LESOGNE 14

Asongadigno ty Hevetse Lahibey

Hebreo 8:1

TY DIKA IZAY: Ampeo i mpagnatrekey haharake i lahajaka atao’oy hatrake am-para’e. Fantaro tie inogne ty loha-heve i lahajakay, ty tanjo’e, le anò mazava amo o mpagnatrekeo soa ty ifandrambesa ireo amy ty hevetse lahibey tsikiraike.

TY FOMBA FANOAGNE AZE:

Fantaro ty tanjo i lahajakay. Natao hampianaragne raha vaovao vao, sa handreseagne lahatse, sa handrisihagne o ndatio hampihatse torohevetse? Anò azo antoke fa mazava soa ty tanjo’o isake ty hirehake hevetse lahibey raike rehe.

Dineho tie: ‘Inogne zao ty fagnonteneagne ndra ty fagnazavagne va’e hampivali-doha i mpagnatrekey miomba ty foto-kevetse toy? Inogne iaby ty fagnonteneagne va’e hapetra’e miomba i foto-kevetsey?’ Alamino soa mifagnarake amy izay ty hevetse horehafe’o, mba haharake soa i mpagnatrekey, sady hazava soa amy iareo i lahajakay.
Anò misongadigne mateteke amy ihe magnazavay ty loha-heve i lahajakay. Aherekeregno rehafegne tsikindraikindraike ze rehake hita’o fa mila asongadigne amy i lohan-dreha i lahajakay, ndra mampiasà rehake mitovy hevetse ama’e.
Anò mazava sady tsotra ty hevetse lahibey. Ko mirehake hevetse lahibey tsy mifandrambe amy i loha hevetsey. Fetrao ty hamaro’e. Hazava soa reke amy izay, sady tsy hihoatse ty lera’o. Rehafo tie inogne iaby ty hevetse lahibey hohazavae’o, sady somare mitofà kedekede isake ty boake nagnazava hevetse lahibey raike. Ndra azo’o aheregne indraike reke amy ty fara’e, mba ho tadidy i ndatỳ.

Vaho manomboke ohatse i lahajaka’oy, le fa azo’o rehafegne tsikiraike ty hevetse lahibey. Haharake soa i mpagnatrekey amy izay. Ndra azo’o aheregne kedekede indraike iareo amy ty fara’e, amy izay tsy haligno i mpagnatrekey.