Mbaia o Ndatio Naho Fa Mate?

1-3. Inogne iaby ty fagnontenea o ndatio miomba ty mate, le akore ty amalea ty fivavahagne ila’e aze?

MAMPITAMÀ antikagne ty Baiboly “fa tsy hisy sasa ty fate” amy ty hoavy. (Apokalypsy 21:4) Nianarantikagne tamy ty Toko faha-5 ao fa i solovoigney ty hahavy antikagne hiaigne nainai’e. Faie mbe mate avao ty ndaty amy hinane zao. (Mpitoriteny 9:5) Izao areke ty fagnontaneagne lahibey manahiragne antikagne: Manao akore tikagne naho fa mate?

² Teàntikagne ho fantatse ty vale o fagnontaneagne iohoe, lohotsie naho fa longo maifitse antikagne ty mate. Va’e hieretseretse tikagne tie: ‘Nimbaia reke hinane izay? Mahatrea antikagne vao reke? Afake magnampe antikagne vao reke? Mbe hotreantikagne vao reke?’

³ Tsy mitovy ty amalea ty fivavahagne maro o fagnonteneagne rehoe. Mampianatse ty ila’e fa ho andagnitse agne rehe naho soa fagnahy, fa ho agn’afobey naho raty fagnahy. Ty ila’e mirehake tie manjare fagnahy rehe naho fa mate sady miharo toboke amy ty longo’o fa nimate. Mirehake ka ty ila’e tie, hotsaraegne o ndatio afara ty nimateza’e, ndra homeagne vatagne vaovao.

4. Inogne ty hevetse iharoa o fivavahagneo miomba ty mate?

⁴ Sambe hafa ty fampianara o fivavahagneo. Faie itoy ty hevetse iharoa iareo: Naho fa mate o ndatio, le misy raha tsy mete mate misintake amy ty vata’e. Maregne vao zay?

MBAIA O NDATIO NAHO FA MATE?

5, 6. Manao akore o ndatio naho fa mate?

⁵ Fanta i Jehovah tie manao akore o ndatio naho fa mate. Nambara’e amantikagne tie mifaragne ty fiaigna o ndatio naho fa mate. Mifanohetse amy ty fiaignagne ty fate. Tsy misy raha rendre’e ndra raha tsiaro’e sasa ty ndaty naho fa mate.a Tsy mahatrea, tsy maharey sady tsy mieretseretse sasa reke.

⁶ Izao ty nisorate i Solomona Mpanjaka: “Tsy misy raha rendre’e ty mate.” Tsy mahay mitea ndra malaigne ty mate sady “tsy misy asa, eretseretse, fahaiandraha, naho hilala ty an-kibory hilevegna’o agne.” (Vakio Mpitoriteny 9:5, 6, 10.) Rehafe ty Baiboly amy Salamo 146:4 ka fa ‘foagne ty eretsere o ndatio’ naho fa mate.

TY FIREHAFA I JESOSY O FATEO

7. Inogne ty rineha i Jesosy miomba ty mate?

⁷ Izao ty nirehafe i Jesosy amy i apositoli’e rey naho fa nimate ty Lazarosy ragne’e: “Miroro ty Lazarosy ragnentikagne.” Faie tsy tie i Lazarosy rokake, ty teà i Jesosy horehafegne. Fa hoe reke, “mate anio ty Lazarosy.” (Jaona 11:11-14) Nampitovie i Jesosy amy ty roro ty fate. Tsy nirehake reke tie, tan-dagnitse agne ty Lazarosy ndra niharo amy ty longo’e fa nimate. Sady tsy nirehake ka reke tie nijale agn’afobey ty Lazarosy ndra niova ho vatagne hafa. Te hirehake reke fa miroro mafe ty Lazarosy. Hoe ty Jesosy naho fa namelogne i Anak’ampela i Jairoy: “Tsy mate reke fa miroro.” (Lioka 8:52, 53) Misy andalan-teny hafa ka mampitovy ty fate amy ty roro.—Salamo 13:3.

8. Akore ty ahafantarantikagne fa tsy namboaren’Andrianagnahare ho mate o ndatio?

⁸ Namboaren’Andrianagnahare hiafara amy ty fate vao ty Adama naho i Eva? Tsy izay! Ho velogne nainai’e ty namboara i Jehovah iareo sady tsy harare. Natao i Jehovah hanagne fagniriagne hiaigne nainai’e o ndatio naho fa namboare’e. (Mpitoriteny 3:11) Tsy teà ty rae aman-drene ho antetse naho ho mate ty ana’e. Manahake izay ka ty fivazohoa i Jehovah antikagne. Faie inogne ty mahavy antikagne ho mate, itikagne amy izao namboaren’Andrianagnahare hiaigne nainai’e?

