Nisy Namorogne vao Ze Kila Raha?

Hoe ty Baiboly: “Namorogne ze kila raha [ty Andrianagnahare].” (Apokalypsy 4:11) Mino izay vao rehe? Misy ty mirehake fa nisy ho aze avao ze kila raha. Naho maregne zay, le tsy misy raha kendre’e ty fiaignantika. Faie naho namorogne ze kila raha ty Jehovah Andrianagnahare, le azo antoke fa misy anto’e lahibey ty nahavy aze nanao izay.a Hodinehentikagne ato ty raha rehafe ty Baiboly miomba ty niatomboha ze kila raha naho ty anto’e toko’e hinoagne izay.

1. Akore ty nampisy ze kila raha?

Hoe ty Baiboly: “Tamy ty voaloha’e ty Andrianagnahare, le namboatse ty tane toy naho i lagnitsey.” (Genesisy 1:1) Maro ty manam-pahaiagne magneke fa nisy fiatomboha’e ze kila raha. Akore ty nataon’Andrianagnahare naho fa nanao izay? Nampiasa ty “heri’e”, le ty fagnahy masigne reke mba hahafaha’e mamorogne ze kila raha, agnisa izay ze raha an-dagnitse ey, o vasiagneo, naho o planetao.​—Genesisy 1:2.

2. Nagnino ty Andrianagnahare ro namorogne ty tane toy?

Hoe ty Isaia 45:18: “Tsy tihoe tsy misy dika’e ty namboara’e [Jehovah] aze [ty tane toy] fa namboare’e hitobohagne.” Namboare’e soa ty tane toy sady natao’e eo iaby ze kila raha ilae o ndatio mba hahavy iareo hiaigne nainai’e. (Vakio ty Isaia 40:28; 42:5.) Rehafe o mpahay siansao fa miambake ty tane toy naho oharegne amy ty planeta hafa. I reke avao ty planeta azo o ndatio iaignagne.

3. Ino ty tsy mampitovy o ndatio amo o bibio?

Naho fa nivita ty tane toy, le namboatse raha mitiry naho raha managne aigne ty Jehovah. Voaloha’e, fineno’e raha mitiry naho biby heike ty tane toy. Naho fa niavy eo ty ‘Andrianagnahare, le namboatse ndaty manahake ty vinta’e.’ (Vakio ty Genesisy 1:27.) Faie ino ty tsy mampitovy o ndatio amy ty raha finoro’e hafa? Namboare’e manahake ty vinta’e o ndatio, le afake maneho hatea naho manao ty rare’e. Afake mianatse firehake hafa naho mankamamy ze raha fanjaka sady ho tea mozike ka o ndatio. Tsy izay avao fa afake midera naho miragnetse amy i Mpamorogney. Tsy afake manao izay o bibio.

ANDAO HANDINEKE TY PITSOPITSO’E

Hodinehentikagne ato ty porofo fa nisy namorogne ze kila raha naho ty porofo fa azo itokisagne ty raha rehafe ty Baiboly miomba izay. Ho treantikagne ato ka fa ahafantaragne ty toetsen’Andrianagnahare ty toetse soa o ndatio.

4. Nisy namboatse ze kila raha

Mahazo voninahitse o ndatio naho fa mahavita raha miambake boake amo o raha finorogneo. Toko’e homeam-boninahitse ka areke i namorogne i raha nalae’e tahake reỳ. Alefaso i VIDEO oy, sady iharò midineke ty fagnonteneagne toy.

VIDEO: Finoagne An’Andrianagnahare (2:43)

• Ino iaby ty raha namboare o ndatio nalae’e tahake boake amo o raha finorogneo?

Nisy namboatse ze kila tragno sady o ndatio ty namboatse aze. Ia ka areke ty namboatse ze kila raha? Vakio ty Hebreo 3:4, sady iharò midineke ty fagnonteneagne retoa:

• Ino amo o raha finorogneo iaby ty mampieke azo fa nisy namorogne ze kila raha?

