Fagnonteneagne Boake amo o Mpamakio
Taia i mpianatse 70 nirahe i Jesosy hitory rey naho fa nanao fankalazagne i Mahakama Hariva i Tompoy reke? Nienga aze vao iareo?
Tsy toko’e le avy le hagnatsoake hevetse tikagne tie tsy nankasitraha i Jesosy ndra nienga aze i mpianatse 70 rey satria tsy teo iareo naho fa nanao i fankalazagne Mahakama Hariva i Tompoy ty Jesosy. Te hiarake amy i apostoli’e rey avao ty Jesosy ty tamy io.
Sambe mpiana i Jesosy iaby ndra i apostoly 12 rey ndra i 70 rey. Nifily 12 lahy boake amy iareo ty Jesosy tamy ty voaloha’e. Nitokave’e tihoe apostoly o lahilahy rehoe. (Lioka 6:12-16) Ta Galelia agne ty Jesosy tamy ireke “nitoka iareo 12 lahỳ”, sady “nirahe’e hitory i Fanjakàn’Andrianagnaharey naho hagnasitragne iareo.” (Lioka 9:1-6) Nandeha a Jodia agne reke tafara tatoy, le “nanendre 70 hafa ka sady nagnirake iareo tsikiroedroe.” (Lioka 9:51; 10:1) Trea boake amy izay fa nanagne mpianatse tamy ty toeragne sambe hafa reke. Sambe nitory ty miomba aze o mpianatse rehoe.
Nankalaza i Pasakey isan-taogne niarake tamy ty keleia’e o Jiosy nanjare mpiana i Jesosio. (Eks. 12:6-11, 17-20) Nandeha a Jerosalema agne ty Jesosy naho i apostoli’e rey naho fa narine ty andro himateza’e. Faie tsy namory ze mpiana’e ta Jodia, Galelia naho ta Pere tagne reke mba hiarake hanao i fankalazagne Pasakey tama’e. Mazava areke fa i apostoli’e rey avao ty tea i Jesosy hiarake ama’e ty tamy io. Hoe reke tamy iareo: “Tena fagniriako ty hihinagne ty Pasake toy miarake ama’areo, aloha ty hijaleako.”—Lioka 22:15.
Misy anto’e soa matoa ty Jesosy nirehake izay. Tsy ho ela ty Jesosy, ‘i Anak’agnondrin’Andrianagnahare hagnafake ty fahota ty tontolo toỳ’ le ho mate. (Jaona 1:29) A Jerosalema agne reke ty ho mate. Toe tagne ty fanoagne sorogne ho an’Andrianagnahare. Naniahy o Israelitao i anak’agnondry tamy i Pasakeỳ tie nagnafake iareo boake Ejipta agne ty Jehovah. Faie mandikoatse i anak’agnondry tamy i Pasakeỳ i sorogne nanoe i Jesosỳ satria magnafake ze kila ndaty amy ty ota naho ty fate. (1 Kor. 5:7, 8) Noho i sorogne nanoe i Jesosỳ areke, le nanjare agnisa ty fototse ty fiangonagne Kristiana i apostoly 12 rey. (Efes. 2:20-22) Mahaliagne fa “nisy vato fototse 12” ty Jerosalema, i tanàgne masigney, le sinoratse tama’e eo “ty agnara i apostoly roe amby folo i Anak’agnondrỳ rey.” (Apok. 21:10-14) Noho izay, le mandrambe anjara bey amy ty fagnatanterahagne ty raha safirien’Agnahare i apostoly tsy mivalike rey. Mazava amantikagne areke ty anto’e nahavy tihoe, iareo avao ty niarake amy i Jesosy tamy i Pasake fara’ey naho tamy i Mahakama Hariva i Tompo tafara izaỳ.
Tsy niarake tamy i Jesosy amo o mahakama iohoe i mpianatse 70 rey naho ty hafa. Ndra tie eo zay, le sambe nandrambe soa boake amy i raha nanoe i Jesosỳ, zane hoe ty Mahakama Hariva i Tompo ze mpanonjohy ty lia’e iaby tsy nivalike. Tamo o halegne iohoe ty Jesosy, le nirehake tamy i apostoli’e rey i fifagnekeagne miomba i fanjakagneỳ. Nanjare tafilitse amo o fifagnekeagne iohoe ze Kristiana voahosotse iaby naho fa tafara tatoy.—Lioka 22:29, 30.