Akore ty Fomba Niarovagne i Jesosy?

MISY fotoagne ty Jehovah manao raha mahagaga mba hiarovagne ze ndaty mbe kedekede tsy afake miaro tegna. Va’e Hahatrea fomba raike anoa i Jehovah izay rehe naho mandeha ambanevohitse agne. Faie va’e mbe tsy ho azo’e hey zay amy ty voaloha’e.

Mahatrea vorogne mitiligne agnila’o eo rehe. Kay irekeo maratse. Kororohe’e avao i ela’e raikey sady milay reke naho fa miharine aze mbeo rehe. Heagne’o reke fe tsy mete azo’o. Faie tampoke teo, le nanjare nitiligne i vorogney. Kay i ela’ey io tsy naratse! Ino ty natao i vorogney naho fanta’o?

Kay nahaja’e tagnate i ahetse narine i nitiligna’ey teo ty ana’e mbe kedekede. Natahotse i vorogney kera ho trea’o i ana’ey le hampijale’o. Nanao sare naratse areke reke mba hanintonagne azo hisintake. Ia naho fanta’o ty afake miaro azo manahake o vorogne naho ty ana’e iohoe? Rehafe ty Baiboly, fa hoe manahake ty voromahery magnampe ty ana’e mbe kedekedeke ty Jehovah.​—Deoteronomia 32:11, 12.

I Jesosy, i Ana-dahi’e tena tea’ey ro fara’e sarobily ama’e. Fagnahy mahery manahake an-dRae’e ty Jesosy tamy ireke tan-dagnitse agney, le afake nikarakara ty tegna’e. Faie nipay fiarovagne reke naho fa naterake hanjare anak’ajaja tambone tane etoy.

Tsy maintsy nihabey naho nanjare lahilahy voririke ty Jesosy mba hagnantanterake i zoton’arofon’Andrianagnahare miomba azey. Faie natao i Satana ze hamonoagne aze mba tsy hahatanterake izay. Tena hafa ty fomba natao i Satana mba hamonoagne i Jesosy tamy ireke mbe nikedekedey naho ty fomba niarova i Jehovah aze. Tea’o vao ty haharey izay?

Natao i Satana nisy vasiagne raike namilepiletse ty tamy i lagnitsey tan-tignanagne agne naho fa naterake ty Jesosy. Nisy mpagnorike andro nandeha lavitse mba hagnorihagne o vasiagne iohoe hatrake a Jerosalema agne. Nagnontenea iareo ze toeragne hiterahagne i ho Mpanjaka o Jiosioy naho fa niavy agne iareo. “A Betlehema”ao, hatasa i ndaty nahafantatse ty raha rehafe ty Baiboly miomba ze raha zaỳ.​—Matio 2:1-6.

Rey i Heroda, i mpanjaka raty fagnahy ta Jerosalema agney ty miomba o mpanjaka vaovao naterake a Jerosalemao iohoe. Hoe reke tamy i mpagnorike andro rey: ‘Paliao’areo i ajajay, le miheregna amako atoy nareo hirehake ty vaovao miomba aze.’ Nagnino ro tea i Heroda ho fantatse ty nisy i Jesosy? Satria nialogne reke le te hamono aze!

Akore ty niarovan’Andrianagnahare i Ana’ey? Nanao fagnomezagne hoahy i Jesosy i mpagnorike andro rey naho fa nahatrea aze. Nampitao iareo tamy ty nofy ty Andrianagnahare naho fa tafara tatoy mba tsy hiheregne amy i Heroda agne iareo. Lalagne hafa areke ty nandehana iareo naho fa noly fa tsy niary ta Jerosalema agne. Tena niboseke ty Heroda naho fa nihai’e tie tsy nimbama’e mbeo i mpagnorike andro rey. Natao’e ze hamonoagne i Jesosy, le nampamonoe’e iaby ze ajaja latsake ty roe taogne ta Jerosalema tao! Faie fa tsy tao ty Jesosy tamy izay.

Akore ty nilaisa i Jesosy naho fanta’o? Nampilaise i Jehovah ta Ejipta agne ty Josefa valy i Maria naho fa nandeha noly i mpagnorike andro rey. Tsy natahoragne ho vonoe i Heroda raty fagnahy ty Jesosy naho fa tagne. Misy raha hafa ka nampanoe i Jehovah i Josefa naho fa niavy ta Ejipta agne niarake amy i Jesosy reke naho i Maria. Nisaontsie’e tamy ty alala ty nofy tamy i Josefa fa toko’e hifindra a Nazareta agne iareo. Amy izay tsy hisy loza hanjò i Jesosy naho fa agne.​—Matio 2:7-23.

