Nandeha Tambone Riakey ty Jesosy

Tsy ty magnasitragne naho ty mamelogne ty mate avao ty nihay i Jesosy, fa mbe afake nifehe o tiokeo naho o oragneo ka reke. Tafara ty nivavaha’e tam-bohitse agne, le nahatrea tiobey tamy ty Ria i Galilia tey ty Jesosy. Nisahiragne nivey sady nialy tamy i tiokey tagnate sambo ao i apostoli’e rey. Akore ty natao i Jesosy? Nandeha tambone riakey ty Jesosy ho mbamy iareo mbeo. Natahotse i apostoly rey naho fa nahatrea ndaty tambone riakey ey. Faie hoe ty Jesosy tamy iareo: ‘Izaho anio fa ko matahotse nareo.’

Hoe ty Petera: ‘O Tompo, naho ihe vata’e areke io, le ho ama’o ey raho.’ Hoe ty Jesosy: ‘Avia areke.’ Nenga i Petera i samboy, le nandeha tambone riakey reke, ho amy i Jesosy ey. Mbe nitioke tamy izay. Faie naho fa narine i Jesosy reke, ndra nitalake i tiokey. Natahotse ty Petera, le nanomboke nilenteke. Nitoka reke tie: ‘Rombaho raho Tompo!’ Rinambe i Jesosy tamy i tagna’ey ty Petera sady hoe reke: ‘Ino ty nampisalasala azo? Tsy manam-pinoagne vao iheo?’

Nanganike tagnate sambo ao ty Jesosy naho i Petera, le nijanogne i tiokey. Gaga i apostoly rey. Hoe iareo: “Anak’Andrianagnahare vata’e rehe!”

Tsy vaho io ty Jesosy ro nifehe o tiokeo. Fa nisy fotoagne ty Jesosy niharo lia tamo o apostoli’e reo nijogne sambo, faie niroro reke. Nisy tiobey tan-driake ey, le fa ho natonta i onjay i samboy. Finoha o apostolio reke tie: ‘Ho mate tika mpagnanatse! Ampeo zahay!’ Nifoha reke sady nirehake i riakey tie: ‘Mitsìgna!’ Le avy le nilamigne i tiokey naho i riakey. Hoe ty Jesosy tamy i apostoli’e rey: ‘Aia ty finoa’areo?’ Nifampirehake iareo tie: ‘Ndra o tiokeo naho o riakeo ry kiahe, le mankatò aze!’ Nandrambe lesogne i apostoly rey fa naho matoky i Jesosy iareo, le tsy hatahotse sasa.