Ela ty Ela ta Nanagn’anake!

Fa an-tao’e maro ty nifanambalia i Abrahama naho i Saraha. Nisoa ty fiaigna iareo ta Ora tagne, faie ndraleo iareo nienga izay le nipetrake tan-tragno lay. Faie tsy nitaraigne ty Saraha fa natoky i Jehovah.

Te hanagn’anake mafe ty Saraha, le hoe reke tamy i Abrahama: ‘Valio ty Hagara hiteraha’e anake ho ahy.’ Nitera-dahy ty Hagara naho fa tafara tatoy, le Ismaela ty agnara’e.

Nisy ambahiny telo nitilike iareo, taogne maro tafara atoy tamy i Abrahama 99 taogne naho i Saraha 89 taogne. Nampitobohe i Abrahama tagn’alokeo iareo sady nanjotsoa’e hanegne. Ia o ambahiny telo reo? Anjely. Hoe iareo tamy i Abrahama: ‘Hanagn’ana-dahy nareo naho taon-koavy.’ Nitsanogne tambaly i tragnoy ao avao ty Saraha. Nihehe reke sady nirehake tie: ‘Ze o hanterako zao ry aba ro mbe hiterake!’

Ie taogne nagnarake, le nitera-dahy vata’e ty Saraha fa toe izay ty nampitamàe i anjely i Jehovah rey. Isaka ty natao i Abrahama agnara’e. “Fiheheagne” ty dika o agnaragne iohoe.

Naho fa nidime taogne ty Isaka, le nitrea i Saraha ty Ismaela nihehe aze. Te hiaro i ana-dahi’ey reke, le nimbamy i Abrahama mbeo sady nampandroake i Hagara naho Ismaela. Tsy nimete hey ty Abrahama tamy ty voaloha’e, faie hoe ty Jehovah tama’e: ‘Tsanogno ty vali’o. Hikarakara Ismaela raho faie amy ty alala Isaka ty hampahaviako i fampitamakoy.’