iareo mirovaly. Hoe reke: “Nirese lahatse raho fa tsy ho ela le hiasa amy i Betela agne zahay.” Faie nandeha ty volagne naho ty taogne, le mbe tsy nasaegne avao iareo. Hoe ty Janice: “Nikivy naho nivali-doha raho. Nieretseretse raho tie nisy raha nataoko vao nandiso tamà i Jehovah. Nivavake mafe raho mba hanompo amy i Betela agne. Nagnino areke reke ro tsy namale i vavake nataokoy?”

3. Ino ty hodinehentika amy ty lahatsoratse toy?

³ Misy fotoagne tika va’e hieretseretse tie tsy mijanjigne ty vavake ataontika ty Jehovah. Ndra ty lahilahy nanam-pinoagne taloha aza nieretseretse hoe izay ka. (Joba 30:20; Sal. 22:2; Hab. 1:2) Ino ty afake magnampe azo hatoky fa hamale ty vavake atao’o ty Jehovah? (Sal. 65:2) Mba hamaleagne o fagnonteneagne iohoe, le andao heike handineke ty hevetse magnarake retoa: 1) Ino ty raha tamaentikagne fa hatao i Jehovah? 2) Ino ka ty raha tamae i Jehovah fa hataontika? 3) Nagnino ro mila ovantika ty raha ila’e nangatahentika tamy ty vavake?

INO TY RAHA TAMAENTIKAGNE FA HATAO I JEHOVAH?

4. Arake ty Jeremia 29:12, ino ty hatao i Jehovah?

⁴ Nampitamà ty Jehovah fa hijanjigne ty vavake ataontika. (Vakio ty Jeremia 29:12.) Tea i Jehovah ty mpanompo’e tsy mivalike, le tsy hatao’e ambanen-draha ty vavake atao iareo. (Sal. 10:17; 37:28) Faie tsy midika zay tie homea’e iaby ze raha angatahentika. Va’e mila mandigne hatrake amy i tontolo vaovaoy agne aza tika vaho hahazo ty vale ty vavake ila’e nataontika.

5. Ino ty raha dinehe i Jehovah naho fa mijanjigne ty vavake ataontika reke? Hazavao.

⁵ Mijanjigne ty vavake mifagnarake amy ty fikasà’e ty Jehovah. (Isa. 55:8, 9) Agnisa ty fikasà i Jehovah zao tihoe ho feno ndaty mankatò aze ty ambone tane etoa. Faie nizizo ty Satana fa nao zao ho soa ty fiaigna o ndatio naho iareo avao ty mifampinday. (Gen. 3:1-5) Mba hagnaporofoagne fa mpavande ty Satana, le nengà i Jehovah hifampinday o ndatio. Faie noho ty fitondra o ndatio ty mahavy ty olagne mahazo antika amy izao. (Mpito. 8:9) Fantantika fa tsy hagnafake ze olagne rey zay iaby ty Jehovah amy izao. Satria naho manao izay reke, le va’e hisy ndaty hieretseretse tie tomombagne ty fitondrà iareo.