Trea’o vao ty fomba niarova i Jehovah i Ana’ey? Naho ty heve’o, ia ty manahake i vorogne kedekede naeta i rene’ey tagnate akataoy ndra manahake i Jesosy mbe nikedey? Tsy irehe vao? Satria misy ty te hanimba azo ka. Ia zay naho fanta’o?

Rehafe ty Baiboly fa hoe liona miregnetse te hihinagne antikagne ty Satana. O Biby kedekedeo ty mateteke tea o lionao hohanegne. Hoe izay ka ty Satana naho o demonia’eo satria o ajajao ty tea’e ho simbaegne. (1 Petera 5:8) Faie mahery noho i Satana ty Jehovah. Afake miaro ty ana’e ty Jehovah sady afake mandrava ze raha raty atao i Satana mba hanimbagne iareo.

Misy raha andrisiha i Devoly naho o demoniao hataontikagne arake ty amy Toko 10 ao. Inogne iaby zay naho tadidi’o? Ie, risihe’e tikagne hila ty ndaty tsy valintikagne, ie amy izao saontsien’Andrianagnahare tie raty zay. Faie ia avao ty toko’e hifampila? Ie ndaty bey roe lahilahy naho ampela, vita mariaze.

Faie mampalahelo fa misy ndaty bey te hila ajaja. Mampiana-draty ty ajaja lahilahy naho ty ajaja ampela i raha rey. Manomboke mampiasa amy ty fomba raty ty maha lahilahy aze naho ty maha ampela aze ka o ajajao. Izay ty niseho taloha tamy ty tanà i Sodoma tao. Rehafe ty Baiboly fa ni-te hila i lahilahy niavy mba hitilike i Lota rey ty ndaty tamy i tanàgney tao ‘hatrake tamy ty ajaja naho ty antetse.’​—Genesisy 19:4, 5.

Nila fiarovagne ty Jesosy. Mila arovagne amy ty ndaty bey naho ty ajaja ka rehe naho te hila azo iareo. Mateteke i ndaty rey sare miseho ho nama’o avao. Mete hirehake reke fa homea’e raha rehe naho tsy mitantara amy ty ndaty hafa tie te hila azo reke. Faie tea tegna o ndaty iohoe, manahake i Satana naho i demonia’e rey, le te hahazo fahafinaretagne avao. Mila ajaja reke mba hahazoa’e ze fahafinaretagne zay. Tena raty io!

Fanta’o vao tie ino ty mete hatao’e amy izay? Va’e te hikasikasike ty maha ampela azo reke ndra ty vata’o ndra akasikasi’e amy ty azo ty maha lahilahy aze ndra ty maha ampela aze. Faie tsy toko’e hisy henga’o hihisa ty maha lahilahy azo ndra ty ty maha ampela azo ndra ty zai’o ndra ty zoke’o ndra i baba’o ndra i rene’o aza. Tsy azo ty ndaty hafa kitikitihegne ty maha lahilahy azo ndra ty maha ampela azo.

Akore ty hiarova’o ty vata’o amy ty ndaty manao raha raty hoe izay? Voaloha’e, le ko engagne hisy hihisa ty maha lahilahy azo ndra ty maha ampela azo. Naho misy te hanao izay, le rehafo mafe tie: “Mitoboha soa avao rehe! Le ambarako rehe!” Naho mirehake i ndatỳ tie irehe ro hibosehagne, le ko mino izay satria tsy maregne zay. Le avy le ambarao amy ty rae aman-drene’o i ndatỳ ndra ia ndra ia reke. Tantarao ze raha natao’e ndra tie mirehake aza reke fa tsy hisy hahafantatse i rahay afa-tsy irehe naho ireke avao. Mandehana milay, le tantarao ze raha natao’e ndra tie mampitamà hagnomey raha soa azo reke ndra magnorohoro azo.

Ko matahotse fa mitaoa avao. Tsanogno ty rae aman-drene’o naho fa mampitao ze ndaty ndra ze toeragne va’e hagnoho-doza azo. Azo inoagne fa tsy ho azo ty ndaty raty va’e hanimba azo rehe naho mitao.