Fagnonteneagne Boake amo o Mpamakio
Misy rehake hoe izao ty amy Salamo 12:7 ao tie “hiambegne iareo rehe.” Ty “mahantra” amy ty andine’e faha 5 eo vao ty tea’e horehafegne sa ty “saontsy i Jehovah” rehafe ty andine’e 6?
Naho henteagne ty rehake magnodidigne, le ndaty ty tea o andine’e iohoe horehafegne.
Rehafe ty Salamo 12:1-4 fa “tsy misy sasa ty ndaty tsy mivalike.” Le hoe reke amy ty Salamo 12:5-7:
“‘Satria ampijalegne ty ndaty mijale,
Sady mitoreo ty mahantra,
‘Le hitsangagne raho sady hanao raha’ hoe ty Jehovah.
‘Hovonjeko iareo mba tsy ho azo ze magnambanembane iareo.’
Malio ty saontsy i Jehovah;
Manahake ty volafotsy niliovegne tagnate ty fatagne tane lietse zay, ie niliovegne impito.
O Jehovah, hiambegne iareo rehe;
Hiaro iareo tsikiraidraike nainai’e rehe mba tsy ho azo ty taranake toy.”
Mirehake ty raha saontsien’Andrianagnahare miomba ty ndaty mijale ty andine’e faha 5. Hamonje iareo Reke.
Mirehake ka ty andine’e faha 6 fa “malio ty saontsy i Jehovah”, ‘manahake ty volafotsy niliovegne.’ Hoe izay ty raha tsapantikagne miomba ty saontsy i Jehovah.—Sal. 18:30; 119:140.
Hoe ka ty Salamo 12:7: “O Jehovah, hiambegne iareo rehe, hiaro iareo tsikiraidraike nainai’e rehe mba tsy ho azo ty taranake toy.” Ia ty tondroe tihoe “iareo”?
Satria manonjohy ty rehake tihoe “saontsy i Jehovah” ty andine’e faha 7, le va’e hisy ty hirehake tie ty saontsin’Andrianagnahare zane ty tondroe ty rehake tihoe “iareo.” Fantantika fa toe niaro ty Saontsi’e ty Andrianagnahare ndra tie teo aza ty kezake natao ty ndaty mpanohetse aze mba handraragne naho hagnafoagnagne o Baibolio.—Isaia 40:8; 1 Pet. 1:25.
Faie maregne ty andine’e faha 5 satria toe miaro o ndatio ka ty Jehovah. I Jehovah le magnampe naho miaro sady mbe hanohy hanao izay avao amy ty “ndaty mijale” naho ty ndaty “mahantra.”—Joba 36:15; Sal. 6:4; 31:1, 2; 54:7; 145:20.
Naho izay areke, ia ty tondroe tihoe “iareo” amy ty andine’e faha 7 eo?
Trea amy ty rehake magnodidigne amo o salamo iohoe fa manondro ndaty ty rehake tihoe “iareo.”
Mirehake miomba ty mpanompo i Jehovah “tsy mivalike” fitahe ty ndaty raty fagnahy ty Davida amy ty fanomboha ty Salamo 12:1. Mirehake ty raha hatao i Jehovah mba hanoheragne ze ndaty mirehake raha raty ty andine’e magnarake. Magnomey toky antika i mpanao salamoy fa afake matoky ty raha hatao i Jehovah hoahy ty vahoa’e tika satria azo atokisagne ty saontsi’e.
Rehafe ty andine’e 7 tie hiambegne naho hiaro “iareo”, tsy ia zay fa ze ampijalé ty raty fagnahy ty Jehovah.
Trea amy ty Soratse Hebreo natao o Masoretao ty dika ty rehake tihoe “iareo.” Nampiasa ty rehake tihoe “itika” indroe ty dikan-drehake Grika Fito-polo amy ty andine’e faha 7 eo. Tsy maintsy ze ndaty nijale naho ore ty tea’e horehafegne. Fara’e, le mirehake miomba ty fiarovagne ty ndaty tsy mivalike ‘tsikiraidraike amy i taranakey’ naho amy ty ndaty “raty findesam-batagne” ty andine’e 7. (Sal. 12:7, 8) Ty rehake tihoe “iareo” ka ty nampiasaegne amy ty tapa’e amy ty andine’e 7 amy ty Soratse Masigne Hebreo, amy ty rehake Aramiana. Izao ty rehafegne ao: “O TOMPO, irehe ty hiaro ty ndaty maregne, hiambegne iareo amy ty taranake raty fagnahy toy nainai’e rehe.” Treantika boake amy ireo ty porofo fa tsy ty Saontsin’Andrianagnahare ty tea ty Salamo 12:7 horehafegne.
Noho izay, le mampitamà o andine’e iohoe fa hanao raha hoahy ty ndaty tsy mivalike ty Andrianagnahare.