Nankatò i Jehovah ty Abrahama Naho i Saraha

Tanàgne tsy lavitse i Babela ty Ora. Nanompo andrianagnahare maro ty ndaty tao. Faie nisy lahilahy raike nanompo i Jehovah raike avao ty ta Ora tao. I Abrahama ty agnara’e.

Hoe ty Jehovah tamy i Abrahama: ‘Engao ty longo’o naho ty tragno’o toy, le mandehana ho amy ty tane raike hatoroko azo.’ Naho fa niavy eo, le nampitamà aze ty Jehovah tie: ‘Hanjare firenena lahibey rehe, sady hataoko ty hahazoa ze kila ndaty amy ty tane toy fitahiagne boake ama’o.’

Tsy hay i Abrahama tie aia ty handefasa i Jehovah aze, faie natoky i Jehovah reke. Nankatò ty Abrahama naho i Saraha, i Tera rae’e naho i Lota ana-drahalahi’e. Nangorogne entagne iareo, le nandeha amy izay.

Dime amby fitopolo taogne ty Abrahama tamy iareo niavy tamy i tane teà i Jehovah ho trea iareoy ao. I Kanana ty agnara i taney. Tao ty nisaontsia i Jehovah tama’e miomba ty fampitamagne toy: ‘Homeiko azo naho ty tarana’o iaby ty tane trea’o magnodidigne azo toy.’ Akore ty hampahavia i Jehovah ze fampitamà’e zay, i Abrahama naho i Saraha amy izao fa antetse sady mbe tsy nanagn’anake?