Namahagne Ndaty Agnarivo’e ty Jesosy

Boake nitory i apostoly rey taloha ty Pasake taogne 32. Rokake iareo, le nindese i Jesosy nandeha sambo a Betsaida agne mba hitofa hey. Naho fa nitoly tan-tsisy i riakey ey i samboy, le fa nisy ndaty maro nagnorike iareo ty tagne. Ndra tie te hampitofa i mpiana’e rey ty Jesosy, le nirambese’e soa avao i ndaty rey. Nagnasitragne ty marare reke sady nampianatse iareo miomba ty Fanjakàn’Andrianagnahare amparake ty nitsofora i androy. Naho fa ho hariva i androy, le hoe i mpiana’e rey tama’e: ‘Ho keré o ndatio, fa ndraleo ampandehanegne, hipalia’e hanegne.’

Hoe ty Jesosy: ‘Ko ampandehanegne iareo, fa omeo’areo hanegne.’ Hoe i apostoly rey: ‘Hivily hanegne hoahy iareo vao zahay?’ Hoe ty apostoly Filipo: ‘Toe haha eneke ty vahoake toagne vao zay?’

Hoe ty Jesosy: ‘Misy hanegne vao ty ama’areo?’ Hoe ty Andrea: ‘Misy mofo dime naho fiagne roe ty atoy, faie mbe tsy ampe avao.’ Hoe ty Jesosy: ‘Ento atoy izay.’ Le nasae’e nitoboke amy izay i vahoakey, le natsitokotoko’e 50 naho 100. Nalae i Jesosy i mofoy naho i fiagney, le niandrandra reke sady nivavake. Natolo’e i apostoly rey i hanegney, le iareo ty nizara aze. Nisy lahilahy 5 000 naho ampela miharo ajaja tamy izay, faie le sambe nivontsigne iaby. Navory i apostoly rey ze sisa’e tsy nilany, le nahafeno 12 harogne. Fahagagagne vata’e zao!

Nahagaga o ndatio ze raha zay, le teà iareo hatao mpanjaka ty Jesosy. Fanta i Jesosy tie mbe tsy tamy izay ty fotoagne hanoa i Jehovah aze ho mpanjaka. Rinava’e i vahoakey, le rineha’e i apostoli’e rey mba handeha amy ty Ria i Galilia agne. Nandeha sambo iareo, fa i Jesosy nandeha am-bohitse agne. Ino ty anto’e? Te hivavake aman-dRae’e reke. Tsy natao i Jesosy ambanen-draha ty vavake ndra ino ty raha niseho.