Tragno Fivavahagne Tamy i Jehovah

Mbe tamy i Vohy i Sinay agne ty Mosesy, le nisaontsy tama’e ty Jehovah tie toko’e hamboatse tragno hivavahagne ama’e o Israelitao. Tragno lay masigne ty agnara’e. Azo ongahegne o tragno iohoe naho fa nandeha iareo.

Hoe ty Jehovah: ‘Ampagnomeo ze foe’e o vahoakeo mba hamboaragne o tragno masigne iohoe.’ Le nagnomey volamena, volafotsy, vatosoa naho ravake iareo sady nagnomey volon’agnondry, holim-biby naho raha hafa. Maro ty raha nimey iareo le hoe ty Mosesy: ‘Fa ampe zay.’

Maro ty ampela naho ty lahilahy namboatse o tragno masigne iohoe. Nampea i Jehovah iareo, le nahay nanao kofehe, raven-damba, ndra peta-kofehe. Nahay nampiasa vato, volamena naho hatae ty ila’e.

Natao o Israelitao mifagnarake amy ty raha nisaontsie i Jehovah i tragnoy. Nizara roe o tragno iohoe, le ty Masigne naho ty Masigne Vata’e. Ridò ty nampisarake aze. Nisy fisian-jiro volamena, latabatse naho alitara fagnoroagne raha magnitse ty tamy i Masigney ao. Nisy koveta saba naho alitara bey fanoagne sorogne ty tan-kiririsa’ey. Tamy i Masigne Vata’ey ao ty Vata misy i fagninay. Hatae akasia naho volamena ty nanoagne aze. Naniahy o Israelitao mba hankatò i Jehovah ty Vata i fagninay. Vava anoegne o fagnina zao.

I Arona naho o ana-dahi’e reo ty finily i Jehovah ho mpisorogne. Hikarakara o tragno masigne iohoe iareo sady hanao fagnatetse hoahy i Jehovah. I Arona ty mpisorom-bey. I reke avao ro nahazo nizilike tamy i Masigne Vata’ey ao, faie indraike isan-taogne avao. Nanao sorogne ho aze, hoahy ty keleia’e naho hoahy o Israelitao reke mba hagnaliovagne ty hadisoa iareo.

Tao’e raike tafara ty nialà iareo ta Ejipta agne vaho izay vita i tragno lay masigney. Nanagne tragno hivavahagne amy i Jehovah amy izay iareo.

Nasia i Jehovah rahogne ty tambone i tragno lay masigney eo, mba hanoroa’e tie fale reke. Naho fa tsy nihetseke tambone eo i rahogney, le tsy nandeha o Israelitao. Fa naho i rahogney ro miala, le fanta iareo tie fa handeha iareo. Tsy maintsy nahoro iareo ka i tragno lay masigney.