6. Nagnino tika ro mila rese lahatse tie manao raha ara-drare’e naho aman-katea ty Jehovah?

⁶ Va’e tsy hitovy ty fomba amalea i Jehovah ty vavake ataontika ndra tie mitovy aza ty raha angatahentika. Ohatse zao naho fa narare mafe ty Hezekia Mpanjaka, le nangatake tamy i Jehovah reke mba hositragne’e, le toe nagnasitragne aze vata’e ty Jehovah. (2 Mpanj. 20:1-6) Faie mifanohetse amy izay, fa naho fa nivavake ty apostoly Paoly mba hagnafaha i Jehovah ty ‘fatike tamy ty nofo’e’, zane hoe ty aretegne nahazo aze, le tsy nagnafake izay Reke. (2 Kor. 12:7-9) Dineho ka ty ohatse miomba i apostoly Jakoba naho i Petera. Sambe nite hamono iareo roe lahy ty Heroda Mpanjaka. Nivavake hoahy i Petera i fiangonagney manahake ty natao iareo tamy i Jakoba avao ka. Faie vinono ty Jakoba fa i Petera nafahagne tamy ty fomba mahagaga. (Asa. 12:1-11) Va’e hieretseretse tika tie: ‘Nagnino zane ty Jehovah ro nagnavotse i Petera faie tsy nanao izay tamy i Jakoba?’ Tsy rehafe ty Baiboly ty anto’e.c Ty raha azontikagne antoke le tihoe “tsy ombia hanao ty tsy rare’e” ty Jehovah. (Deot. 32:4) Fantantika ka fa sambe nankasitraha i Jehovah ty Petera naho i Jakoba. (Apok. 21:14) Kindraike le va’e tsy hamale ty vavake nataontika amy ty fomba iteavantikagne aze ty Jehovah. Faie noho itika rese lahatse fa lava ara-drare’e naho feno hatea avao ty raha atao i Jehovah, le tsy hampivali-doha antika ty fomba amalea’e ty vavake ataontika.​—Joba 33:13.

7. Ino ty raha toko’e hitaoantika, le ino ty anto’e?

⁷ Mila mitao tika mba tsy hampitaha ty raha iaignantikagne amy ty ahy ty hafa. Ohatse, va’e hangatake ty fagnampea i Jehovah tika amy ty raha raike, faie va’e tsy nivale i vavake nataontikay. Tafara izay, le nireintika tie nisy ndaty hafa nanao vavake nitovy amy i nataontikay, le nivalea i Jehovah ty aze. Niatreke raha hoe izay ty rahavave raike atao tihoe Anna. Nivavake reke, mba hositragne amy i kansera nahazo azey ty Matthew vali’e. Tamo o fotoagne iohoe avao, le nisy rahavave roe fa bey taogne nivoa ty kansera ka. Sambe nivavake hoahy i vali’e naho hoahy i rahavave rey areke ty Anna. Nisitragne i rahavave rey fa i vali’e nimate. Tamy ty voaloha’e ty Anna, le nieretseretse tie nisitragne i rahavave rey satria nagnampe iareo ty Jehovah. Le nagnino areke ty Jehovah ro tsy nagnasitragne i vali’e? Ie aloha tsy fantantika tie nagnino i rahavave rey ro nisitragne. Ty raha fantantika le tihoe hofoagna i Jehovah tsy hisy nainai’e o fijaleagneo sady hovelome’e ty mate.​—Joba 14:15.

8. a) Arake ty Isaia 43:2, akore ty fomba anohagna i Jehovah antika? b) Akore ty agnampea ty vavake antika naho fa miatreke raha sarotse? (Henteo ty video tihoe Magnampe ty Vavake.)

⁸ Hanohagne antika avao ty Jehovah. Noho i Jehovah Rae bey hatea, le tsy tea’e hijale tika. (Isaia 63:9) Faie tsy mikalagne o raha sarotseo reke, ndra tie manahake ty renerano ndra afo aza i raha rey. (Vakio ty Isaia 43:2.) Faie nampitamà reke fa hagnampe antika mba ‘hahavita hiatreke’ izay. Tsy henga’e hampijale antika nainai’e i fijaleagne manjò antika rey. Mea i Jehovah antika ka i fagnahy masigney mba hagnampeagne antika hiaretse. (Lioka 11:13; Fil. 4:13) Voka’e, manjare matoky tika tie hagnomey ze raha ilaentikagne mba hahafahantika hiaretse naho tsy hivalike Reke.d

INO TY RAHA TAMAE I JEHOVAH FA HATAONTIKA?

9. Arake ty Jakoba 1:6, 7, nagnino tika ro mila matoky fa hagnampe antika ty Jehovah?

⁹ Mitamà ty Jehovah tie hatoky aze tika. (Heb. 11:6) Misy fotoagne va’e hotreantika tie mafe ty raha atrehentikagne. Va’e hisalasala tika tie hagnampe antika vao ty Jehovah. Faie magnomey toky antika ty Baiboly fa afake “hanganike manda” tika noho ty herin’Andrianagnahare. (Sal. 18:29) Tsy toko’e hisalasala areke tika, fa hivavake am-pinoagne sady hatoky tie hamale ty vavake ataontika ty Jehovah.​—Vakio ty Jakoba 1:6, 7.

