Magnomey Voninahitse An’Andrianagnahare ty Fankalazagne ty Mahakama Hariva i Andriatompo

LINILY mba Hahatsiaro ty nimateza i Kirisity ty Kirisitianagne. “Mahakama Hariva i Andriatompo” ka ty irehafagne aze. (1 Korintianina 11:20) Inogne ty anto’e maha lahibey ty fanoagne aze? Ombia ty toko’e hankalazagne aze, sady akore ty fanoagne aze?

Nanomboke nankalaza aze voaloha’e ty Jesosy Kirisity tamy ty hale ty Pasake jiosy taogne 33. Isan-taogne avao ty nankazalagne aze, le isake faha-14 Nisana, volagne jiosy. Akore ty nahafantara o Jiosio o date iohoe? Naho fa 21 Marisa (ndra 22 Marisa), le eo amy ty 12 lera ty halava ty andro, sady 12 lera ka ty halava ty halegne. Ty iem-bolagne voaloha’e marine amo o andro iohoe ro voaloha’e amy ty volagne Nisana. Le 13 andro tafara izay ty nankalazagne i Pasakey.

Nankalaza Pasake niharo tamo o apositoli’eo ty Jesosy, sady nandroake i Jodasy Isikariota. Naho fa nivita’e zay, vaho izay nanomboke ty fankalazagne ty Mahakama Hariva i Andriatompo reke. Io ty solo ty Pasake fanoe o Jiosio, le toko’e hankalazaegne isan-taogne.

Hoe ty Fitaliliantsoa i Matio: “Naho mbe tagnate i fihinagney iareo, le nandrambe mofo ty Jesosy. Naho fa nivita ty vavake nanoe’e, le tinapa’e i mofoy sady nimea’e i mpianatse rey, vaho hoe reke: ‘Rambeso toy, le hano. Intoy ty vatako.’ Nandrambe kope ka reke, le nimei’e iareo i kopey naho fa nivita’e ty fisaoragne an’Andrianagnahare, sady hoe reke: ‘Minoma amy intoy nareo iaby. Fa intoy ty lioko, sady “lio ty fagnina” hatsopake hoahy ty maro toy, ho fandiovan-kakeo.’ ”—Matio 26:26-28.

Misy mino fa novà i Jesosy ho nofo’e naho ho lio’e vata’e i mofoy naho i divaỳ. Ty vata’e amy izao tsy mba nisy nagnafahagne naho fa nizara i mofoy reke. Nihinagne ty vata’e naho ninogne ty lio’e vata’e vao i apositoli’e rey? Tsy izay. Mira amy ty homagne ndaty ty fanoagne izay, sady fandikagne ty lilin’Andrianagnahare. (Genesisy 9:3, 4; Levitikosy 17:10) Hoe ty Jesosy, amy Lioka 22:20 ao: “Ty kope toy ro fagnina vaovao mioregne amy ty lioko hatsopake ho anareo.” Le i kopey vata’e vao ro mete atao “fagnina vaovao”? Tsy maregne zay, fa tsy hay rambesegne tagnagne o fagnina ndra lahatse zao.

Misy heve’e agn’ ohatse o vatagne naho divay rehafegne iohoe. Mifanandrife amy ty vata i Kirisity voririke i mofoy. Mofo sisa tsy lany tamy ty hanegne tamy i Pasakey ty nampiasae i Jesosy. Tsy nisy masirasira, ndra karibonate o mofo iohoe. (Eksodosy 12:8) Mirehake haratiagne ndra hakeo tihoe karibonate agnate Baiboly ao. I mofoy mifanandrife amy ty vata i Jesosy voririke natao sorogne. Tsy nanan-tahigne reke.—Matio 16:11, 12; 1 Korintianina 5:6, 7; 1 Petera 2:22; 1 Jaona 2:1, 2.

Mifanandrife amy ty lio i Jesosy ka i divay menay. Izay ty nampisy heri’e i fagnina vaovaoy. Nirehake ty Jesosy fa nampitsopake ty lio’e mba hahazoa o ndatio “fandiovan-kakeo” reke. Izay ty mahavy o ndatio halio agnatrehan’Andrianagnahare, sady ho agnisa ty fagnina vaovao miharo amy i Jehovah. (Hebreo 9:14; 10:16, 17) Ty voka’e, nanjary misy Kirisitianagne tsy mivalike 144 000 ty ho an-dagnitse agne. Ho mpanjaka naho mpisorogne iareo naho fa agne, le hinday fitahiagne hoahy ze kila ndaty.—Genesisy 22:18; Jeremia 31:31-33; 1 Petera 2:9; Apokalypsy 5:9, 10; 14:1-3.

Ia ty toko’e hihinagne ty mofo naho hinogne ty divay i Fahatsiarovagney? Ze agnisa i fagnina vaovaoy avao. Tsy ia zay fa ze ho an-dagnitse agne. Ty fagnahy masin’Andrianagnahare ty mahavy iareo hagneke fa jinobogne ho mpanjaka an-dagnitse agne vata’e iareo. (Romanina 8:16) Nanoa i Jesosy fagnina miomba i Fanjakagney ka iareo.—Lioka 22:29.

Akore ka ty amy ty ndaty mitamà havelogne nainai’e amy ty Paradisa an-tane etoy? Mankalaza ty Mahakama Hariva i Andriatompo iareo fa magnorike ty lily i Jesosy. Faie tsy homagne i mofoy naho tsy minogne i divaỳ iareo fa magnatreke avao. Indraike isan-taogne avao ty ankalazà ty Vavaolombelo i Jehovah ty Mahakama Hariva i Andriatompo, le isake 14 Nisana afara ty itsofora i androy. Vatan-draha amy ty Kirisitianagne ty fankalazagne aze, ndra tie agnarivo’e avao ty mirehake fa mitamà ho an-dagnitse agne. Mahatsiaro ty hatea tsifotofoto natoro i Jehovah naho i Jesosy ze kila ndaty amo o andro iohoe.—Jaona 3:16.