3 MIKEZAHA HIFAGNAJA

INO TY DIKA IZAY?

Naho fa mifagnaja o mpivalio le mbe hifankatea avao iareo ndra tie tsy mitovy hevetse aza. Rehafe ze boke raike zay tie: ‘Tsy mizizo amy ty heve’e iareo ndra tie misy raha tsy mampifagnarake aza fa mifampirehake soa avao. Mitsanogne soa ty raike naho fa mirehake ty heve’e i raikey, sady mahatrea hevetse itovizagne iareo mirovaly.’

TORO LALA TY BAIBOLY: “O hatea zao ... tsy mipay ty hahasoa ty vata’e.”​—1 Korintianina 13:4, 5.

“Magnaja i valiko raho naho fa mihevetse aze ho sarobily. Tsy ataoko ze raha va’e tsy hahasoa aze ndra ty tokantragno’ay.”​—Mika.

NAGNINO ZAY RO TENA ILAEGNE?

Manjare mifagnomey tsiny, ndra mifampitsikike, ndra mifagnambanembane o mpivalio naho fa tsy mifagnaja. Trea o mpikarokeo fa ireo ty amantaragne tie va’e ho rava ty tokantragno raike.

“Tsy hatoky tegna sady tsy hagnaja azo sasa ty vali’o naho magnambanembane aze rehe ndra magnaratiraty aze, ndra manao somonga sare to ama’e. Hanimba ty tokantragno’areo zay.”​—Bilo.

INO TY AZO’O ATAO?

FANTARO RETOA

Dineho ty reha’areo mirovaly naho ty raha atao’areo agnate ty heregnandro raike, le eretsereto zao:

• ‘Impire raho ro nagninje i valiko, le impire raho ro nidera aze?’

• ‘Ino iaby ty raha nataoko mba hampisehoagne tie magnaja aze raho?’

MIREHAFA AMY I VALI’O

• Ino iaby ty rehake ndra fihetseke mampiseho fagnajagne?

• Ino iaby ty rehake ndra fihetseke tsy mampiseho fagnajagne?

SOSO-KEVETSE

• Manorata raha telo tea’o hatao i vali’o mba hagnaja’e azo. Ampanò hoe izay ka reke. Henteo ze nisorate’e naho fa avy eo, le ampagnenteo aze ka i azoy. Ikezaho atao ze voarehake amy i taratasỳ ao.

• Sorato amy ty taratasy tie ino iaby ty toetse soa i vali’o. Rehafo ama’e naho fa avy eo tie tena tea’o o toetse’e rehoe.

“Magnaja i valiko raho naho fa asehoko amy ty raha ataoko tie sarobily amako reke sady teako ho sambatse. Tsy voatere manao raha miambake bey raho fa rehake ndra fihetseke kede avao ty ataoko kindraike le fa mete.”​—Megan.

Tsy ampe areke ty mieretseretse tie fa magnaja i vali’o rehe. Ty vatantegna i vali’o ro toko’e hahatsapa tie magnaja aze rehe.

TORO LALA TY BAIBOLY: “Isikino ty fikokoagne naho ty fo miferenaigne, ty hasoa fagnahy, ty fiambaneagne, ty tsy fagnahy naho ty fahalignisagne.”​—Kolosianina 3:12, 13.