10. Ino ty kezake mila ataontika naho fa avy nangatake fagnampeagne amy i Jehovah tika? Magnomeza ohatse.

¹⁰ Mitamà ty Jehovah tie hanao raha mifagnarake amy i vavakey tika. Va’e misy rahalahy ohatse mangatake fagnampeagne amy i Jehovah mba hahazoa’e fotoagne tsy hiasagne, mba hagnatrehagne havoriambey. Akore ty hamalea i Jehovah ze vavake natao’e zay? Nagnomey herim-po aze ty Jehovah mba hahafaha’e hirehake indraike amy i sefo’ey. Faie mila manao raha i rahalahỳ, le miheregne mbeo. Mila mangatake mateteteteke ka varagne reke. Va’e mila soloa’e andro hafa i fotoagne tsy hiasa’ey. Va’e hanao asa fagnampe’e aza reke mba hahazoa’e izay.

11. Nagnino tika ro toko’e hivavake mateteke miomba ty raha manahiragne antika?

¹¹ Mitamà ty Jehovah fa horehafentikagne ama’e mateteke i olagney. (1 Tes. 5:17) Nirehake ty Jesosy fa tsy voatere ho azontika eo naho eo ty raha ila’e angatahentika. (Lioka 11:9) Faie ko kivy! Mivavaha mateteke avao. (Lioka 18:1-7) Naho rehafentika mateteke amy i Jehovah ty raha raike, le atorontika Aze fa lahibey amantika i rahay. Mampiseho ka zay tie matoky tika fa afake magnampe antika reke.

NAGNINO RO MILA OVANTIKA TY RAHA ILA’E NANGATAHENTIKA?

12. a) Ino ty fagnonteneagne mila dinehentika miomba ty raha nangatahentika, le ino ty anto’e? b) Akore ty hahafantarantika fa magnaja i Jehovah ty vavake ataontika? (Henteo ty efajoro tihoe “Trea amy ty Raha Angataheko vao tie Magnaja i Jehovah Raho?”)

¹² Naho ohatse tsy mivale ty vavake nataontika, le intoa misy fagnonteneagne telo azontika dinehegne. Voaloha’e: ‘Tena ilaeko vao i raha nangatahekoy?’ Mateteke tika ro mieretseretse tie haintika ty raha hahasoa antika. Faie va’e tsy hahasoa antika i raha nangatahentikagney. Naho nivavake miomba ty olagne raike tika, le va’e misy vahaolagne soa mandikoatse i nangatahentikagney azo andaminagne i olagney. Va’e tsy hifagnarake amy ty zoton’arofo i Jehovah ty raha angatahentika kindraike. (1 Jaona 5:14) Dineho heike moa i rae aman-drene taloha teo rey. Nangatake tamy i Jehovah iareo mba hijanogne agnate ty hamarenagne ao avao i ana iareoy. Hoe tena mete ze raha nangatahe iareo zay. Faie tsy mamoresé ndra ia ndra ia mba hanompo aze ty Jehovah. Ty tea’e le tihoe itikagne tsikiraidraike ro mifily ty hanompo aze, agnisa izay ty anantika. (Deot. 10:12, 13; 30:19, 20) Ty toko’e hangatahe iareo areke, le ty hagnampea i Jehovah iareo hahay hanohigne ty fo i ana iareoy, mba hahavy i ajajay ho tea i Jehovah.​—Ohab. 22:6; Efes. 6:4.

