Teà’o vao ty Hahafantatse ty Maregne?

TY MAREGNE miomba ty inogne? Miomba ty fagnonteneagne lahibey nampivali-doha o ndatio hatrake amy izay. Va’e fa nieretseretse varagne rehe tie:

• Midare antikagne vata’e vao ty Andrianagnahare?

• Ho afake vao ty aly naho ty fijaleagne?

• Manao akore o ndatio naho fa mate?

• Mbe hifankatrea amy ty longontikagne fa nimate vao tikagne?

• Akore ty ahazoako valem-bavake?

• Akore ty hahasambatse ahy?

Aia ty hahatreavagne ty vale i reo? Va’e misy boke maro ho trea’o magnomey ty vale o fagnonteneagne rehoeke. Faie mifanimpake ty vale’e mey iareo. Ty boke ila’e ka hoe mirehake ty maregne faie tsiela lany date, le hasoaegne indraike ndra soloagne.

Misy boke raike magnomey ty vale’e maregne. Tsy misy vande ty agnate’ao. Hoe ty Jesosy Kirisity naho fa nivavake taman’Andrianagnahare: “Ty saontsi’o ro hamarenagne.” (Jaona 17:17) Ty Baiboly Masigne ty anognonagne o Saontsi’eo amy izao. Ho vazoho’o atoagne ty ila’e amy ty vale’e maregne sady mazava mey ty Baiboly miomba i fagnonteneagne amboneo rehoeke.

Midare Antikagne Vata’e vao ty Andrianagnahare?

TY MAHAVY I FAGNONTENEAGNE ZAY: Feno hampiarotegne naho raha vilagne ty tontolo toy. Misy fivavahagne magnanatse fa zoton’arofon’ Andrianagnahare ty hijaleantikagne.

INOGNE TY RAHA REHAFE TY BAIBOLY? Tsy manao raty ty Andrianagnahare. Hoe ty Joba 34:10: ‘Faly i Andrianagnahare vata’ey ty hanao raty, sady faly i Tompo ty Herỳ ty hanao raha vilagne.’ Soa ty raha safirien’Andrianagnahare hoahy o ndatio. Izay ty anto’e nampianara i Jesosy antikagne hivavake tie: “Rae’ay amy i lagnitsey ao . . . Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne!” (Matio 6:9, 10) Midare antikagne vata’e ty Andrianagnahare kanao miasa mafe hiavia ty raha nisafirie’e.—Jaona 3:16.

Henteo ka ty Genesisy 1:26-28 naho ty Jakoba 1:13 vaho ty 1 Petera 5:6, 7.

Ho Afake vao ty Aly Naho ty Fijaleagne?

TY MAHAVY I FAGNONTENEAGNE ZAY: Mamono ndaty maro tsy vatse isahegne ty aly hatrake amy izao. Misy voka’e amantikagne ka ty fijaleagne.

INOGNE TY RAHA REHAFE TY BAIBOLY? Mampitamà ty Andrianagnahare fa hampisy fieragneragnagne magneneke ty tane toy iaby. Tsy “hianatse aly” sasa ze ndaty fehe i Fanjakà’e an-dagnitse agney. “Hanefe ty fibira’e ho lasarìgne iareo.” (Isaia 2:4) Hofoagnan’Andrianagnahare ze raha vilagne naho ty fijaleagne. Mampitamà ty Baiboly fa: “Hofafa’e ze ranomaso amy ty maso iareo, fa tsy hisy sasa ty fate, ty fahaferenaigne ndra ty toreo ndra ty fangirifiriagne, fa tsy ho eo iaby ty raha taloha.” (Apokalypsy 21:3, 4) Agnate izay ty raha vilagne naho ty fijaleagne amy izao.

Henteo ka ty Salamo 37:10, 11; 46:9 naho ty Mika 4:1-4.

Manao Akore o Ndatio Naho fa Mate?

TY MAHAVY I FAGNONTENEAGNE ZAY: Maro ty fivavahagne mampianatse fa misy fagnahy mbe velogne ty agnate o ndatio ao naho fa mate. Ty ila’e ka mino fa mbe mitahy ndra magnisy raty ty ndaty velogne o ndaty nimateo. Misy ka mieretseretse tie magnasaze ty ndaty raty fagnahy ty Andrianagnahare, le oroa’e agn’afobey iareo hijalea’e nainai’e.

INOGNE TY RAHA REHAFE TY BAIBOLY? Tsy misy aigne sasa ty ndaty naho fa mate. Tsy maharey, tsy mahatrea, tsy mahay mirehake ndra mieretseretse reke. Hoe ty Mpitoriteny 9:5: “Ty mate tsy misy raha rendre’e.” A naho izay areke, le tsy magnisy raty ty ndaty velogne ndra magnampe aze ty mate.—Salamo 146:3, 4.

Henteo ka ty Genesisy 3:19 naho ty Mpitoriteny 9:6, 10.

Mbe Hifankatrea amy ty Longontikagne fa Nimate vao Tikagne?

TY MAHAVY I FAGNONTENEAGNE ZAY: Teàntikagne ty ho velogne miharo amy ty longontikagne naho ty ragnentikagne. Tsy diso tikagne naho magniry mafe hahatrea ty longontikagne fa nimate.