INOGNE TY MAHAVY O NDATIO HO MATE?

9. Nagnino ty lily nimey i Jehovah i Adama naho i Eva ro tsy sarotse orihegne?

⁹ Hoe ty Jehovah tamy i Adama tamy i tonda i Edenay ao: “Hano iaby ze lani’o amy ze voan-katae amo o tondao ao. Faie ao tsy hohane’o ty voa i hatae fahafantaragne ty soa naho ty ratỳ, fa naho homagne aze rehe le ho mate.” (Genesisy 2:9, 16, 17) Mazava soa o lily iohoe sady tsy sarotse orihegne. I Jehovah raike avao ty managne fahefagne hamaritse amy i Adama naho i Eva ty soa naho ty raty. Ty fagnoriha iareo o lily iohoe ty anoroa iareo fa magneke ty fahefagne anagna i Jehovah iareo. Ho natoro iareo amy izay ka tie, misaotse i Jehovah iareo amy ty raha maro nimey i Jehovah iareo.

10, 11. a) Akore ty namitaha i Satana i Adama naho i Eva? b) Nagnino ty raha natao i Adama naho i Eva ro tsy misy hialà iareo?

¹⁰ Mampanahelo fa nifily ty tsy hagnorike i Jehovah ty Adama naho i Eva. Hoe ty Satana tamy i Eva: “Nao zao, ty Andrianagnahare nisaontsy tama’areo tie tsy azo’areo hanegne ze voan-katae agnate ty tonda toy ato?” Hoe ty navale i Eva: “Azo’ay hanegne iaby ty voa ze hatae agnate ty tonda toy ato. Fa izao ty nisaontsien’Andrianagnahare: ‘Ao tsy hohane’areo ty voa i hatae raike agnivo i tonday eoy, vaho tsy ho tsapae’areo ka, tsy mone ho mate nareo.’ ”—Genesisy 3:1-3.

¹¹ Le hoe ty Satana: “Tsy ho mate nareo. Fa fantan’Andrianagnahare fa hibeake ty maso’areo naho fa homagne aze, le ho hambagne aman’Andrianagnahare nareo hahafantatse ty soa naho ty raty.” (Genesisy 3:4-6) Teà i Satana hieretseretse ty Eva fa azo’e atao ty manapa-kevetse miomba ty soa naho ty raty. Navandeza’e ty Eva fa tsy ho mate naho tsy magnorike ty fagnanara i Jehovah. Nihinagne tamy ty voa i hataey ty Eva, sady nimea’e ka ty vali’e. Fa nifanta i Adama naho i Eva tie rinara i Jehovah tsy hohane iareo ty voa i hataey. Nifily ty tsy hagnorike i lily mazava sady tsy sarotsey iareo naho fa nihinagne ty voa i hataey. Izay ty nanoroa iareo fa tsy niasy i Rae bey hatea an-dagnitse agney iareo. Tsy misy hialàgne amy ty raha natao’e ty Adama naho i Eva!

12. Nagnino ro nampanahelo ty tsy fagnoriha i Adama naho i Eva i Jehovah?

¹² Mampanahelo fa tsy niasy i Mpamorogney ty Rae aman-drenentikagne voaloha’e! Inogne ty tsapa’o naho manohetse azo sady mivalike ama’o ty anake tineza’o. Tsy hamparare ty fo’o vao zay?

13. Inogne ty dika ty saontsy i Jehovah tihoe “hiheregne ho lemboke” rehe?

¹³ Tsy nivelogne nainai’e ty Adama naho i Eva, naho fa tsy nagnorike ty lily i Jehovah. Hoe ty Jehovah tamy i Adama: “Fa lemboke rehe le hiheregne ho lemboke indraike.” (Vakio Genesisy 3:19.) Ty dika izay, ho lembon-tane indraike ty Adama naho i Eva, hanahake ie mbe tsy niforognegney. (Genesisy 2:7) Nimate ty Adama naho fa nanota, sady lelia’e tsy nisy sasa.

