1 Ko Mieretseretse ty Hisarake

INO TY DIKA IZAY?

Naho sambe tapa-kevetse hagnaja i voadim-panambaliagney ty mpivaly, le tsy hieretseretse tie tsy natao haharetse o fanambaliagneo. Sambe matoky iareo fa tsy hifagnenga ndra tie misy raha sarotse aza.

Misy mpivaly te hisarake faie miaretse ao avao satria kalagna ty nama’e ndra ty longo’e ndra ty mpiara-miasa ama’e. Faie tsy hieretseretse ty hisarake iareo naho tena mifankatea sady mifagnaja.

TORO LALA TY BAIBOLY: “Tsy toko’e hisintake amy ty vali’e ka ty lahilahy.”​—1 Korintianina 7:11.

“Tsy ho tsiela boseke amy ty vali’o rehe naho tapa-kevetse hagnaja i voady natao’oy. Ho mora ama’o ty hamela ty fahadisoa’e sady hiala tsiny ama’e. Ikezaho’areo vahagne avao ze olagne miseho fa ko atao’areo hampisarake anareo.”​—Sambo.

NAGNINO ZAY RO TENA ILAEGNE?

Naho tsy tapa-kevetse hagnaja i voady natao’ey o mpivalio, le va’e hipay tali’e hisarahagne avao naho fa misy olagne. Va’e hirehake iareo tie: “Tena tsy mete amako reke!”

“Misy ty vaho nifanambaly, le fa mieretseretse ty hisarake naho vaho misy olagne. Fa tsy tapa-kevetse hagnaja i voady natao’ey reke.”​—Soa.

INO TY AZO’O ATAO?

FANTARO RETOA

Naho fa mifamale nareo...

• Manegnegne vao rehe nanambaly aze?

• Magninofinofy miarake amy ty ndaty hafa vao rehe?

• Mirehake amy i vali’o vao rehe tie hagnenga aze ndra hipay ndaty hafa?

Manoa raha malaky rehe naho eka iaby ty vale ireo ndra ty ila’e ama’e.

MIREHAFA AMY I VALI’O

• Tsy le tapa-kevetse soa hagnaja i voady nataontikagney sasa vao itikagneo? Ino ty anto’e?

• Ino iaby ty azontikagne atao mba hahavy antikagne hagnaja i voadim-panambaliantikagney avao?

SOSO-KEVETSE

• Anorato rehake mamy kindraike ty vali’o

• Asio sare i vali’o ty am-birò’o ao

• Antsò sanandro reke naho fa am-piasagne agne rehe ndra nandeha lavitse

TORO LALA TY BAIBOLY: “Ao ze naharon’Andrianagnahare baogne, tsy ho sarahe o ndaty.”​—Matio 19:6.