13. Arake ty Hebreo 4:16, ombia ty Jehovah ro hagnampe antika? Hazavao.

¹³ Izao ka ty fagnonteneagne faharoe: ‘Izao vao ty fotoagne mete soa amy i Jehovah mba hamalea’e aze?’ Va’e hieretseretse tika tie ilaentika meke i raha nangatahentikay. Faie naho ty maregne le i Jehovah ty mahay ty fotoagne mete soa hagnampea’e antika. (Vakio ty Hebreo 4:16.) Naho ohatse areke tsy voavale eo naho eo i vavakey, le va’e hieretseretse tika tie tsy namale izay ty Jehovah. Faie va’e mbe tsy amy izao ty fotoagne tea i Jehovah hamaleagne aze. Eretsereto ohatse i tanora nangatake ty mba hahasitragne azey. Naho ohatse ty Jehovah manao fahagagagne ama’e, le hirehake ty Satana tie noho i Jehovah nagnasitragne azey avao ty anto’e anompoa’e Aze. (Joba 1:9-11; 2:4) Fa nanondro fotoagne mba hagnafoagna’e o aretegneo ty Jehovah. (Isaia 33:24; Apok. 21:3, 4) Faie amparake ty hiavia izay, le tsy mitamà tika tie hagnasitragne antika amy ty fomba mahagaga reke. Afake mangatake amy i Jehovah areke i rahalahy tanoray mba homea’e hery naho fiadanan-tsaigne mba hiareta’e i aretegney naho hanohiza’e hanompo i Jehovah avao.​—Sal. 29:11.

14. Ino ty nianara’o boake amy ty tantara i Janice?

¹⁴ Tadidio ty tantara i Janice, i nangatake mba hanompo amy i Betela agney. Dime taogne tafara tatoy vaho nifanta’e tie akore ty fomba namalea i Jehovah i vavake natao’ey. Hoe reke: “Nampiasa ze fotoagne lava zay ty Jehovah mba hampianaragne naho hagnasoagne ty toetseko. Nitombo ty fatokisako aze sady nihasoa ka ty fianaragne raike ataoko. Nianarako ka fa afake ty ho fale avao raho, ndra inogn’ino ty asa ataoko hoahy i Jehovah.” Tafara tatoy ty Janice naho i vali’e, le nivoatendre ho mpiandraikitse faritse. Hoe reke naho fa mandineke ty lasa: “Namale i vavake nataokoy ty Jehovah, faie tsy tamy ty fomba nieretseretako aze. Faie tena nifale raho satria nahatsapa ty hatea’e naho ty hasoa fagnahi’e.”

15. Nagnino ro mila atao ankapobei’e ty vavake ataontika kindraike? (Henteo i sarey.)

¹⁵ Izao ty fagnonteneagne fahatelo: ‘Toko’e hangatake raha hafa vao raho?’ Soa tihoe manao vavake voafaritse soa, faie misy fotoagne le va’e soa ka naho atao amy ty ankapobei’e avao i vavakey, amy izay ho treantika tie ino ty ony i Jehovah fa mete amantika. Dineho moa i rahavave nangatake hagnatreke ty Sekoly ty Mpitory i Fanjakagneỳ. Te hagnatreke i sekolỳ reke amy izay afake magnampe amy ze toeragne mbe mila fagnampeagne. Afake mangatake amy i Jehovah areke reke mba hahatrea fomba hafa hampitomboa’e ty fanompoa’e. (Asa. 16:9, 10) Avy eo reke afake manao raha mifagnarake amy ze vavake zay, le magnontane ty mpiandraikitse faritse amy ty misy aze, kera misy fiangonagne mipay mpisava lalagne maro. Ndra ka afake magnontane ty birò i sampagne reke tie aia ty toeragne mbe mila mpitory maro.e

16. Rese lahatse amy ty ino tika?

¹⁶ Arake ty nianarantika, le afake matoky tika fa hamale ty vavake ataontika aman-katea naho ara-drare’e ty Jehovah. (Sal. 4:3; Isaia 30:18) Kindraike le tsy arake ty nieretseretantika aze ty vale’e. Faie tsy haligno i Jehovah i vavake nataontikay satria tena tea’e tika sady tsy hahafoe antika reke. (Sal. 9:10) Mikezaha avao areke “hatoky aze lognandro,” le voraho ama’e ze agnate fo’o ao.​—Sal. 62:8.