Tea’o ho Sambatse vao ty Keleia’o?

1. Nagnino ty mpivaly ro toko’e hisoratse amy ty fanjakagne?

Managne talily soa hoahy ty keleiagne ty Jehovah. Andrianagnahare falefale reke, le tea’e ho falefale ka ty keleiagne. (1 Timoty 1:11) Toe i reke ty nampisy o fanambaliagneo. Mila misoratse ty mpivaly naho te hifampatoky naho hifandrae am- po. Ho tsapa ty ana iareo ka amy izay, tie mahazo fiarovagne iareo sady teagne. Lily o fanjakagneo ka ty fisoratagne. Magnaja izay ty Kristiana, le misoratse amy ty fanjakagne naho fa hanambaly.​—Vakio Lioka 2:1, 4, 5.

Tsy fihisagne ty nanoan’Andrianagnahare o fanambaliagneo fa haharetse nainai’e. Le ty vatan-tegna i Jehovah ty mandily ty Kristiana mba tsy hivalike amy ty vali’e. (Hebreo 13:4) Heje’e ty fisarahagne. (Malakia 2:16) Faie enga’e hisarake ty Kristiana, naho nijangajanga ty vali’e. Afake manambaly ndaty hafa reke naho mbe magniry hanao izay.​—Vakio Matio 19:3-6, 9.

2. Inogne ty toko’e hatao ty mpivaly mba hifandrae soa?

Natao i Jehovah hifameno ty lahilahy naho ty ampela, sady sambe managne ty andraiki’e. (Genesisy 2:18) Ty lahilahy ro loha’e amy ty keleiagne. I reke ty managne andraikitse hamelogne ty keleiagne, sady hampianatse iareo ty Saontsin’Andrianagnahare. Toko’e ho tea ty vali’e naho hahafoe tegna hoahy ty keleia’e reke. Mila mifankatea naho mifagnaja ty mpivaly. Sambe tsy voririke iareo, le toko’e hifandefetse. Izay ro mahasambatse ty tokatragno.​—Vakio Efesianina 4:31, 32; 5:22-25, 33; 1 Petera 3:7.

3. Toko’e hisarake vao ty mpivaly naho fa tsy mifagnarake?

Toko’e hifankatea avao ty mpivaly ndra tie misy ty olagne. (1 Korintianina 13:4, 5) Naho fa misy ty raha manahiragne an-tokatragno ao, le tsy mandrisike ty mpivaly hisarake ty Baiboly. Tsy izay ty vahaolagne.​—Vakio 1 Korintianina 7:10-13.

4. Ry ajaja, tean’Andrianagnahare hanao akore nareo?

Tea’e ho sambatse nareo. Mei’e torohevetse soa nareo mba hahafinaritse ty fahatanora’areo. Tea’e hankatò rae aman-drene ka nareo, satria hendre mihoatse anareo iareo sady fa maro raha fantatse. (Kolosianina 3:20) Tea i Jehovah ho tsapa’areo fa mahafale ty manompo aze naho fa ampihare’areo ty raha ampianare i Ana’ey.​—Vakio Mpitoriteny 11:9–12:1; Matio 19:13-15; 21:15, 16.

5. Ry rae aman-drene, akore ty hahasambatse ty ana’areo?

Toko’e hiasa mafe nareo mba hahazoa ty ana’areo hanegne, tragno naho akanjo. (1 Timoty 5:8) Faie tsy ho sambatse ty ana’areo naho tsy ampianare’areo ho tea an’Andrianagnahare naho hanahake aze. (Efesianina 6:4) Ho tahafe ty ana’areo ka ty modely mei’areo. Naho hita iareo ty hatea’areo an’Andrianagnahare, le hisy voka’e amy iareo zay. Hanjare hanagne toe-tsaigne soa reke, naho ampianare’areo ty Saontsin’Andrianagnahare.​—Vakio Deoteronomia 6:4-7; Ohabolana 22:6.

Risiho hanao raha soa ty ajaja, sady derao reke amy ze raha vita’e. Toko’e hanaregne naho hahitsy ka ty ajaja. Izay ty miaro aze tsy harengerenge ndra ho azon-doza. (Ohabolana 22:15) Faie tsy toko’e hasiake loatse nareo naho fa magnanatse aze.​—Vakio Kolosianina 3:21.

Mampiboake boke maro misy torohevetse ara-baiboly ty Vavolombelo i Jehovah, mba hagnampeagne ty rae aman-drene naho ty anake.​—Vakio Salamo 19:7, 11.