LESOGNE 10
Handrambe Soa Rehe Naho Miarake Mivory amy ty Vavolombelo i Jehovah
Fa nisy nirehake azo mba hiarake mivory amy ty Vavolombelo i Jehovah vao? Naho mbe tsy tagne rehe, le va’e ho marikarike hey amy ty voaloha’e naho ho mbeo. Va’e hieretseretse rehe tie: ‘Ino ty atao iareo agne? Ino ty maha lahibey ty mandeha agne? Nagnino raho ro toko’e handeha amy iareo agne?’ Ho trea’o amy ty lesogne toy fa naho fa mivory miarake ama’ay rehe, le hifandrambe marine aman’Andrianagnahare sady hagnampe azo hagnasoa ty fiaigna’o ka zay.
1. Nagnino zahay Vavolombelo i Jehovah ro miarake mivory?
Mareho ty anto’e maha lahibey ty miarake mivory, arake ty nirehafe ty mpanoratse Baiboly raike toy. Hoe reke: “Amo o fiangonagneo eo ty hiderako azo [i Jehovah].” (Salamo 22:22) Miarake mivory manahake izay ka ty Vavolombelo i Jehovah amy hinane zao. Miarake mivory isan-keregnandro iareo mba hanompo an’Andrianagnahare, le mihira sady mivavake. Izay ty atao iareo magneran-tane. Manao havoriambey ka iareo isan-taogne.
2. Ino ty raha hianara’o naho fa magnatreke fivoriagne rehe?
Mianatse ty Saontsin’Andrianagnahare zahay naho fa mivory sady mikezake ‘magnazava ty hevetse agnate’e ao.’ (Vakio ty Nehemia 8:8.) Naho i rehe ka magnatreke ty fivoria’ay, le hianatse ty miomba i Jehovah naho ty toetse’e. Hagnarine aze rehe naho fa fanta’o soa tie tena tea azo reke. Hianara’o agne ka fa hagnampe azo reke mba hagnasoa ty fiaigna’o.—Isaia 48:17, 18.
3. Nagnino ro magnampe azo ty mifagnosehose amy ty ndaty am-pivoriagne agne?
Mandrisike antikagne ty Jehovah ‘mba hifampihevetse naho hifandrisike ho amy ty hatea vaho ty asa soa, le tsy hahafoe ty fiharoantikagne mivory.’ (Hebreo 10:24, 25) Naho fa mivory rehe, le ho trea’o fa tena mifankatea ty ndaty agne sady te hahafantatse soa ty miomba an’Andrianagnahare manahake azo avao ka iareo. Naho fa agne rehe, le ho tsapa’o fa tea mizara hevetse ara-pagnahy iareo. Ohatse, amy ty alala ty lahajaka, fiharoagne midineke mioregne amy Baiboly ao. Mifampahery ka iareo aloha ty hanomboha i fivoriagney naho afara’e. (Vakio ty Romanina 1:11, 12.) Ho trea’o agne ka fa maro ty ndaty mahavita miatreke ty olagne mahazo aze. Mahatsapa ho sambatse avao ka iareo. Ireo ty anto’e tsiampeampe mahavy i Jehovah mandrisike antikagne hivory tsy tapake!
ANDAO HANDINEKE TY PITSOPITSO’E
Hodinehentikagne ato tie, manao akore ty fivoria ty Vavolombelo i Jehovah sady nagnino tika ro toko’e hikezake mafe mba hagnatreke aze.
4. Ty fivoria ty Vavolombelo i Jehovah
Niarake nivory ty Kristiana tamy ty taonjato voaloha’e mba hanompoagne i Jehovah. (Romanina 16:3-5) Vakio ty Kolosianina 3:16, sady iharò midineke ty fagnonteneagne toy:
Akore ty natao o Kristiana tamy ty taonjato voaloha’e reo naho fa nivory?
Miarake mivory amy ty toeram-pivavaha iareo agne ka o Vavolombelo i Jehovah-o amy hinane zao. Mba hahafantara’o ty raha atao’ay am-pivoriagne agne, le alefaso i VIDEO oy. Naho fa avy eo, le henteo amo o sare amboneo io ty raha miseho agne, sady iharò midineke ty fagnonteneagne retoa.