INOGNE TY RAHA REHAFE TY BAIBOLY? Hovelomegne indraike ty akababà o ndaty fa nimateo. Nampitamà ty Jesosy fa ‘hiakatse boake ao ze ndaty an-kibory agne.’ (Jaona 5:28, 29) Hiaigne nainai’e iareo naho fa paradisa ty tane toy, fa izay ty raha nisafirie i Jehovah tamy ty voaloha’e. (Lioka 23:43) Tsy harare sasa sady ho velogne nainai’e ze ndaty mete anaragne. Hoe ty Baiboly: “Ze ndaty maren-tane ro handova ty tane toy, le ho velogne nainai’e.”—Salamo 37:29.

Henteo ka ty Joba 14:14, 15 naho ty Lioka 7:11-17 vaho ty Asan’ny Apostoly 24:15.

Akore ty Ahazoako Valem-bavake?

TY MAHAVY I FAGNONTENEAGNE ZAY: Sambe mivavake iaby ty akababà ty ndaty amo o fivavahagneo. Faie maro ty mieretseretse fa tsy mahazo valem-bavake.

INOGNE TY RAHA REHAFE TY BAIBOLY? Nampianatse antikagne ty Jesosy mba tsy hanao tsianjere avao naho fa mivavake. Hoe reke: “Naho fa mivavake nareo ko raha raike avao ro aherekeregne.” (Matio 6:7) Toko’e hifanandrife amy ty raha teàn’Andrianagnahare ty vavake ataontikagne vaho izay tsatsihe’e. Toko’e hahafantatse ty zoton’arofo’e heike tikagne soa tie mifanandrife amy izay ty vavake anoentikagne. Hoe ty 1 Jaona 5:14: “Ndra inogninogne angatahentikagne naho mifanandrife amy ty zoton’arofo’e, le mitsatsike antikagne reke.”

Henteo ka ty Salamo 65:2 naho ty Jaona 14:6, 14 vaho ty 1 Jaona 3:22.

Akore ty Hahasambatse Ahy?

TY MAHAVY I FAGNONTENEAGNE ZAY: Ndaty maro ty mino fa mahasambatse o dralao naho o lazao vaho ty hampela soa ndra ty hatovolahy. Le mikezake mafe iareo hanagne o raha rehoeke, faie tsy sambatse.

INOGNE TY RAHA REHAFE TY BAIBOLY? Natoro i Jesosy ty raha mahasambatse. Hoe reke: “Sambatse ze mahatiaro fa mipay an’Andrianagnahare.” (Matio 5:3) Tsy ho sambatse tikagne naho tsy mikezake hahazo ze raha fara’e lahibey. Tsy inogne zay fa ty fahafantaragne ty maregne miomba an’Andrianagnahare naho ty raha safirie’e miomba antikagne. Agnate Baiboly ao ty misy izay. Naho fantantikagne zay, le hahay hamantatse ty raha lahibey naho ty raha tsy lahibey tikagne. Hisy dika’e ka ty fiaignantikagne naho magnorike ty raha maregne rehafe ty Baiboly tikagne naho fa hanapa-kevetse ndra hanao raha hafa.—Lioka 11:28.

Henteo ka ty Ohabolana 3:5, 6, 13-18 naho ty 1 Timoty 6:9, 10.

Mbe ty tsiampe amy ty valem-pagnonteagne rehafe ty Baiboly i enegne nivazohontikagne teo rey. Mbe mipay fagnazavagne maro vao rehe? Tsy kandrahaegne amy izay rehe naho karaza o ndaty “mahatiaro fa mipay an’Andrianagnahare.” Va’e teà’o ho fantatse ohatse tie: ‘Naho midare antikagne vata’e ty Andrianagnahare, nagninogne o haratiagneo naho o fijaleagneo ie mbe enga’e hisio? Akore ty hahavy anay mirofoko hifankahay soa?’ Magnomey vale’e maregne naho mahafa-po miomba izay naho ty maro hafa ty Baiboly.

Faie maro ty mahimahigne naho fa handineke o Baibolio. Bey loatse hoe iareo i bokey, le sarotse ty mahazo ty raha rehafe’e. Naho mipay ty vale ty fagnonteneagne manahiragne azo agnate Baiboly ao rehe, le hagnampe azo ty Vavaolombelo i Jehovah.

Hagnomey azo ty boke Inogne Vata’e ty Raha Ampianare ty Baiboly? (malagasy) reke. Natao hoahy ty ndaty maro asa o boke iohoeke hagnampeagne aze hahatrea ty vale’e mazava rehafe ty Baiboly miomba ty fagnonteneagne lahibey ila’e. Mangatake azo hiharo fianatse Baiboly ama’e ka ty Vavaolombelo i Jehovah. Azo atao an-tragno’o agne i fianaragney ndra amy ze tanàgne tea’o. Vavaolombelogne fa za-draha mitoboke marine azo ty hiharo dineke Baiboly ama’o agnate ty lera tsiampe sakeregnandro. Nahasoa ndaty antapetrisa’e amy ty tane toy iaby ty fanoagne izay. Maro ty nagneke tie: “Nahatrea ty hamarenagne raho!”

Sarobily ty hamarenagne agnate Baiboly ao. Izay ty mahavy antikagne ho votsotse amy ty finoagne raha vande, ty tahotse, tsy ho lany dineke, manan-draha tamaegne vaho kendregne sady fale. Hoe ty Jesosy: “Ho fanta’areo ty maregne, le ty maregne hamotsotse anareo.”—Jaona 8:32