• Azo inoagne vao tihoe nisy namboatse ze kila raha? Hazavao.

Raha Mahaliagne

Misy lahatsoratse tihoe “Nisy Namorogne Vao?” naho video tihoe “Ty Heve o Ndatio Miomba ty Niatomboha o Fiaignagneo” ty amy jw.org/tdx ao, magnaporofo fa nisy namboatse ze kila raha.

“Tsy kandrahaegne, fa sambe nisy namboatse ze kila tragno, faie Andrianagnahare ty namboatse ze kila raha iaby”

5. Maregne ty raha rehafe ty Baiboly miomba ty famorognagne

VIDEO: Nisy Namorogne Vao ze Kila Raha?​—Tapatapa’e (3:51)

• Ampianare ty Baiboly vao fa namboaregne tagnate ty enegne andro misy 24 lera ty tane toy naho ze raha ama’e eo?

• Azo inoagne vao ty raha rehafe ty Baiboly miomba ty famorognagne ze kila raha? Hazavao.

Vakio ty Genesisy 1:1, sady iharò midineke ty fagnonteneagne toy:

• Rehafe o mpahay siansao fa nisy fiatomboha’e ze kila raha. Mifagnarake amy i andinin-teny nivakiegne teoy vao ze fagnatsoahan-keve iareo zay?

Misy ty mieretseretse tie, nampiasa evolisiona vao ty Andrianagnahare naho fa namorogne ze raha managne aigne! Vakio ty Genesisy 1:21, 25, 27, sady iharò midineke ty fagnonteneagne retoa:

• Mampianatse vao ty Baiboly tie namboatse raha managne aigne tena kidikidy ty Andrianagnahare, le igne amy izay ro nanjare fiagne, le naho fa niavy eo biby mampinono, le niova ho ndaty? Sa raha managne aigne “sambe karaza’e” ro le avy le namboare’e?b

6. Miambake amy ty raha finoron’Andrianagnahare o ndatio

Tsy mitovy amo o bibio ty fomba namorogna i Jehovah antikagne. Vakio ty Genesisy 1:26, sady iharò midineke ty fagnonteneagne toy:

• Afake maneho hatea naho manao ty rare’e tikagne satria mitovy vintagne aman’Andrianagnahare. Ino ty toetsen’Andrianagnahare trea boake amy izay?

FAMINTIGNAGNE

Namorogne ze kila raha ty Jehovah.

Fameregnagne

• Ino ty rehafe ty Baiboly miomba ty namorognagne ze kila raha?

• Boake amy ty raha tena kidikidy, le nanjare raha managne aigne sambe karaza’e vao ty fomba namorognan’Andrianagnahare aze, sa namboare’e mivantagne ze kila raha managne aigne?

• Ino ty tsy mampitovy o ndatio amy ze kila raha finoron’Andrianagnahare?

FAGNAZAVAGNE FAGNAMPE’E

Hahatrea ohatse miomba ty raha finorogne magnaporofo ty fisia i Mpamorogney rehe ato.

“Ino ty Ianarantikagne Boake amo o Raha Finorogneo?” (Mifohaza! Septambra 2006)

Ho trea’o ato fa magnazava amy i ana-dahi’ey miomba ty raha finorogne ty baba’e.

“Namorogne Ze Raha Iaby ty Jehovah” (2:37)

Mifagnarake amo o Baibolio vao o evolisionao?

“Nampiasa Evolisiona vao ty Andrianagnahare mba Hamorognagne ty Raha Managne Aigne Isan-karaza’e?” (Lahatsoratse amy jw.org ao)

Porofoe ty sisan-draha mitiry naho ty taolam-biby taloha trea amy izao ndra ty fagnandramagne natao o mpahay siansao vao fa nisy namboatse ze kila raha sa nisy hoaze avao?

Akore ty Nampisy Antikagne​—Fagnonteneagne Dime Mila Dinehegne (bokekele)