Tea’o vao ty Hiharine An’Andrianagnahare?

1. Mijanjigne ze kila vavake vao ty Andrianagnahare?

Tean’Andrianagnahare hivavake ama’e ty karaza o ndaty iaby. (Salamo 65:2) Faie tsy ty vavake iaby ro janjigne’e. Naho misy lahilahy raike mampijale valy ohatse, le tsy janjignen’Andrianagnahare ty vavake anoe’e. (1 Petera 3:7) Tsy nijanjigne’e ka ty vavake nanoe o Israelitao, satria nizatse nanao raty iareo. Faie ndra tie nanao fahotagne lahibey ty ndaty raike faie mibebake ama’e, le hijanjigne aze ty Andrianagnahare. Tombotsoa lahibey ty mivavake.​—Vakio Isaia 1:15; 55:7.

Henteo ty video Mijanjigne ze Kila Vavake vao ty Andrianagnahare?

2. Ia ty toko’e hivavahagne, le akore ty atao?

I Jehovah raike avao ty toko’e hivavahagne, satria ie ty Andrianagnahare maregne sady Mpamorogne. (Matio 4:10; 6:9) Mpanota ka tikagne, le toko’e hivavake amy ty agnara i Jesosy, satria nahafoe ty fiai’e reke mba hagnafahagne ty fahotantikagne. (Jaona 14:6) Tsy tea i Jehovah hanao tsianjery ndra hagnerekeregne ze vavake fa vita soratse tikagne. Tea’e hivavake ama’e vokatse ty fontikagne tika.​—Vakio Matio 6:7; Filipianina 4:6, 7.

Vazoho i Jehovah ty vavake anoentikagne, ndra tie bisibisihegne avao. (1 Samoela 1:12, 13) Tea’e hivavake ama’e isan’andro tikagne, ndra tie vaho mifoha, ndra handeha hiroro, ndra aloha ty hihinanagne, ndra misy olagne, ndra ombia ndra ombia.​—Vakio Salamo 55:22; Matio 15:36.

3. Inogne ty mahavy o Kristianao miarake mivory?

Ndaty maro amy hinane zao ro tsy mino an’Andrianagnahare, sady mikizake naho fa irehafagne tie ho paradisa ty tane toy. (2 Timoty 3:1, 4; 2 Petera 3:3, 13) Mila mifampahery amy ty mpiharo finoagne areke tikagne naho te hiharine i Jehovah.​—Vakio Hebreo 10:24, 25.

Hiharine i Jehovah tikagne, naho miharo amy ze ndaty tea aze. Hampahery azo vata’e ty fivoria ty Vavolombelo i Jehovah, satria hahatrea ndaty manam-pinoagne rehe agne.​—Vakio Romanina 1:11, 12.

4. Akore ty hahavy azo hiharine i Jehovah?

Dineho soa ty raha nianara’o boake amy ty Saontsi’eo ao. Eretsereto soa ty raha atao’e naho ty toroheve’e vaho ty raha ampitamae’e. Naho misaintsaigne izay rehe sady mivavake, le ho tsapa’o fa hendre sady bey hatea ty Jehovah.​—Vakio Josoa 1:8; Salamo 1:1-3.

Tsy maintsy mino naho matoky aze ka rehe, naho te hiharine aze. Manahake ty folera mila tondrahegne rano ty finoagne, fa tsy mitombo amy izao avao. Saintsaigno lognandro areke tie inogne ty raha inoa’o sady nagnino rehe ro mino izay.​—Vakio Matio 4:4; Hebreo 11:1, 6.

5. Inogne ty soa ho azo’o?

Hiaro naho hikarakara azo ty Jehovah. Hagnampe azo reke mba tsy hihegne ty finoa’o, sady hahazo havelogne nainai’e rehe. (Salamo 91:1, 2, 7-10) Ho salama naho ho sambatse ka rehe, naho magnorike ty fampitaoa’e. Atoro’e azo ty fiaignagne fara’e soa.​—Vakio Salamo 73:27, 28; Jakoba 4:4, 8.