Ty Mahakama Hariva i Tompo

Nankalaza Pasake isan-taogne o Jiosio, isake ty faha-14 Nisana. Amy izay tsiaro iareo, fa navota i Jehovah boake a Egypta agne iareo sady nitarihe’e ho amy i Tane Nampitamaegney ao. Nankalaza Pasake tamy ty efetse ambone tamy ty tragno raike ta Jerosalema ao ka ty Jesosy naho o apostoli’e reo, tamy ty taogne 33. Ie ho tapetse i fankalazagney, le hoe ty Jesosy: ‘Hamalike ahy ty raike ama’areo.’ Gaga i apostoly rey, le nagnontane tie: ‘Ia zay?’ Le hoe ty Jesosy: ‘Ze omeako ty mofo toy ro ie.’ Le nimei’e i Jodasy Iskariota i mofoy. Teo naho eo, le nitsangagne ty Jodasy sady nandeha.

Nivavake ty Jesosy tafara izay, le tinapa’e i mofoy sady natolo’e i apostoli’e rey. Le hoe reke: ‘Hano toy, fa magnambara ty vatako homeigne anareo.’ Nivavake hoahy ty divay ka reke, le natolo’e iareo. Le hoe reke: ‘Inomo toy, fa magnambara ty lioko natao hagnafahagne ty fahota’areo. Mampitamà anareo raho fa ho mpanjaka miharo amako an-dagnitse agne nareo. Anò isan-taogne zao, hahatsiarova’areo ahy.’ Mbe mankalaza o fotoagne iohoe isan-taogne ty mpanonjohy ty lia i Jesosy. Hariva ty ankalazagne aze sady ty Mahakama Hariva i Tompo ty ahafantaragne o fotoagne iohoe.

Vaho vita fihinagne iareo, le nifandietse i apostoly rey tie ia amy iareo ty bey. Faie hoe ty Jesosy: ‘Ze bey ama’areo ro ho fara’e kede, le ze kede ro ho bey.’

‘Inareo ty ragneko. Rehafeko ama’areo ze raha saontsien-dRaeko amako. Tsy hoela raho, le handeha aman-dRaeko an-dagnitse agne, fa inareo mbe ho eto. Faie mifankateava, soa tie ho fanta o ndatio tie mpianako vata’e nareo. Tsy maintsy mifankatea nareo manahake ty iteavako anareo.’

Nivavake ty Jesosy naho niavy eo, mba hagnamasinagne ty tahina i Jehovah, le mba hiarova i Jehovah i mpiana’e rey sady mba hagnampea’e iareo hiharo saigne naho fa miharo asa. Tafara izay, le nidera i Jehovah reke naho o apostoli’e reo, le niakatse. Fa narine ty hitsepahagne i Jesosy tamy izay.