Inogne iaby ty mampitovy ty raha miseho amy i Anjomba i Fanjakagney agne naho i amy Kolosianina 3:16 nivakientikagne teoy?
Inogne amy ty raha niseho tamy i video teoy ndra amo o sare amboneo io ty raha tea’o am-pivoriagne agne?
Vakio ty 2 Korintianina 9:7, sady iharò midineke ty fagnonteneagne toy:
Nagnino ty fivoria o Vavolombelo i Jehovah-o ro tsy andoavam-bola?
Iharò’areo amy i mpampianatse azoy midineke ty raha hodinehegne amy ty fivoriagne magnarake.
Ino amy i raha hianaragne am-pivoriagne agne rey ty mahaliagne azo ndra mahasoa azo?
Raha mahaliagne
Trea amy jw.org ao ty toeragne naho ty andro vaho ty lera misy ty fivoria’ay magneran-tane.
A. Misy lahajaka, fampiofagnagne naho video ty am-pivoria’ay agne. Atomboke naho faragnagne amy ty hira naho ty vavake ka i fivoriagney
B. Amy ty fizaràgne ila’e amy i fandaharagney, le mamale i mpagnatrekey naho fa ametrahagne fagnonteneagne
D. Afake magnatreke aze iaby ze kila ndaty ndra bey ndra kede
E. Tsy andoavam-bola ty fivoria’ay. Tsy mitake raketse o Vavolombelo i Jehovah-o
5. Mikezaha mafe mba hagnatreke fivoriagne
Dineho ty ohatse nengà ty keleia i Jesosy. Tsy maintsy nandeha tomboke 100 km ndra telo andro eo ho eo iareo, tie boake a Nazareta agne ho a Jerosalema agne mba hamonje ty fete i Pasakey. Vakio ty Lioka 2:39-42, sady iharò midineke ty fagnonteneagne retoa:
Akore ty heve’o, mora vao ty mandeha mba Jerosalema mbeo?
Nagnino ka rehe ro toko’e hikezake mafe mba hagnatreke fivoriagne?
Mahasoa azo vao ty mivory ndra tie mila kezake mafe aza? Ino ty anto’e?
Rehafe ty Baiboly fa tena ilaegne ty miarake mivory mba hanompo an’Andrianagnahare. Vakio ty Hebreo 10:24, 25, sady iharò midineke ty fagnonteneagne toy:
Nagnino tikagne ro toko’e hivory tsy tapake?
MISY TY MIREHAKE FA: “Tsy voatere miarake mivory amy ty hafa rehe. Naho fa mianatse Baiboly an-tragno’o agne rehe, le fa ampe zay.”
Ino ty andinin-teny ndra ohatse amy Baiboly ao mampiseho fa tea i Jehovah hiarake mivory tikagne?
FAMINTIGNAGNE
Vao mainke hahafantatse soa i Jehovah rehe, sady hifandrambe marine ama’e vaho hanompo aze miarake amy ty hafa naho fa magnatreke fivoriagne.
Fameregnagne
Nagnino ty Jehovah ro mandrisike antikagne hiarake hivory?
Ino ty raha hianara’o amy ty fivoria ty Vavolombelo i Jehovah agne?
Hagnampe azo amy ty fiaigna’o andavanandro vao ty fagnatreha’o fivoriagne?
FAGNAZAVAGNE FAGNAMPE’E
Ho trea’o amy ty video toy fa narikarike ty lahilahy raike toy naho fa hivory tamy ty voaloha’e faie niova zay.
Ho trea’o ato ty raha nahafinaritse ty ajalahy raike toy naho fa nagnatreke havoriambey, naho ty raha natao’e mba hagnatrehagne fivoriagne tsy tapake.
Ho trea’o ato ty raha tsapa ty ndaty ila’e miomba o fivoriagneo.
“Nagnino Raho ro Toko’e Hivory amy i Anjomba i Fanjakagney Agne?” (Lahatsoratse amy jw.org ao)
Ho trea’o ato fa nagnova ty fiaigna ty malaso raike toy ty fagnatreha’e ty fivoria ty Vavolombelo i Jehovah.
“Lava Nindeseko Avao ze Basiko zay Ndra aia Ndra aia Ombako” (Fitalakesan-davitse 1 Jolay 2014)