14. Inogne ty mahavy antikagne ho mate?

¹⁴ Mbe ho nivelogne hatrake amy izao ty Adama naho i Eva naho nagnorike ty fagnanaran’Andrianagnahare. Faie nanota sady nimate iareo naho fa tsy nagnorike izay. Manahake ty areten-draty manaranake ty ota nilovaegne boake amy ty rae aman-drenenikagne voaloha’e. Vaho aterake tikagne le fa mpanota, le izay ty mahavy antikagne ho mate. (Romanina 5:12) Faie tsy izay ty fagnirian’Andrianagnahare hoahy o ndatio. Tsy teàn’Andrianagnahare ho mate o ndatio. Ampitovie ty Baiboly amy ty “fahavalo” o fateo.—1 Korintianina 15:26.

MAGNAFAKE ANTIKAGNE TY MAREGNE

15. Afake amy ty inogne tikagne naho fa mahafantatse ty maregne miomba ty mate?

¹⁵ Magnafake antikagne amy ty heve-diso maro miomba ty mate ty hamarenagne. Ampianare ty Baiboly antikagne fa tsy mijale ndra ore ty mate. Tsy afake mifampirehake naho mifagnampe amy iareo tikagne. Tsy afake magnisy raty antikagne ty mate, le tsy toko’e hatahoragne. Faie maro ty fivavahagne mirehake amantikagne tie, mbe misy toeragne iveloma’e ty mate sady afake magnampe aze tikagne naho fa magnomey drala ty mpitarike fivavahagne, ndra ndaty heveregne ho masigne. Faie tsy voafita o vande rehoe tikagne, fa mahafantatse ty maregne miomba ty mate.

16. Inogne ty vande ampianare ty fivavahagne maro miomba ty mate?

¹⁶ Mampiasa ty fivavahan-diso ty Satana hamitahagne antikagne, mba hahavy antikagne hino fa mbe velogne ty mate. Mampianatse ohatse ty fivavahagne ila’e, fa mbe misy raha velogne misintake amy ty vatantikagne naho fa mate tikagne. Izay vao ty ampianare ty fivavaha’o azo, sa ty raha rehafe ty Baiboly miomba ty mate ro ampianare’e? Mbe mamitake o ndatio mba hisintake amy i Jehovah ty Satana.

17. Nagnino ro magnafa-baraka i Jehovah ty fampianaragne miomba ty afobey?

¹⁷ Mampangorìgne sady magnafa-baraka i Jehovah ty fampianara ty fivavahagne maro manao tihoe: Hagnoro ty ndaty raty fagnahy agn’afobey nainai’e ty Jehovah. Tsy engà i Jehovah hijale hoe izay o ndatio! (Vakio 1 Jaona 4:8.) Akore ty heve’o naho misy ndaty raike magnoro ty tagnan’ajaja raike mba handilovagne aze? Va’e hanao izao rehe tie, mba ndaty raty ka izay io sady tsy te hifandrambe ama’e rehe. Teà i Satana atao manahake izay ka ty Jehovah.

18. Nagnino tikagne ro tsy toko’e hatahotse ty mate?

¹⁸ Mirehake ty fivavahagne ila’e fa manjare fagnahy ty ndaty naho fa mate. Ampianare o fivavahagneo fa tsy maintsy iasiagne naho atahoragne ty fagnahy ty ndaty mate, fa va’e ho ragnetse mahery ndra fahavalo mampatahotse. Maro ty ndaty mino o vande iohoe. Izay ty mahavy o ndatio mivavake amy ty mate, fa tsy mivavake amy i Jehovah. Ko haligno fa tsy misy raha fanta’e ndra rendre’e ty mate, le tsy toko’e hatahoragne. I Jehovah ty Mpamorogne antikagne. Ie ty Andrianagnahare maregne toko’e hotompoentikagne.—Apokalypsy 4:11.

19. Nagnino ty fahafantaragne ty maregne miomba ty mate ro magnampe antikagne?

¹⁹ Tsy voafita ty vande o fivavahan-disò tikagne naho fa mahafantatse ty maregne miomba ty mate. O hamarenagne iohoe ka ty magnampe antikagne hahafantatse ty fampitamà i Jehovah miomba ty fiaignantikagne amy ty hoavy.

20. Inogne ty hianarantikagne amy ty toko manonjohy itoy?

²⁰ Hoe ty Joba, mpanompon’Andrianagnahare: “Naho mate ty lahilahy tsy marare, le mbe ho velogne indraike vao reke?” (Joba 14:14) Mbe ho velogne vata’e vao ty ndaty raike fa mate? Mampionogne ty isaontsian’Andrianagnahare izay amantikagne agnate Baiboly ao. Izay ty hotreantikagne amy ty toko manonjohy toy.