Ajalahy mandineke ze ndaty mandeha amy i Anjomba i Fanjakagney ao

FAGNONTENEA O TANORAO

Nagnino Raho ro Toko’e Hivory amy i Anjomba i Fanjakagney Agne?

Mivory indroe isan-keregnandro amy ty toeragne atao tihoe Anjomba i Fanjakagney ty Vavolombelo i Jehovah. Ino iaby ty atao agnate o fivoriagne rehoe? Sady ino ty soa horambese’o naho magnatreke ireo rehe?

Inogne ty atao amy i Anjomba i Fanjakagney agne?

Toeragne natokagne hianaragne Baiboly tihoe Anjomba i Fanjakagney. Naho fa mandeha mivory rehe, le:

hianatse ty maregne miomba an’Andrianagnahare.
ho azo’o tie ino ty dika o raha miseho amy izaò.
hanjare ho soa toetse.
hahazo namagne soa.

Fanta’o vao? Atao tihoe Anjomba i Fanjakagney ty toeragne ivoria ty Vavolombelo i Jehovah satria ty Fanjakàn’Andrianagnahare ro tena rehafegne agne.—Matio 6:9, 10; 24:14; Lioka 4:43.

Nagnino rehe ro mila mandeha mivory?

Hagnampe azo ty raha hianara’o agne. Hagnampe azo “hanagne fahendreagne” ty toroheve ty Baiboly rehafegne amy ty fivoria ty Vavolombelo i Jehovah agne. (Ohabolana 4:5) Afake magnampe azo handrambe fanapahan-kevetse soa ty Baiboly. Hahatrea ty vale ty fagnonteneagne lahibey miomba ty fiaignagne ka rehe, agnisa izay tihoe:

Izao ohatse, ty lohan-dreha ty lahajaka ila’e atao agne naho fa fara heregnandro:

Nagnino Tikagne ro Toko’e Hagnorike ty Tari-dala ty Baiboly?
Ia ty Afake Magnampe Antikagne amy ty Andro Mahaore?
Ino ty fa Atao i Fanjakàn’Andrianagnaharey ho Antikagne?

“Nisy mpiara-mianatse ama’ay zay le avy le nivory. Niarake nitoboke tama’ay reke, le nampea’ay mba haharake soa i fivoriagney. Nitantarae’e tamako naho fa niavy eo tie nahafinaritse aze ty nitsanogne ty toin-drehake nimey i mpagnatrekey. Nirehake ka reke tie ty amy iareo agne tsy misy boke ianaragne.”—Brenda.

Fanta’o vao? Tsy misy vola aloa ty fidiragne amy i Anjomba i Fanjakagney agne sady tsy misy fitakean-draketse.

Mampahery ty ndaty agne. Mirehake ty Baiboly fa toko’e hivory o Kristianao mba “hifampahery.” (Hebreo 10:24, 25) Tea tegna ty ankamaroa ty ndaty amy izao, faie tsy hoe izay ty ndaty hotrea’o agne. Mahafinaritse ty miarake amy iareo satria mikezake ho naman’Andrianagnahare iareo sady tea magnampe ty hafa.

“Naho fa maro raha atao tagnate i androy raho, le tena rokake naho fa hariva ndra malahelohelo avao. Faie afake iaby zay naho mirehake amy ty ndaty am-pivoriagne agne raho. Falefale raho naho fa mandeha moly, sady vognogne hiatreke ty andro magnarake.”—Elisa.

Fanta’o vao? Misy fiangona ty Vavolombelo i Jehovah 120 000 mahery magneran-tane. Toeragne fivoriagne 60 000 ty ampiasae iareo. Anjomba i Fanjakagney vaovao 1 500 eo ho eo ty aoregne isan-taogne satria mitombo bey ty isa ty ndaty magnatreke fivoriagne.a

Ty heve ty tanora manahake azo

“Tamy raho mbe tamy i lisé ey, le nisy mpiara-mianatse ama’ay zay nandeha nivory niarake tamako kindraike. Trea’e tie niarake nianatse Baiboly iaby ndra bey ndra kede, ndra antetse ndra tanora, le nahafinaritse aze ze raha zay. Mbe tsy ela ka zay, le nivory i sefo’aỳ. Nahagaga aze ty nahatrea tie nampiasa Baiboly mateteke tikagne. Tena tea’e i fivoriagney, le vao mainke tea nivory ka raho.”—Jessica.

“Halignoko iaby i raha nampinekoneko ahy rey naho i raha nampivali-doha ahy rey naho fa am-pivoriagne agne raho. Ampianaregne antikagne agne tie inogne ty raha tena mahasambatse amy ty fiaignagne, ino ty atao mba hahavy antika ho soa toetse, naho ty maro hafa. Mahatsiaro ho maivagnivagne naho mahery raho naho fa moly.”—Timothy.

“Nisy ramosé zay nitaoneko hivory, le hoe reke naho fa nitapetse i fivoriagney: ‘Ho nagnaporofo raho tie diso ty raha inoa’areo, izay nahavy ahike nagneke ho avio. Kay ty ahy ro diso!’ Nahafinaritse aze ka ty nahatrea tie tena mahay mandrambe ambahiny i Vavolombelo i Jehovah rey. Hoe reke: ‘Vaho izao tika ro nifankatrea faie nirambese’areo mitovy amy ty nama’areo fa an-tao’e maro raho!’ ”—Jacob.

“Nisy fotoagne raho nieretseretse tie: ‘Le avy le holy raho naho fa vita i fivoriagney.’ Faie naho fa mandeha i fivoriagney, le tsy mba mieretseretse izay sasa raho. Tamy ty fara’e raho, nanjare nirehake amy ze kila ndaty, gagan-draha raho naho fa niavy eo tie nagnino raho ro nieretseretse tamy ty voaloha’e tie tsy hijanogne. Naho tsy tam-pivoriagne agne raho, le tsy ho nahazo namagne mahafinaritse.”—Madison.

a Naho te hahatrea ty toeragne fivoria’ay rehe, le miziliha amy tihoe “Fivoria ty Vavaolombelo i Jehovah” sady gineho tihoe “Paliao ze Toeragne Marine Azo.”