Akore ty Hahasoa Filongoagne Azo amy ty Longo’o?

Manjary keleiagne vaovao ty ndaty roe naho fa mpivaly. Ndra tie ho teà’o naho hiasia’o ty rae’o naho i rene’o, le i vali’o ty fara izay ty ho teà’o ambone tane etoy. Va’e ho sarotse amy ty longo’o ila’e ty hagneke izay. Faie hagnampe anareo mirovaly hahay mampitsahatsahatse ty fanoroagne agnate Baiboly ao. Izay ty hahavy anareo ho soa filongoagne amy ty longo’areo sady hampifankatea anareo mirovaly.

1 KO RATY ERETSERETSE

INOGNE TY RAHA REHAFE TY BAIBOLY? “Iasio ty rae amy ty rene.” (Efesianina 6:2) Toko’e hiasy ty rae’o amy ty rene’o avao rehe ndra bey ndra kede. Ko haligno fa toko’e hikolokolo ty rae’e amy ty rene’e ty vali’o, fa anake. Ko mieretseretse rehe tie niazon-drafoza’o i hatea ho niazoy fa “o hatea zao tsy mialogne.”—1 Korintianina 13:4; Galatianina 5:26.

INOGNE TY TOKO’E HATAO’O?

• Ko mampitombo rehake. Ohatse: “Tindritindria o longo’ò avao raho!” Ndra “hejen-drene’o iaby ze raha anoeko!”

• Fantaro soa ty findesa i vali’o i rae’e naho i rene’e

2 KO ATAO EKA IABY ZE RAHA HIRIKE

INOGNE TY RAHA REHAFE TY BAIBOLY? “Hienga ty rae’e naho ty rene’e o lahilahio le hipiteke amy ty vali’e, vaho minjary nofotse raike iareo.” (Genesisy 2:24) Va’e hanagne eretseretse ty rae amy ty rene tie mbe andraiki’e rehe ndra tie fa manambaly. Hafara’e iareo va’e hizilike amy ty fanambalia’areo.

Laharo’areo mirovaly ty raha toko’e hiziliha iareo naho ty tsy hiziliha’e sady ampahafantaro’areo aze zay faie ko masiake. Ko aolakolake amy iareo ty firehafagne izay faie ao tsy hasiake rehe. (Ohabolana 15:1) Hagnampe anareo ho soa filongoagne amy ty longo’areo ty fiambaneagne naho ty tsy fagnahy vaho ty fahalignisan-draha. Soa ty ‘mifakatante aman-katea.’—Efesianina 4:2.

INOGNE TY TOKO’E HATAO’O?

• Naho fa mahaboseke azo ty fiziliha ty longo’areo amy ty fiaigna’areo, le rehafo amy i vali’o zay naho fa milamindamigne nareo

• Laharo’areo ty handaminagne i raha manahiragney