Niaro i Hezekia ty Anjely i Jehovah

Nanjaka tamy ty fanjakà ty foko folo o Israelio o Asyrianao. Teà i Sankeriba mpanjaka o Asyrianao halaegne ka ty foko roe i Joda. Fa rese’e iaby ty tanà i Joda faie i Jerosalema ro teà’e halaegne. Tsy fanta’e tie i Jehovah ty niaro i Jerosalema.

I Hezekia ty mpanjaka i Joda tamy izay, le kinarama’e ty Sankeriba mba tsy hanafike i Jerosalema. Rinambe i Sankeriba i dralay faie mbe nalefa’e hanafike i Jerosalema avao o maramila’eo. Natahotse ty ndaty ta Jerosalema ao, satria fa narine ty hanafiha o Asyrianao iareo. Rineha i Hezekia iareo tie: ‘Ko matahotse ry kiahe. Matanjake o Asyrianao, faie hatao i Jehovah matanjake ambone iareo tika.’

Nirahe i Sankeriba hikizake ty ndaty ta Jerosalema ao ty Rabsake. Nitsangagne tambaly i tanàgney ao reke, le nirehake tie: ‘Ko magneke ho fitahe i Hezekia nareo fa tsy afake hagnampe anareo ty Jehovah. Tsy misy andrianagnahare haharombake anareo ama’ay.’

Nagnontane i Jehovah ty raha toko’e hatao’e ty Hezekia. Hoe ty Jehovah: ‘Ko atahoragne ty reha i Rabsake, fa tsy haharese i Jerosalema zao ty Sankeriba.’ Nandefa taratasy tamy i Hezekia ty Sankeriba tie: ‘Ndra afoezo ty fiai’o fa tsy raha hiaro azo ty Jehovah.’ Nivavake ty Hezekia tie: ‘Avoto zahay Jehovah, mba ho fanta ty ndaty iaby tie, ihe raike avao ro Andrianagnahare vata’e.’ Hoe ty Jehovah tama’e: ‘Tsy ho tafilitse a Jerosalema ao ty mpanjaka i Asyria, satria harovako ty Jerosalema.’

Natoky ty Sankeriba fa ho rese’e ty Jerosalema. Nandefa anjely raike ty Jehovah tamy tie indraike halegne, le vinono’e iaby ty maramila o Asyrianao 185 000. Tsy nanagne maramila sasa ty Sankeriba, le nandeha noly satria fa rese. Niaro i Hezekia naho i tanàgney ty Jehovah fa toe izay ty nampitamàe’e. Ho natoky i Jehovah vao rehe naho tao tamy izay?