Mistery ty Andrianagnahare

INO TY INOA O NDATIO?

O fivavahagne kristiana “telo lahibey retoa, ty Fivavahagne Katolika naho Ortodoksa vaho Protestanta, le sambe magneke fa telo miharo raike ty Andrianagnahare: Andrianagnahare Rae, Andrianagnahare Anake, naho Andrianagnahare Fagnahy Masigne. Tsy tihoe misy andrianagnahare telo fa raike avao iareo telo reo, arake ty fampianaragne kristiana miomba an’Andrianagnahare.”​—Fangalan-kilala Britannica Vaovao (angilé).

TY MAREGNE REHAFE TY BAIBOLY

Tsy nihambo ho mitovy aman-dRae’e ty Jesosy, i Anan’Andrianagnaharey. Hoe reke: “Bey mihoatse ahy ty Rae.” (Jaona 14:28) Hoe ka reke tamy ty mpiana’e raike: “Hiakatse aman-dRaeko naho Rae’areoy agne raho, le ho amy i Andrianagnahareko naho Andrianagnahare’areoy agne.”​—Jaona 20:17.

Tsy Andrianagnahare o fagnahy masigneo fa hery ampiasaen’Andrianagnahare. (Genesisy 1:2) “Feno fagnahy masigne” i Kristiana voaloha’e rey. Hoe ka ty Jehovah: “Hampipohako ty ampaha’e amy ty fagnahiko ze karaza nofo iaby.”​—Asan’ny Apostoly 2:1-4, 17.

NAGNINO ZAY RO ILAEGNE FANTAREGNE?

Mirehake ty Karl Rahner naho i Herbert Vorgrimler, manam-pahaizagne Katolika, fa tihoe Andrianagnahare tokagne ndaty telo le “tsy ho fantatse naho tsy misy mampahafantatse, sady ndra tie fa misy mampahafantatse aza le mbe tsy hazava avao.” Mikalagne o ndatio tsy hahafantatse ndra ho tea an’Andrianagnahare areke ty fampianaragne miomba ty Andrianagnahare telo miharo raike.

Izay ty nitsapa i Marco, i nirehafegne taloha tagney. Hoe reke: “Nihevetse raho fa naetan’Andrianagnahare amako ty miomba aze. Vao mainke mistery reke le sarotse amako ty miharine aze.” Tea’e hahafantatse aze tikagne, le tsy naeta’e tamantikagne ty mombamomba aze. Hoe ty Jesosy: “Mivavake amy ze fanta’ay zahay.”​—Jaona 4:22.

Hoe ty Marco: “Nanjare nifandrambe marine aman’Andrianagnahare raho naho fa nifantako tie tsy telo miharo raike reke.” Ho mora amantikagne ty ho tea i Jehovah naho mahafantatse aze soa tikagne, le tsy mihevetse tie mistery reke. Hoe ty Baiboly: “Mbe tsy mahafantatse an’Andrianagnahare ze tsy tea, satria Andrianagnahare hatea.”​—1 Jaona 4:8.