Nalefa ta Roma Agne ty Paoly

Niheregne ta Jerosalema tao ty Paoly naho fa boake nitory tamy ty faritse maro. Tsinepake reke tao sady ginadra. Nirehake tama’e tamy ty fahitagne ty Jesosy tamy ty halegne indraike tie: ‘Hitory a Roma agne rehe.’ Nafindra ta Kaisaria agne ty Paoly tafara tatoy, le ginadra tao roe taogne. Nirehake tamy i Festosy Governora ty Paoly naho fa tsinara’e tie: ‘Engao hotsarae i Kaisara a Roma agne raho.’ Hoe ty Festosy: ‘Ho agne rehe naho izay ty angatahe’o.’ Nalefa tamy ty sambo ho a Roma agne reke, le niarake tama’e ty Lioka naho i Aristarko.

Nitrà ty tiobey i samboy naho fa tan-driakey. Fa tsy nitamà ho velogne ze ndaty tao. Hoe ty Paoly: ‘Nisy anjely nirehake tamako tie: “Ko matahotse rehe Paoly. Ho avy a Roma agne nareo, le ho avotse nareo iaby.” Ko matahotse fa tsy ho mate tikagne.’

Naharetse 14 andro i tiokey. Nahatalake tokonose iareo tamy ty fara’e. Malta ty agnara’e. Niavotse iaby o ndaty 276 tagnate i samboy tao reo, ndra tie nidofotse tamy i taney i samboy sady fa nipoteke. Nilagno ty ila’e. Ty ila’e ka namonje hatae hitingira’e, le nitoly tan-dafe i riakey ey. Nikarakara iareo ty ndaty ta Malta tao sady namelogne afo hamindroa iareo.

Telo volagne tafara izay, le nandese ty maramila a Roma agne tamy ty sambo hafa ty Paoly. Naho fa niavy agne reke, le nisy rahalahy nanalaka aze. Naho fa nahatrea iareo ty Paoly, le nisaotse i Jehovah. Gadra ty Paoly faie mbe afake nagnofa tragno, le nasiagne maramila niambegne aze ty tao. Nijanogne tao 2 taogne reke, le nitory miomba ty Fanjakàn’Andrianagnahare naho ty miomba i Jesosy tamy ze ndaty nitilike aze. Nanoratse hoahy ty fiangonagne ta Joda agne naho ta Azia Minora agne ka reke. Nampiasae i Jehovah hitory amy ty firenena maro vata’e ty Paoly.