Tsikotsiko Nirehafegne Tamantikagne

Fa nisy ndaty nirehake tsiko tama’o vao?...a Mirehake tsiko tsy rehafegne atao tihoeke “raha masigne mietake” ty Baiboly. Masigne o tsiko iohoeke fa boake aman’Andrianagnahare. Mietake ka o tsiko iohoeke fa mbe tsy nifanta o ndatio ty miomba aze. Ndra ty anjely te hahafantatse soa ty miomba aze. Teà’o ho fantatse ka vao o raha mietake iohoeke?...

I Adama naho i Eva ty ndaty namboare i Jehovah voaloha’e. Nampitobohen’Andrianagnahare tamy ty tane paradisa iareo. Tonda i Edena ty agnara’e. Naho nimeten’Andrianagnahare anaragne iareo, le ho nameno ty tane toy i paradisay. Ho niaigne tsy misy fara’e amy paradisay ao ka iareo miroanake. Faie fanta’o vao ty raha nanoe i Adama naho i Eva?...

Tsy nagnorike ty fagnanaran’Andrianagnahare ty Adama naho i Eva. Izay ty mahavy ty tane toy tsy paradisa amy hinaneke zao. Faie nisaontsy ty Andrianagnahare fa hahere’e ho paradisa indraike ty tane toy. Izay tikagne vaho ho sambatse naho hiaigne tsy misy fara’e. Akore ty hampisy izay? Ty haela izay tsy nisy ndaty nahafantatse aze. Izay maha tsikotsiko azeo.

Nagnambara ty miomba o tsikotsiko iohoeke ty Jesosy naho fa niavy an-tane etoy. Fanjakàn’Andrianagnahare ty nagnazava’e aze. Nirehake tamo o ndatio reke hivavake mba hiavia o Fanjakàgne iohoeke. O Fanjakàgne iohoeke avao ro hagnova ty tane toy ho paradisa.

Mahafale azo vao ty nahafantatse o tsiko iohoeke?... Ko haligno’o fa ze ndaty mete i Jehovah anaragne avao ro hiaigne amy Paradisay ao. Rehafe ty Baiboly fa maro ty ndaty nimete i Jehovah anaragne. Te hianatse ty miomba o ndaty rehoeke vao rehe?... Andao tikagne hagnente ty ila’e amo ndaty rehoeke naho ty hanahafantikagne iareo.