Mampiova ty Fanambaliagne o Ajajao

Vaho samba’e managne anake vao nareo mirovaly? Fale sahiragne ty mpivaly naho fa tera-bao. Va’e ho latsa nareo fa ho lany hikolokoloagne i ajajay ty andro’areo naho ty heri’areo. Va’e tsy ho ampe roro nareo sady hiova ty fo’areo. Atahoragne hanimba ty fiharoa’areo zay. Faie sambe miovà nareo soa tie hahakolokolo i ajajay sady mbe hifankatea avao ka. Hagnampe anareo hahavita hiatreke ze raha manahiragne ty torohevetse agnate Baiboly ao.

1 NAGNINOGNE TY FISIA O AJAJAO RO MAMPIOVA TY FIAIGNAGNE?

INOGNE TY RAHA REHAFE TY BAIBOLY? “O hatea zao mahalin-draha, soa fagnahy ... tsy mipay ty hahasoa ty vata’e, tsy tsiela boseke.” (1 Korintianina 13:4, 5) Naho ampela vaho samba’e managne anake rehe, le tsy kamoegne naho tondregne amy ty ana’o. Faie va’e hanomboke hieretseretse ty vali’o tie tsy darea’o. Ko haligno fa mipay azo ka reke. Ampahafantaro aze fa paliagne reke sady toko’e hikolokolo i ana’areoy ka. Faie misoà fagnahy sady mahalignisa raha naho fa manao izay.

“I nareo lahilahy ka, mimonegna soa amy ty vali’areo amy ty faharendrehagne.” (1 Petera 3:7) Toko’e ho fanta’o fa ty fikolokoloagne i ana’areoy ty handany ty hery i vali’o. Va’e hampivali-doha naho haharokake aze o andraikitse vaovao iohoeke. Va’e ho boseke ama’o ka reke faie ko orihegne fa “ndra leo’e ndaty tsy tsiela boseke ta ty lahilahy maozatse.” (Ohabolana 16:32) Fantaro ty raha mahazo i vali’o, le meo aze ze fagnampeagne paliae’e. —Ohabolana 14:29.

INOGNE TY TOKO’E HATAO’O?

• Lahilahy: Ampeo ty vali’o hikolokolo i ajajay ndra tie halegne. Tsahatsaharo ty andro anoa’o raha hafa soa tie manam-potoagne hiharoagne amy i vali’o naho ty ana’o rehe

• Ampela: Ekeo ty fagnampea i vali’o naho te hagnampe azo hikolokolo i ajajay reke. Ko endahagne reke naho fa tsy hai’e ty asa aze, fa atorò aze aman-kasoa fagnahy ty fanoagne aze

2 ANÒ MAFE TY FIFANDRAMBESA’AREO

INOGNE TY RAHA REHAFE TY BAIBOLY? “Hinjary nofotse raike iareo.” (Genesisy 2:24) Ko haligno fa mbe “nofotse raike” avao nareo mirovaly ndra tie niampe raike i keleiagney. Mikezaha mafe nareo hagnamafe ty fifandrambesa’areo roe.

Isaoro ty fagnampeagne anoe i vali’o ry ampela. Va’e ‘hahajangagne’ ty fisaoragne rehafe’o. (Ohabolana 12:18) I nareo lahilahy rehafo amy i vali’o fa teà’o naho tsy misy atakalo’o aze reke. Tsiririo reke amy ty fikolokoloagne i keleiagney.—Ohabolana 31:10, 28.

“Mipalià lognandro ty hahasoa ty ila’e ty tsikiraikiraike fa tsy ty hahasoa ty vata’e avao.” (1 Korintianina 10:24) Ze raha hahasoa i vali’o avao ro anò. Mipalià fotoagne hifampirehafagne, hifampitsanognagne naho hifampitsiririagne. Ko tea mena naho fa manao fiharoan-damba, fa mba dineho ze raha paliae i vali’o. Hoe ty Baiboly: “Tsy toko’e hisy ama’areo ty tsy ho mete naho fa manao ty andidi’e amy i vali’e naho tsy tie fa ... nilahare’areo varagne.” (1 Korintianina 7:3-5) Iharò’areo rehake soa ty miomba o fiharoan-dambao. Hihamafe ty fifandrambesa’areo naho mahalin-draha sady sambe hahafantatse ze raha manjò ty vali’areo nareo.

INOGNE TY TOKO’E HATAO’O?

• Ko atao haligno ty manokagne andro hiharoa’areo roe avao

• Mba manoa raha kedekede hahafantara i vali’o tie teà’o vata’e reke, ohatse tolotoloro raha reke ndra anorato

3 AÒHO TY ANA’AREO NDRA TIE MBE KEDE

INOGNE TY RAHA REHAFE TY BAIBOLY? “Le mbe nianak’ajaja rehe le fa nahafantatse ty Soratse Masigne, i nampahilala azo ho amy ty fandrombahagney.” (2 Timoty 3:15) Dineho miaolo ty hatao’o hagnanaragne ty ana’o. Tsy raha magnore miana-draha ty ajaja ndra tie mbe an-troke ao. Mahafantatse ty feo’o reke sady misy voka’e ama’e ze raha atao ty fo’o ndra tie mbe vesaregne. Amakio boke reke ndra tie mbe ajajamena. Tsy ho azo’e ze raha vakie’o, faie izay ty hagnampe aze ho tea mamaky boke naho fa bey.

Ko ivazàgne amy ty maha kede aze ty ana’o, tie tsy haharey azo naho fa mirehake miomba an’Andrianagnahare. Anò rei’e ty vavake anoe’o. (Deoteronomia 11:19) Mirehafa miomba ty raha namboaren’Andrianagnahare ndra tie miharo fihisagne ama’e. (Salamo 78:3, 4) Ho fanta i ana’oy naho fa bey tie tea i Jehovah vata’e rehe, le ho tea aze ka reke.

INOGNE TY TOKO’E HATAO’O?

• Mangataha hilala amy i Jehovah hahaia’o miteza ty ana’o

• Mieretsereta hevetse lahibey sady aherekeregno amy i ajajay zay. Miana-draha miaolo reke naho manao izay rehe